ಬಳ್ಳಾರಿ: ಕ್ವಾರಂಟೈನ್​​ ಕೇಂದ್ರದ ಗೋಡೆ ಹಾರಿ ಇಬ್ಬರು ಪರಾರಿ!

ಬಳ್ಳಾರಿ ತಾಲೂಕಿನ ಯರ್ರಗುಡಿ ಹೊರ ವಲಯದ ಮೂರಾರ್ಜಿ ದೇಸಾಯಿ ವಸತಿ ಶಾಲೆಯಲ್ಲಿ ಕ್ವಾರಂಟೈನ್​ನಲ್ಲಿದ್ದ ಇಬ್ಬರು ಪರಾರಿಯಾಗಿದ್ದಾರೆ.

ಬಳ್ಳಾರಿ:ತಾಲೂಕಿನ ಯರ್ರಗುಡಿ ಹೊರ ವಲಯದ ಮೂರಾರ್ಜಿ ದೇಸಾಯಿ ವಸತಿ ಶಾಲೆಯಲ್ಲಿ ಕ್ವಾರಂಟೈನ್​ನಲ್ಲಿದ್ದ ಇಬ್ಬರು ಪರಾರಿಯಾಗಿದ್ದಾರೆ.

ನೆರೆಯ ಆಂಧ್ರ ಪ್ರದೇಶದ ಕಣೇಕಲ್ ಮಂಡಲದ ಯರ್ರಗುಂಟ್ಲ ಗ್ರಾಮದ ಮುನಿಸ್ವಾಮಿ, ಹೊನ್ನೂರಸ್ವಾಮಿ ಪರಾರಿಯಾಗಿರುವ ವ್ಯಕ್ತಿಗಳೆಂದು ಗುರುತಿಸಲಾಗಿದೆ. ಕಳೆದ ಕೆಲ ದಿನಗಳ ಹಿಂದೆ ತಾಲೂಕಿನ ಅಮರಾಪುರ ಗ್ರಾಮದಲ್ಲಿ ನಡೆದಿದ್ದ ಮದುವೆ ಸಮಾರಂಭಕ್ಕೆ ಇವರಿಬ್ಬರು ಅನುಮತಿಯನ್ನು ಪಡೆಯದೆ ಆಗಮಿಸಿದ್ದರು.

ಈ ವಿಷಯ ತಿಳಿದ ಆರ್ ​ಆರ್ ತಂಡದ ಮುಖ್ಯಸ್ಥ ಹಾಗೂ ತಹಶೀಲ್ದಾರ್​ ಯು.ನಾಗರಾಜ ಅವರ ತಂಡ ಮದುವೆ ಮನೆಗೆ ನುಗ್ಗಿ ವಧು-ವರ ಸೇರಿದಂತೆ ಅನೇಕ ಜನರನ್ನು ಹೊಸ ಯರ್ರಗುಡಿ ಗ್ರಾಮ ಹೊರವಲಯದ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯಲ್ಲಿ ಕ್ವಾರಂಟೈನ್ ಮಾಡಿದ್ದರು. ಇಲ್ಲಿರಲು ಸಾಧ್ಯವಾಗದೆ ಈ ಇಬ್ಬರು ವಸತಿ ನಿಲಯದ ಕಂಪೌಂಡ್​ ಹಾರಿ ಪರಾರಿಯಾಗಿದ್ದಾರೆ. ಈ ಸಂಬಂಧ ಮೋಕಾ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.