ಬೆಂಗಳೂರು: ಡಾಲರ್ ನೋಟುಗಳನ್ನು ಭಾರತೀಯ ಕರೆನ್ಸಿಗೆ ಪರಿವರ್ತಿಸಿ ಕೊಡಲು ಮುಂದಾದ ವ್ಯಕ್ತಿಗೆ ಮಹಿಳೆಯೊಬ್ಬರು ಯಾಮಾರಿಸಿ 98 ಸಾವಿರ ರೂ. ಟೋಪಿ ಹಾಕಿರುವ ಘಟನೆ ನಗರದಲ್ಲಿ ನಡೆದಿದೆ.
ತಾನು ಕೆಲಸ ಮಾಡುವ ಜಾಗದಲ್ಲಿ ಕಸ ಗುಡಿಸುವಾಗ ಯುಎಸ್ಎ ಮುಖಬೆಲೆಯ 800 ಡಾಲರ್ ನೋಟುಗಳು ಸಿಕ್ಕಿವೆ ಎಂದಿರುವ ಆಕೆ, ತನ್ನ ಬಳಿಯಿದ್ದ ನೋಟುಗಳನ್ನು ಸ್ಥಳೀಯ ನಿವಾಸಿ ಕುಮಾರ್ ಎಂಬಾತನಿಗೆ ತೋರಿಸಿದ್ದಾಳೆ.
ಅದನ್ನು ನೋಡಿದ ಕುಮಾರ್ ಅವರು ಫಾರಿನ್ ಎಕ್ಸ್ ಚೆಂಜ್ ಸೆಂಟರ್ಗೆ ಹೋಗಿ ಪರಿಶೀಲಿಸಿದ್ದಾರೆ. ಆಗ ಅವು ಅಸಲಿ ನೋಟುಗಳೆಂದು ತಿಳಿದುಬಂದಿದೆ. ಅನಂತರ ಆಕೆ ನನ್ನ ಬಳಿಯಿರುವ ಡಾಲರ್ಗಳನ್ನು ಭಾರತೀಯ ನೋಟುಗಳಾಗಿ ಪರಿವರ್ತಿಸಿ 1 ಲಕ್ಷ ರೂಪಾಯಿ ನೀಡುವಂತೆ ಕೇಳಿದ್ದಾಳೆ.
ಆಕೆಯ ಮಾತನ್ನು ನಂಬಿದ ಕುಮಾರ್ ಹಣ ಹೊಂದಿಸಲು ಮೂರು ದಿನಗಳ ಕಾಲಾವಕಾಶ ಕೇಳಿದ್ದಾನೆ. ಮಾತುಕತೆಯಂತೆ ನ. 17ರಂದು ಯಶವಂತಪುರಕ್ಕೆ ವಂಚಕಿ ಕುಮಾರ್ಗೆ ಬರುವಂತೆ ಹೇಳಿದ್ದಾಳೆ.
ಇದರಂತೆ ಭೇಟಿಯಾದ ಕುಮಾರ್ಗೆ ಬಟ್ಟೆಯಲ್ಲಿ ಸುತ್ತಿದ ವಸ್ತುವನ್ನು ಹಣವೆಂದು ನೀಡಿದ್ದಾಳೆ. ಇದಕ್ಕೆ ಪ್ರತಿಯಾಗಿ ಕುಮಾರ್ 98 ಸಾವಿರ ರೂಪಾಯಿ ನೀಡುತ್ತಿದ್ದಂತೆ ವಂಚಕಿ ಕ್ಷಣಾರ್ಧದಲ್ಲಿ ತಲೆಮರೆಸಿಕೊಂಡಿದ್ದಾಳೆ.
ಬಂಡಲ್ ಬಿಚ್ಚಿ ನೋಡಿದಾಗ ಖಾಲಿ ಹಾಳೆ ಇರುವುದು ಗೊತ್ತಾಗಿ ತಾನು ಮೋಸ ಹೋಗಿದ್ದೇನೆ ಎಂಬುದು ಅವರಿಗೆ ಮನವರಿಕೆಯಾಗಿದೆ. ಈ ಕುರಿತು ಯಶವಂತಪುರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಈ ಹಿನ್ನಲೆ ಮಹಿಳೆ ಸೇರಿ ಮೂವರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿರುವ ಸಿಬ್ಬಂದಿ ತನಿಖೆ ಕೈಗೊಂಡಿದ್ದಾರೆ.
ಓದಿ:ಬಿಟ್‌ಕಾಯಿನ್ ಹೂಡಿಕೆಯಲ್ಲಿ 10 ಲಕ್ಷ ರೂ. ಕಳೆದುಕೊಂಡು ಕಳ್ಳತನದ ಕಥೆ ಕಟ್ಟಿದ ವ್ಯಕ್ತಿ
