ಕ್ವಾರಂಟೈನ್​ ಮಾಡ್ತೀರಾ ಅಂತ ಗೊತ್ತಿದ್ರೆ ಬರ್ತಿರ್ಲಿಲ್ಲ... ಅಧಿಕಾರಿಗಳ ವಿರುದ್ಧ ಪ್ರಯಾಣಿಕರ ಆಕ್ರೋಶ

ದೆಹಲಿಯಿಂದ ಇಂದು ಬೆಳಿಗ್ಗೆ ಬೆಂಗಳೂರಿಗೆ ಶ್ರಮಿಕ್​ ರೈಲಿನಲ್ಲಿ ಆಗಮಿಸಿರುವ ಪ್ರಯಾಣಿಕರು ಕ್ವಾರಂಟೈನ್​ನಲ್ಲಿ ಇರಲು ಒಪ್ಪದೇ ತಕರಾರು ತೆಗೆದಿದ್ದಾರೆ.

ಬೆಂಗಳೂರು: ದೆಹಲಿಯಿಂದ ಮೆಜೆಸ್ಟಿಕ್ ರೈಲ್ವೆ ನಿಲ್ದಾಣಕ್ಕೆ ಶ್ರಮಿಕ್ ರೈಲು ಆಗಮನ ಹಿನ್ನೆಲೆ, ರೈಲಿನಲ್ಲಿ ಬಂದವರನ್ನ ಕ್ವಾರಂಟೈನ್ ಮಾಡಲು ಜಿಲ್ಲಾಡಳಿತ ಹಾಗೂ ಪೊಲೀಸರು ಮುಂದಾಗಿದ್ದು ಬಹುತೇಕ ಮಂದಿ ಆಕ್ರೋಶ ಹೊರಹಾಕಿದ್ದಾರೆ.

ಎಂಟ್ರಿ ಮತ್ತು ಎಕ್ಸಿಟ್​ ಗೇಟ್​ಗಳಲ್ಲಿ ಬ್ಯಾರಿಕೇಡ್ ಹಾಕಿ ಬಿಗಿ ಪೊಲೀಸ್ ಭದ್ರತೆ ಕೈಗೊಂಡಿರುವ ಪೊಲೀಸರು ಬಿಎಂಟಿಸಿ ಬಸ್​ಗಳ ಮೂಲಕ ನಿಗದಿತ ಹೋಟೆಲ್​ಗಳಿಗೆ ಕ್ವಾರಂಟೈನ್​ಗೆ ಕರೆದುಕೊಂಡು ‌ಹೋಗಲಿದ್ದಾರೆ.

ಆದರೆ ರೈಲಿನಲ್ಲಿ ಬಂದವರು ಆಕ್ರೋಶ ಹೊರ ಹಾಕಿ, ದೆಹಲಿಯಿಂದ ಬರುವಾಗಲೇ ಟ್ರೈನ್ ನಲ್ಲಿ ಕುಡಿಯೋಕೆ ನೀರಿಲ್ಲ. ಟಾಯ್ಲೆಟ್​ನಲ್ಲಿ ನೀರು ಇರಲಿಲ್ಲ. ಇದೀಗ ಕ್ವಾರೆಂಟೈನ್ ಅಂತಿದ್ದಾರೆ. ದೆಹಲಿಯಿಂದ ಇಲ್ಲಿಗೆ ಬರುವ ತನಕ ಹಿಂಸೆಯಾಗಿದೆ. ಊಟ ತಿಂಡಿ ಬಗ್ಗೆ ಕೇಳಲೇಬೇಡಿ, ಕ್ವಾರೆಂಟೈನ್ ಮಾಡ್ತಾರೆ ಅಂತಾ ಗೊತ್ತೆ ಇರಲಿಲ್ಲ‌. ನಾವು ಬಡವರು ಹೋಟೆಲ್​ಗೆ 1,800 ,2000 ಕೇಳ್ತಿದ್ದಾರೆ ಎಲ್ಲಿಂದ ತರುವುದು ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಅಲ್ಲದೇ ದೆಹಲಿಯಿಂದ ವಾಪಸಾದವರಲ್ಲಿ ಯುಪಿಎಸ್​ಸಿ ವಿದ್ಯಾರ್ಥಿಗಳು ಇದ್ದು ಅವರು ಈ ಹಿಂದೆಯೇ ವೀಡಿಯೋ ಮಾಡಿ ವಾಪಸ್ ಕರೆಸಿಕೊಳ್ಳುವಂತೆ ಕೇಳಿಕೊಂಡಿದ್ದರು. ತುರ್ತಾಗಿ ಕೆಲಸಕ್ಕಾಗಿ ನಾವು ಬೆಂಗಳೂರಿಗೆ ಬಂದಿದ್ದೀವಿ ಹಾಗಾಗಿ ಕ್ವಾರಂಟೈನ್​ನಲ್ಲಿ ಇರಲು ಸಾಧ್ಯವಿಲ್ಲ ಎಂದು ಹೇಳುತ್ತಿದ್ದಾರೆ.

ಇನ್ನೂ ನಮ್ಮ ಕಾಸು ಕೊಟ್ಟು ನಾವು ಕ್ವಾರೆಂಟೈನ್ ಯಾಕಾಗಬೇಕು? ನಾವು ಕ್ವಾರೆಂಟೈನ್ ಆಗೋದಿಲ್ಲ. ನೀವು ಕ್ವಾರೆಂಟೈನ್ ಮಾಡ್ತೀರಿ ಅಂದಿದ್ರೆ ನಾವು ಬರ್ತಾನೆ ಇರಲಿಲ್ಲ ಎಂದು ಅಧಿಕಾರಿಗಳ ಜೊತೆ ವಾಗ್ವಾದ ಮಾಡಿದ್ದಾರೆ‌. ಈ ವೇಳೆ ಬಿಬಿಎಂಪಿ ಅಧಿಕಾರಿಗಳು ಮತ್ತು ಪೊಲೀಸರು ಮನವೊಲಿಕೆ ಕಾರ್ಯ ಮಾಡಿದ್ದಾರೆ.