₹6,800 ಕೋಟಿ ವೆಚ್ಚದಲ್ಲಿ ಹೆಚ್‌ಎಎಲ್‌ನಿಂದ 70 ತರಬೇತಿ ವಿಮಾನ ಖರೀದಿಗೆ ಕೇಂದ್ರ ನಿರ್ಧಾರ

ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ಬುಧವಾರ ನಡೆದ ಭದ್ರತೆ ಕುರಿತ ಮಹತ್ವದ ಸಂಪುಟ ಸಮಿತಿ (ಸಿಸಿಎಸ್) ಸಭೆಯಲ್ಲಿ 6,828.36 ಕೋಟಿ ರೂ ವೆಚ್ಚದಲ್ಲಿ 70 ಎಚ್‌ಟಿಟಿ-40 ಮೂಲ ತರಬೇತುದಾರ ವಿಮಾನಗಳ ಖರೀದಿಗೆ ಅನುಮೋದನೆ ನೀಡಲಾಗಿದೆ.

ನವದೆಹಲಿ: ಭಾರತೀಯ ವಾಯುಪಡೆಗಾಗಿ 6,828.36 ಕೋಟಿ ರೂ ವೆಚ್ಚದಲ್ಲಿ 70 HTT-40 ಬೇಸಿಕ್ ಟ್ರೈನರ್ ಏರ್‌ಕ್ರಾಫ್ಟ್‌ಗಳನ್ನು ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (ಹೆಚ್‌ಎಎಲ್) ನಿಂದ ಖರೀದಿಸಲು ಕೇಂದ್ರ ಸಚಿವ ಸಂಪುಟ ಒಪ್ಪಿಗೆ ಕೊಟ್ಟಿದೆ. ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ಜರುಗಿದ ಭದ್ರತೆಯ ಸಂಪುಟ ಸಮಿತಿ ಸಭೆಯಲ್ಲಿ ಎಚ್‌ಟಿಟಿ-40 ಬೇಸಿಕ್ ಟ್ರೈನರ್ ಏರ್‌ಕ್ರಾಫ್ಟ್‌ಗಳನ್ನು ಖರೀದಿಸಲು ಗ್ರೀನ್ ಸಿಗ್ನಲ್ ನೀಡಲಾಯಿತು. ಈ ವಿಮಾನಗಳು ಹೊಸದಾಗಿ ಸೇರ್ಪಡೆಗೊಂಡ ಪೈಲಟ್‌ಗಳ ತರಬೇತಿಗಾಗಿ ಐಎಎಫ್‌ನ ಮೂಲ ತರಬೇತುದಾರ ವಿಮಾನಗಳ ಕೊರತೆ ನೀಗಿಸುತ್ತವೆ.

ಆರು ವರ್ಷಗಳ ಅವಧಿಯಲ್ಲಿ ಈ ವಿಮಾನಗಳನ್ನು ಪೂರೈಸಲಾಗುವುದು. ಈ ನಿರ್ಧಾರವು ಭಾರತೀಯ ಏರೋಸ್ಪೇಸ್ ರಕ್ಷಣಾ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವ ನಿರೀಕ್ಷೆಯಿದೆ. ಅಷ್ಟೇ ಅಲ್ಲದೇ, 'ಆತ್ಮನಿರ್ಭರ್ ಭಾರತ್' ಕಡೆಗಿನ ಪ್ರಯತ್ನಗಳನ್ನು ಹೆಚ್ಚಿಸಲಿದೆ. ಉತ್ತಮ, ಕಡಿಮೆ ವೇಗದ ನಿರ್ವಹಣೆ ಗುಣಗಳನ್ನು ಹೊಂದುವ ಮತ್ತು ಉತ್ತಮ ತರಬೇತಿ ಪರಿಣಾಮಕಾರಿತ್ವ ಒದಗಿಸುವ ರೀತಿಯಲ್ಲಿ ವಿಮಾನಗಳನ್ನು ವಿನ್ಯಾಸಗೊಳಿಸಲಾಗುತ್ತದೆ ಎಂದು ರಕ್ಷಣಾ ಸಚಿವಾಲಯ ಹೇಳಿದೆ.

ರಕ್ಷಣಾ ಕ್ಷೇತ್ರದಲ್ಲಿ ಸ್ವಾವಲಂಬನೆ: ಈ ವಿಮಾನಗಳನ್ನು ಹೆಚ್‌ಎಎಲ್ ಆರು ವರ್ಷಗಳ ಅವಧಿಯಲ್ಲಿ ಪೂರೈಸಲಿದೆ. ಹೊಸ ಅವಕಾಶಗಳು ತೆರೆಯುತ್ತವೆ. ಸಾವಿರಾರು ಉದ್ಯೋಗಗಳನ್ನು ಇದು ಸೃಷ್ಟಿಸುತ್ತದೆ. ರಕ್ಷಣೆಯಲ್ಲಿ ಭಾರತದ ಸ್ವಾವಲಂಬನೆಯನ್ನು ಬಲಪಡಿಸುವ ಉದ್ದೇಶದಿಂದ ಇದೊಂದು ಮಹತ್ವದ ಹೆಜ್ಜೆ ಎಂದು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಟ್ವೀಟ್‌ನಲ್ಲಿ ತಿಳಿಸಿದ್ದಾರೆ.

ಸಚಿವಾಲಯದ ಪ್ರಕಾರ, HTT-40 ವಿಮಾನವು ಸುಮಾರು 56 ಪ್ರತಿಶತದಷ್ಟು ಸ್ಥಳೀಯ ಕಂಟೆಂಟ್​ ಹೊಂದಿದೆ. ಇದು ಪ್ರಮುಖ ಘಟಕಗಳು ಮತ್ತು ಉಪ-ವ್ಯವಸ್ಥೆಗಳ ಸ್ವದೇಶೀಕರಣದ ಮೂಲಕ ಹಂತಹಂತವಾಗಿ 60 ಪ್ರತಿಶತಕ್ಕೆ ಹೆಚ್ಚಾಗುತ್ತದೆ. HAL ತನ್ನ ಪೂರೈಕೆ ಸರಪಳಿಯಲ್ಲಿ MSME ಸೇರಿದಂತೆ ಭಾರತೀಯ ಖಾಸಗಿ ಉದ್ಯಮವನ್ನು ಒಳಗೊಂಡಿರುತ್ತದೆ. ಸುಮಾರು 1,500 ಸಿಬ್ಬಂದಿಗೆ ನೇರ ಉದ್ಯೋಗ ಮತ್ತು 100 MSME ಗಳಲ್ಲಿ ಹರಡಿರುವ 3,000 ಜನರಿಗೆ ಪರೋಕ್ಷ ಉದ್ಯೋಗವನ್ನು ಒದಗಿಸುವ ಸಾಮರ್ಥ್ಯ ಹೊಂದಿದೆ.

ಇದನ್ನೂ ಓದಿ:HALನ 19 ಪ್ರಯಾಣಿಕ ಸಾಮರ್ಥ್ಯದ ಹಿಂದುಸ್ತಾನ್-228 ವಿಮಾನಕ್ಕೆ ಡಿಜಿಸಿಎ ಅನುಮೋದನೆ

ಹಿಂದುಸ್ತಾನ್-228 ಏರ್ ಕ್ರಾಫ್ಟ್: ಇದಕ್ಕೂ ಮುನ್ನ ದೇಶದ ಪ್ರತಿಷ್ಟಿತ ಕೇಂದ್ರ ಸರಕಾರಿ ಸ್ವಾಮ್ಯದ ವಿಮಾನ ತಯಾರಿಕಾ ಕಾರ್ಖಾನೆ ಹೆಚ್ಎಎಲ್ ನಿರ್ಮಿತ ನೂತನ 19 ಪ್ರಯಾಣಿಕರ ಸಾಮರ್ಥ್ಯದ ''ಹಿಂದುಸ್ತಾನ್-228 ಏರ್ ಕ್ರಾಫ್ಟ್'' ಮಾರ್ಪಾಡಿಗೆ ನಾಗರಿಕ ವಿಮಾನಯಾನ ನಿರ್ದೇಶನಾಲಯ ಒಪ್ಪಿಗೆ ಕೊಟ್ಟಿತ್ತು. ಈ ಹೊಸ ಮಾದರಿಯ 19 ಪ್ರಯಾಣಿಕರ ಸೌಲಭ್ಯದ ವಿಮಾನವು 5,695 ಕೆಜಿ ಟೇಕ್ ಆಫ್ ಗರಿಷ್ಠ ತೂಕದ ಸಾಮರ್ಥ್ಯ ಹೊಂದಿದೆ. ''ಹಿಂದುಸ್ತಾನ್ 228 ಏರ್‌ಕ್ರಾಫ್ಟ್'' ಹಲವಾರು ವಿಶೇಷತೆಗಳಿಂದ ಕೂಡಿದ್ದು ಉಳಿದ ಸಾಮಾನ್ಯ ವಿಮಾನಗಳಿಗೆ ಹೋಲಿಸಿದರೆ ಇದರ ಚಾಲನೆ ಪೈಲಟ್​ಗಳಿಗೆ ಸುಲಭ.