ಒಂದೇ ನಂಬರ್​​​​ನಲ್ಲಿ ಎರಡು ಬಸ್​ಗಳ ಓಡಾಟ.. ಜಪ್ತಿ ಮಾಡಿದ ಆರ್​​ಟಿಒ

ಸಂಚಾರ‌ ನಿಯಮಗಳನ್ನು ಉಲ್ಲಂಘಿಸಿ ಹಾಗೂ ಒಂದೇ ನಂಬರ್ ಬಸ್​​​ಗಳು ಪತ್ತೆಯಾದ ಕಾರಣ ಪೊಲೀಸರು ಆರ್​​​​ಟಿಒ ಅವರಿಗೆ ಮಾಹಿತಿ ತಿಳಿಸಿದ್ದಾರೆ. ಹೀಗಾಗಿ ಕಾರ್ಯಾಚರಣೆ ಮಾಡಿ ಎರಡು ಬಸ್​​​​ಗಳನ್ನ ಜಪ್ತಿ ಮಾಡಲಾಗಿದೆ.

ಬೆಂಗಳೂರು: ಮೋಟಾರು ವಾಹನ ತೆರಿಗೆ ಪಾವತಿ ಕಟ್ಟುವುದರಿಂದ ಬಚಾವಾಗಲು ಎರಡು ಖಾಸಗಿ ಬಸ್​​​​ಗಳು ಒಂದೇ ನಂಬರ್ ಬಳಕೆ ಮಾಡಿದ ಪ್ರಕರಣ ಬೆಳಕಿಗೆ ಬಂದಿದೆ. ಈ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ಸಾರಿಗೆ ಇಲಾಖೆಯ ಅಧಿಕಾರಿಗಳ ದಾಳಿ ಕಾರ್ಯಾಚರಣೆ ನಡೆಸಿದ್ದಾರೆ. ಆರ್‌ಟಿಒ ಇನ್ಸ್​​​​ಪೆಕ್ಟರ್ ರಾಜಣ್ಣ ನೇತೃತ್ವದಲ್ಲಿನ ತಂಡ ದಾಳಿ ಮಾಡಿ ನಾಗರಬಾವಿ ಬಳಿ ಒಂದೇ ನಂಬರ್​​​ನ ಎರಡು ಬಸ್​​​​​ಗಳನ್ನು ಹಿಡಿದಿದ್ದಾರೆ.

ನಗರದ ನಾಗರಬಾವಿಯ ಬಳಿ ಭಾರತಿ ಹೆಸರಿನ KA-51-C-717 ಎಂಬ ಸಂಖ್ಯೆಯ ಬಸ್​​​​​ಗಳು ಒಂದೇ ರೀತಿ ನಂಬರ್ ಅಳವಡಿಕೆ ಮಾಡಿ ನಗರದ ಹಲವೆಡೆ ಓಡಾಟ ನಡೆಸಿದ್ದವು. ಈ ವೇಳೆ ಸಂಚಾರ‌ ನಿಯಮಗಳನ್ನು ಉಲ್ಲಂಘಿಸಿ ಹಾಗೂ ಒಂದೇ ನಂಬರ್ ಬಸ್​​​ಗಳು ಪತ್ತೆಯಾದ ಕಾರಣ ಪೊಲೀಸರು ಆರ್​​​​ಟಿಒ ಅವರಿಗೆ ಮಾಹಿತಿ ತಿಳಿಸಿದ್ದಾರೆ. ಹೀಗಾಗಿ ಕಾರ್ಯಾಚರಣೆ ಮಾಡಿ ಎರಡು ಬಸ್​​​​ಗಳನ್ನ ಜಪ್ತಿ ಮಾಡಲಾಗಿದೆ.

ಈ ಕುರಿತು ಆರ್​​​ಟಿಒ ಇನ್ಸ್​​​​ಪೆಕ್ಟರ್ ರಾಜಣ್ಣ ಮಾತನಾಡಿ, ನಗರದಲ್ಲಿ ಎರಡು ಬಸ್​​​​ಗಳು ಒಂದೇ ನಂಬರ್ ಅಳವಡಿಕೆ ಮಾಡಿ ಓಡಾಟ ಮಾಡ್ತಿರುವ ಮಾಹಿತಿ ಲಭ್ಯವಾಗಿತ್ತು. ಹೀಗಾಗಿ ನಮ್ಮ ಹಿರಿಯಾಧಿಕಾರಿಗಳ ಸೂಚನೆ ಮೇರೆಗೆ ಕಾರ್ಯಾಚರಣೆಗಿಳಿದಾಗ, ತೆರಿಗೆ ಕಟ್ಟದೇ ಆರ್​​​ಟಿಒ ಇಲಾಖೆಗೆ ಮೋಸ ಮಾಡಿರುವ ವಿಚಾರ ಬೆಳಕಿಗೆ ಬಂದಿದೆ ಎಂದರು.

ಹೀಗಾಗಿ ಎರಡು ಬಸ್​​​​​ಗಳನ್ನ ಜಪ್ತಿ ಮಾಡಿ ನಮ್ಮ ವಶಕ್ಕೆ ಪಡೆದಿದ್ದೇವೆ ಎಂದು ತಿಳಿಸಿದ್ದಾರೆ. ಹಾಗೆ ಬಸ್​​​​ಗಳ‌ ಮಾಲೀಕರು ಯಾರು ಅನ್ನೋದರ ಬಗ್ಗೆ ತನಿಖೆ ಮುಂದುವರೆಸಲಾಗಿದೆ. ಈವರೆಗೆ ಯಾರೂ ಅಧಿಕೃತ ಮಾಲೀಕರು ಬಂದಿಲ್ಲ ಎಂದರು.