ಬೆಳಗಾವಿಯಲ್ಲಿ ಸಾಮಾಜಿಕ ಅಂತರದೊಂದಿಗೆ ಬಕ್ರೀದ್​ ಆಚರಣೆ

ಪ್ರತೀ ವರ್ಷದಂತೆ ಒಬ್ಬರಿಗೊಬ್ಬರು ಅಪ್ಪಿಕೊಂಡು ಬಕ್ರೀದ್ ಹಬ್ಬದ ಶುಭಾಶಯಗಳನ್ನು ತಿಳಿಸದೆ ಸಾಮಾಜಿಕ ಅಂತರವನ್ನು ಕಾಯ್ದುಕೊಂಡು ಪ್ರಾರ್ಥನೆ ಸಲ್ಲಿಸಿದರು.

ಬೆಳಗಾವಿ: ನಗರದ ವಿವಿಧ ಮಸೀದಿಗಳಲ್ಲಿ ಜಿಲ್ಲಾಡಳಿತದ ನಿಯಮಗಳನ್ನು ಪಾಲನೆ ಮಾಡಿ, ಈದ್-ಉಲ್-ಅದಾವನ್ನು ಮುಸ್ಲೀಂ ಧರ್ಮೀಯರು ಸರಳವಾಗಿ ಆಚರಿಸಿದರು.

ಈ ವೇಳೆ, ಪ್ರತಿಯೊಬ್ಬರನ್ನೂ ಥರ್ಮಲ್ ಸ್ಕ್ರೀನಿಂಗ್‌ಗೆ ಒಳಪಡಿಸಿಯೇ ಮಸೀದಿಯೊಳಗೆ ಬಿಡಲಾಯಿತು. ಜನರು ಮಾಸ್ಕ್ ಧರಿಸಿದ್ದು, 50 ಸದಸ್ಯರ ಬ್ಯಾಚ್ ಮೂಲಕ ಪ್ರಾರ್ಥನೆಗೆ ಅವಕಾಶ ಕಲ್ಪಿಸಲಾಗಿದೆ.

ಈ ವೇಳೆ ಹಫೀಜ್ ಅಬ್ದುಲ್ ರಜಾಕ್ ಮಾತನಾಡಿ, ದೇಶಾದ್ಯಂತ ಕೊರೊನಾ ವೈರಸ್ ಇರುವುದರಿಂದ ಬಕ್ರೀದ್ ಹಬ್ಬ ಕಳೆಗುಂದಿದೆ. ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವವರು ಆದಷ್ಟೂ ಬೇಗನೆ ಗುಣಮುಖರಾಗಲಿ. ಕೊರೊನಾ ಸೋಂಕು ಸಂಕಷ್ಟದಿಂದ ದೇವರು ಮುಕ್ತಿ ನೀಡಲೆಂದು ಪ್ರಾರ್ಥಿಸಿರುವುದಾಗಿ ತಿಳಿಸಿದರು.