ಸಾಲ ತೀರಿಸಲು ಪೆಟ್ರೋಲ್​ ಬಂಕ್​ ದರೋಡೆ, ಬಿತ್ತು ಎರಡು ಹೆಣ... ಕೊನೆಗೇನಾಯ್ತು?

ಕಿತ್ತೂರು ಪಟ್ಟಣದ ಶಿವಾ ಪೆಟ್ರೋಲ್ ಬಂಕ್​​ನೊಳಗೆ ನುಗ್ಗಿ ಕೊಲೆಗೈದಿದ್ದ ಆರೋಪಿ ಅಂದರ್​ ಆಗಿದ್ದಾನೆ. ಹತ್ಯೆಗೊಳಗಾದ ಇಬ್ಬರು ಬಂಕ್​​ನಲ್ಲಿ ಕೆಲಸ ಮಾಡುತ್ತಿದ್ದರು. ಕೃತ್ಯದ ಬಳಿಕ ಆರೋಪಿಯು ಕ್ಯಾಶ್ ಕೌಂಟರ್​​ನಲ್ಲಿದ್ದ ಹಣ ದೋಚಿ ಪರಾರಿಯಾಗಿದ್ದ.

ಬೆಳಗಾವಿ:ಜಿಲ್ಲೆಯ ‌ಕಿತ್ತೂರು ಪಟ್ಟಣದ ಹೊರವಲಯದಲ್ಲಿ ನಡೆದ ಜೋಡಿ ಕೊಲೆಯ ಹಂತಕನನ್ನು ಜಿಲ್ಲೆಯ‌ ಪೊಲೀಸರು ಖೆಡ್ಡಾಕ್ಕೆ ಕೆಡವಿದ್ದಾರೆ.
ಧಾರವಾಡ ತಾಲೂಕಿನ ಕಲ್ಲಾಪುರ ಗ್ರಾಮದ ನಿವಾಸಿ ಭೀಮಪ್ಪ ಮಲ್ಲಪ್ಪ ತೀರಗಪ್ಪನವರ ಬಂಧಿತ ಆರೋಪಿ.

ಮೇ‌. 17ರಂದು ಕಿತ್ತೂರು ಪಟ್ಟಣದ ಶಿವಾ ಪೆಟ್ರೋಲ್ ಬಂಕ್​​ನೊಳಗೆ ನುಗ್ಗಿದ್ದ ಹಂತಕ ಭೀಮಪ್ಪ ಇಬ್ಬರ ಕೊಲೆಗೈದಿದ್ದ. ಬಂಕ್​​ನಲ್ಲಿ ಮಲಗಿದ್ದ ಮಂಜುನಾಥ ಹಾಗೂ ಮುಸ್ತಾಕ್ ಬೀಡಿ ಎಂಬುವರನ್ನು ಕೊಡಲಿಯಿಂದ ಬರ್ಬರವಾಗಿ ಹತ್ಯೆಗೈಯ್ದಿದ್ದ. ಹತರಾದವರು ಬಂಕ್​​ನಲ್ಲಿ ಕೆಲಸ ಮಾಡುತ್ತಿದ್ದರು. ಕೃತ್ಯದ ಬಳಿಕ ಭೀಮಪ್ಪ ಕ್ಯಾಶ್ ಕೌಂಟರ್​​ನಲ್ಲಿದ್ದ ಹಣ ದೋಚಿ ಪರಾರಿಯಾಗಿದ್ದ.

ತಾನು‌ ಮಾಡಿಕೊಂಡಿದ್ದ ವಿಪರೀತ ಸಾಲ ತೀರಿಸಲು ಭೀಮಪ್ಪ ‌ಬಂಕ್ ದರೋಡೆಗೆ ಸ್ಕೆಚ್ ಹಾಕಿದ್ದ. ಬಂಕ್​ನಲ್ಲಿ ಯಾರೂ ಇಲ್ಲದ ಸಮಯ ಸಾಧಿಸಿದ್ದ ಭೀಮಪ್ಪ ಇಬ್ಬರನ್ನು ಕೊಲೆಗೈದು ದರೋಡೆ ಮಾಡಿ ಪರಾರಿಯಾಗಿರುವುದಾಗಿ ಆರೋಪಿ ಒಪ್ಪಿಕೊಂಡಿದ್ದಾನೆ ಎಂದು ಎಸ್ಪಿ ಸುಧೀರಕುಮಾರ್​​ ರೆಡ್ಡಿ ಮಾಧ್ಯಮದವರಿಗೆ ತಿಳಿಸಿದ್ದಾರೆ. ಆರೋಪಿಯಿಂದ ಕೊಲೆಗೆ ಬಳಸಿದ ಕೊಡಲಿ ಹಾಗೂ 25 ಸಾವಿರ ನಗದು ವಶಪಡಿಸಿಕೊಳ್ಳಲಾಗಿದೆ.