'ಕತ್ತಿ'ಮತ್ತಷ್ಟು ಹರಿತ: ಬಿಎಸ್​ವೈ ಮನವೊಲಿಕೆ ವಿಫಲ

ಅಸಮಾಧಾನಗೊಂಡಿದ್ದ ಉಮೇಶ್ ಕತ್ತಿಯನ್ನು ಸಮಾಧಾನ ಪಡಿಸಲೆಂದು ಸಿಎಂ ಬಿಎಸ್​ವೈ ತಮ್ಮ ಮನೆಗೆ ಕರೆಸಿಕೊಂಡಿದ್ದರು. ಆದರೆ, ಮಾತುಕತೆಯ ನಡುವೆಯೇ ಶಾಸಕ ಉಮೇಶ ಕತ್ತಿ ಹೊರಬಂದಿದ್ದು, ಬಿಎಸ್​ವೈ ಸಂಧಾನ ವಿಫಲವಾಗಿದೆ.

ಬೆಂಗಳೂರು:ಸಚಿವ ಸ್ಥಾನ ವಂಚಿತ ಮಾಜಿ ಸಚಿವ ಉಮೇಶ್ ಕತ್ತಿ ಜೊತೆಗಿನ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ನಡೆಸಿದ ಎರಡನೇ ಮನವೊಲಿಕೆ ಸಭೆಯೂ ವಿಫಲಗೊಂಡಿದ್ದು, ಶಿಫಾರಸ್ಸಿನ ಮಂತ್ರಿಗಿರಿ ನಾನು ಕೇಳಲ್ಲ ಎನ್ನುತ್ತಾ ಲಕ್ಷ್ಮಣ‌ಸವದಿ ವಿರುದ್ಧ ಅಸಮಧಾನ ವ್ಯಕ್ತಪಡಿಸಿ ಸಿಎಂ ನಿವಾಸದಿಂದ ಕತ್ತಿ ಹೊರ ನಡೆದಿದ್ದಾರೆ.

ಡಾಲರ್ಸ್ ಕಾಲೋನಿಯಲ್ಲಿರುವ ಸಿಎಂ ನಿವಾಸದಲ್ಲಿ ಯಡಿಯೂರಪ್ಪ ಎದುರೇ ಉಮೇಶ್ ಕತ್ತಿ - ಲಕ್ಷ್ಮಣ್ ಸವದಿ ಜಟಾಪಟಿ ನಡೆದಿದೆ. ಪರಸ್ಪರ ಜೋರು ಮಾತುಗಳಿಂದ ಆರೋಪ ಪ್ರತ್ಯಾರೋಪ ಮಾಡಿಕೊಂಡಿದ್ದಾರೆ. ಕತ್ತಿಗೆ ಸಚಿವ ಸ್ಥಾನ ತಪ್ಪಿದ್ದು ನನಗೆ ಸಂಬಂಧಸಿದ್ದಲ್ಲ, ಹೈಕಮಾಂಡ್ ನನ್ನ ಕೆಲಸ ಗುರುತಿಸಿ ಮಂತ್ರಿ ಮಾಡಿದ್ದಾರೆ, ನನ್ನ ವಿಚಾರಕ್ಕೆ ಯಾಕ್ ಬರ್ತೀರ ಎಂದು ಸಚಿವ ಸವದಿ ಕತ್ತಿಗೆ ಕೇಳಿದ್ದಾರೆ. ಸವದಿ ಮಾತಿಂದ ಸಿಟ್ಟಾದ ಉಮೇಶ್ ಕತ್ತಿ, ಎಲ್ಲ ನಿನ್ನಿಂದಲೇ ಆಗಿದ್ದು ಹೈಕಮಾಂಡ್ ನಲ್ಲಿ ಲಾಬಿ ಮಾಡಿ ಸಚಿವ ಸ್ಥಾನ ಗಿಟ್ಟಿಸಿದ್ದೀಯ, ನಿನ್ನ ಹಾಗೆ ಇನ್ನೊಬ್ಬರ ಶಿಫಾರಸ್ಸಿನ ಮಂತ್ರಿಗಿರಿ ನಾನು ಕೇಳಲ್ಲ ಎಂದು ಸವದಿ ವಿರುದ್ಧ ಸಿಟ್ಟಲ್ಲಿ ವಾಗ್ದಾಳಿ ನಡೆಸಿದರು.

ಸಚಿವ ಸ್ಥಾನ ವಂಚಿತಗೊಂಡು ತೀವ್ರ ಅಸಮಧಾನಗೊಂಡಿರುವ ಬಿಜೆಪಿ ಹಿರಿಯ ನಾಯಕ ಉಮೇಶ್ ಕತ್ತಿಗೆ ಸಚಿವ ಸ್ಥಾನ ನೀಡುವ ಮೂಲಕ ಸದ್ಯಕ್ಕೆ ಬಿಜೆಪಿಯಲ್ಲಿ‌ ಎದ್ದಿರುವ ಅಸಮಧಾನವನ್ನು ನಿಯಂತ್ರಿಸಲು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಚಿಂತನೆ ನಡೆಸಿದ್ದರು. ಆದರೆ ಸಂಧಾನದಲ್ಲಿ ಇಬ್ಬರನ್ನೂ ಸಮಾಧಾನ ಮಾಡಲು ಹೈರಾಣಾದ ಸಿಎಂ ಮನವೊಲಿಕೆ ಮಾಡುವಲ್ಲಿ ವಿಫಲರಾದರು. ಕೊನೆಗೆ ಏನಾದ್ರೂ ಮಾಡಿಕೊಳ್ಳಿ ನನ್ನ ದಾರಿ ನನಗೆ ಎಂದು ಕತ್ತಿ ಸಿಟ್ಟಿನಿಂದ ಹೊರಟರು ಎನ್ನಲಾಗಿದೆ.

ಯಡಿಯೂರಪ್ಪ ನಿವಾಸದಿಂದ ಸಿಟ್ಟಿಂದ ಹೊರಬಂದ ಉಮೇಶ್ ಕತ್ತಿ, ಸಂಪುಟ ಸೇರ್ಪಡೆ ಬಗ್ಗೆ ಪ್ರತಿಕ್ರಿಯೆ ಕೇಳಿದರೆ, ನಿಮ್ಮನ್ನು ಕೇಳಿ ಸೇರಿಸ್ತಾರಂತೆ ಎಂದು ಹೇಳಿ ಮಾಧ್ಯಮಗಳ ವಿರುದ್ಧವೂ ಸಿಟ್ಟಿನಿಂದಲೇ ಮಾತನಾಡಿ ತೆರಳಿದರು. ಇದೆಲ್ಲವೂ ಕತ್ತಿ ಜೊತೆ ಬಿಎಸ್​ವೈ ಸಂಧಾನ ಮಾತುಕತೆ ವಿಫಲವಾಯ್ತಾ? ಎನ್ನುವುದಕ್ಕೆ ಪುಷ್ಟಿ ನೀಡುವಂತಿದೆ.