ಕೃಷ್ಣೆಗೆ ಹರಿದು ಬಂದ 'ಮಹಾ' ನೀರು.. ಬಿಡುಗಡೆಯಾದ ನೀರಿಗೆ ಅಳತೆಯೇ ಇಲ್ಲ..

ಕೃಷ್ಣಾ ನದಿಯಲ್ಲಿ ಒಳ ಹರಿವಿನ ಪ್ರಮಾಣ ದಿಢೀರ್ ಹೆಚ್ಚಾಗಿದೆ. ಒಣಗಿ ಹೋಗಿದ್ದ ಹಿಪ್ಪರಗಿ ಬ್ಯಾರೇಜ್‌ಗೆ ನೀರು ತಲುಪಿದ್ದರಿಂದ ಆ ಭಾಗದ ರೈತರು ಮತ್ತು ಜನರು ನಿಟ್ಟುಸಿರು ಬಿಡುವಂತಾಗಿದೆ.

ಚಿಕ್ಕೋಡಿ:ಮಹಾರಾಷ್ಟ್ರದ ರಾಜಾಪುರ ಡ್ಯಾಂ ಬಳಿ ಹಾಕಲಾಗಿದ್ದ ಬೃಹತ್ ಮಣ್ಣಿನ ಒಡ್ಡು ಒಡೆದಿದ್ದು, ಡ್ಯಾಂನ ಎಲ್ಲಾ ಗೇಟ್‌ಗಳ‌ ಮೂಲಕ ನೀರು ಕೃಷ್ಣಾ ನದಿ ಪ್ರವೇಶಿಸುತ್ತಿದೆ. ಬಿಡುಗಡೆಯಾದ ನೀರಿಗೆ ಅಳತೆಯೇ ಇಲ್ಲದಂತಾಗಿದೆ.

ನೀರಿನ ಒತ್ತಡದಿಂದಾಗಿ ರಾಜಾಪುರ ಬ್ಯಾರೇಜ್ ಬಳಿ ಹಾಕಲಾಗಿದ್ದ ಮಣ್ಣಿನ ಒಡ್ಡು ಒಡೆದಿದೆ. 64 ಗೇಟುಗಳ ಪೈಕಿ 11 ಗೇಟ್​ಗಳಿಂದ ಕೃಷ್ಣಾ ನದಿಗೆ ನೀರು ಬಿಡಲಾಗುತ್ತಿತ್ತು. ಉಳಿದ ಗೇಟುಗಳು ದುರಸ್ತಿ ಕಾರ್ಯ ನಡೆದಿದ್ದರಿಂದ ಬ್ಯಾರೇಜ್‌ನಿಂದ ಸುಮಾರು 30 ಕಿ ಮೀವರೆಗೆ ನೀರು ಸಂಗ್ರಹವಾಗಿತ್ತು. ಅಲ್ಲದೆ ಮಹಾರಾಷ್ಟ್ರ ರಾಜ್ಯದಲ್ಲಿ ಭಾರಿ ಮಳೆ ಸುರಿಯುತ್ತಿರುವುದರಿಂದ ನೀರಿನ ಪ್ರಮಾಣ ಹೆಚ್ಚಾಗಿ ಬೃಹತ್ ಪ್ರಮಾಣದ ಒಡ್ಡು ಒಡೆದಿದೆ.

ಮಹಾರಾಷ್ಟ್ರದಲ್ಲಿ ಬಿಡದೆ ಮಳೆಯಾಗುತ್ತಿದೆ. ನೆರೆಹಾವಳಿಯ ಸಾಧ್ಯತೆಯ ಹಿನ್ನೆಲೆಯಲ್ಲಿ ಮಹಾರಾಷ್ಟ್ರದ ಕೊಲ್ಹಾಪುರ ಜಿಲ್ಲೆಯ ಶಿರೋಳ ತಾಲೂಕಿನ ರಾಜಾಪುರ ಬ್ಯಾರೇಜ್​ಗೆ ನೀರು ಹರಿದು ಬರುತ್ತಿದೆ. ಇದೆ ನೀರನ್ನ ಕೃಷ್ಣಾ ನದಿಗೆ ಬಿಡಲಾಗುತ್ತಿದ್ದು, ಸದ್ಯ ಬೆಳಗಾವಿ ಜಿಲ್ಲೆಯ ಅಥಣಿ ತಾಲೂಕು ದಾಟಿ ಹಿಪ್ಪರಗಿ ಬ್ಯಾರೇಜ್‌ಗೆ ತಲುಪಿದೆ.

ಸದ್ಯ ಕೃಷ್ಣಾ ನದಿಯಲ್ಲಿ ಒಳ ಹರಿವಿನ ಪ್ರಮಾಣ ದಿಢೀರ್ ಹೆಚ್ಚಾಗಿದೆ. ಒಣಗಿ ಹೋಗಿದ್ದ ಹಿಪ್ಪರಗಿ ಬ್ಯಾರೇಜ್‌ಗೆ ನೀರು ತಲುಪಿದ್ದರಿಂದ ಆ ಭಾಗದ ರೈತರು ಮತ್ತು ಜನರು ನಿಟ್ಟುಸಿರು ಬಿಡುವಂತಾಗಿದೆ.