ನಾಳೆಯಿಂದ ಸಾರಿಗೆ ಸಂಚಾರ ಆರಂಭ: ಹೇಗಿರಲಿದೆ ನೂತನ ವ್ಯವಸ್ಥೆ!?

ಕಳೆದ 54 ದಿನಗಳ ಬಳಿಕ ರಾಜ್ಯದಲ್ಲಿ ಸಾರ್ವಜನಿಕ ಸಾರಿಗೆ ಪುನಾರಂಭ ಆಗುತ್ತಿದೆ. ಸರ್ಕಾರ ನೀಡಿರುವ ಮಾರ್ಗಸೂಚಿ ಅನ್ವಯ, ಹಲವು ಷರತ್ತುಗಳ ಮೇಲೆ ಕೆ.ಎಸ್.ಆರ್.ಟಿ.ಸಿ ಮತ್ತು ಬಿ.ಎಂ.ಟಿ.ಸಿ ಬಸ್ ಸಂಚಾರ ನಾಳೆ ಬೆಳಗ್ಗೆ 7 ರಿಂದ ಸಂಜೆ 7 ವರೆಗೆ ಕಾರ್ಯಾಚರಣೆ ಮಾಡಲಿದೆ.

ಬೆಂಗಳೂರು: ಕೊರೊನಾ ನಿಯಂತ್ರಣಕ್ಕೆ ಇಂದಿನಿಂದ ಲಾಕ್​ಡೌನ್ 4.0 ಜಾರಿಯಾಗಿದೆ. ಕೇಂದ್ರ ಸರ್ಕಾರ ಮಾರ್ಗಸೂಚಿ ಅನ್ವಯ, ರಾಜ್ಯದಲ್ಲಿ ನಾಳೆಯಿಂದ ಹಲವು ಷರತ್ತುಗಳ ವಿಧಿಸಿ ಸಾರ್ವಜನಿಕ ಸಾರಿಗೆ ಸಂಚಾರಕ್ಕೆ ಗ್ರೀನ್ ಸಿಗ್ನಲ್ ಸಿಕ್ಕಿದೆ.

ನಾಳೆಯಿಂದ ಸಾರಿಗೆ ಸಂಚಾರ ಆರಂಭ

ನಾಳೆ ಬೆಳಗ್ಗೆಯಿಂದ ಸಾರಿಗೆ ಸಂಚಾರ ನಡೆಸೋಕೆ ಸಾರಿಗೆ ನಿಗಮಗಳು ಸಕಲ ಸಿದ್ಧತೆ ನಡೆಸಿದ್ದು, ರೆಡ್ ಝೋನ್ ಮತ್ತು ಕಂಟೈನ್ಮೆಂಟ್ ಝೋನ್​ನಲ್ಲಿ ಬಸ್​ಗೆ ನಿರ್ಬಂಧ ಹಾಕಲಾಗಿದೆ. ಕಳೆದ 54 ದಿನಗಳ ಬಳಿಕ ರಾಜ್ಯದಲ್ಲಿ ಸಾರ್ವಜನಿಕ ಸಾರಿಗೆ ಪುನಾರಂಭ ಆಗುತ್ತಿದೆ. ಸರ್ಕಾರ ನೀಡಿರುವ ಮಾರ್ಗಸೂಚಿ ಅನ್ವಯ, ಹಲವು ಷರತ್ತುಗಳ ಮೇಲೆ ಕೆ.ಎಸ್.ಆರ್.ಟಿ.ಸಿ ಮತ್ತು ಬಿ.ಎಂ.ಟಿ.ಸಿ ಬಸ್ ಸಂಚಾರ ನಾಳೆ ಬೆಳಗ್ಗೆ 7 ರಿಂದ ಸಂಜೆ 7 ವರೆಗೆ ಕಾರ್ಯಾಚರಣೆ ಮಾಡಲಿದೆ. ಅದು ಕೂಡ ಕೇವಲ ರಾಜ್ಯದ ಒಳಗೆ ಮಾತ್ರ. ಹೊಸ ಮಾರ್ಗಸೂಚಿ ಅನ್ವಯ ಬಿ.ಎಂ.ಟಿ.ಸಿ, ಕೆ.ಎಸ್.ಆರ್.ಟಿ.ಸಿ, ನೈರುತ್ಯ, ಈಶಾನ್ಯ ಸಾರಿಗೆ ಸಂಸ್ಥೆ ಕಾರ್ಯನಿರ್ವಹಿಸಲಿದೆ. ಇದರ ಜೊತೆಗೆ ಖಾಸಗಿ ಬಸ್​ಗಳ ಓಡಾಟಕ್ಕೂ ಅನುಮತಿ ಸಹ ನೀಡಲಾಗಿದೆ.

ಯಾವೆಲ್ಲ ಬಸ್​ಗಳ ಸಂಚಾರ ಇರಲಿದೆ:

ಕೆ.ಎಸ್.ಆರ್.ಟಿ.ಸಿ ಕರ್ನಾಟಕ ಸಾರಿಗೆ ಹಾಗೂ ರಾಜಹಂಸ ಬಸ್ ಮಾತ್ರ ಓಡಾಡಲು ಅವಕಾಶ ಕಲ್ಪಿಸಲಾಗಿದೆ. ಎಸಿ ಸ್ಲೀಪರ್- ನಾನ್ ಎಸಿ‌ ಸ್ಲೀಪರ್ ಬಸ್​ಗಳ‌ ಓಡಾಟ ಇರುವುದಿಲ್ಲ. ಬೇಡಿಕೆಗೆ ತಕ್ಕಂತೆ ಕೆ.ಎಸ್.ಆರ್.ಟಿ.ಸಿ ಬಸ್​ಗಳು ಸಂಚಾರ ಮಾಡಲಿವೆ. ಇನ್ನು ಬೆಂಗಳೂರಿನಲ್ಲಿ 2000 ಬಿಎಂಟಿಸಿ ಬಸ್​ಗಳು ಮಾತ್ರ ಓಡಾಟ ಮಾಡಲಿವೆ. ಒಂದು ಬಸ್​ನಲ್ಲಿ 30 ಪ್ರಯಾಣಿಕರಿಗೆ ಮಾತ್ರ ಕೂರಲು ಅವಕಾಶ ಕಲ್ಪಿಸಲಾಗಿದೆ.

ಬಸ್​ನಲ್ಲಿ ಯಾರಿಗೆಲ್ಲ ನಿರ್ಬಂಧ:

ಬಸ್​ನಲ್ಲಿ ಸಾಮಾಜಿಕ ಅಂತರ ಕಡ್ಡಾಯ ಪಾಲಿಸಲೇಬೇಕು. ಇದಕ್ಕಾಗಿ ಈಗಾಗಲೇ ಎಲ್ಲ ನಿಲ್ದಾಣಗಳಲ್ಲಿ ಅಂತರ ಬಾಕ್ಸ್​ಗಳನ್ನ ಹಾಕಲಾಗಿದೆ. ಕಂಡಕ್ಟರ್ ಹಾಗೂ ಡ್ರೈವರ್ ಮಾಸ್ಕ್ ಧರಿಸಿ ಕರ್ತವ್ಯ ಮಾಡಬೇಕು.‌ ಮಾರ್ಗ ಮಧ್ಯೆ ಪ್ರಯಾಣಿಕರನ್ನ ಹತ್ತಿಸಿಕೊಳ್ಳಬಾರದು. 65 ವರ್ಷ ಮೇಲ್ಟಟ್ಟವರು, ಗರ್ಭಿಣಿ, ಹಾಗೂ ಮಕ್ಕಳಿಗೆ ಬಸ್ ಪ್ರಯಾಣ ನಿರ್ಬಂಧ ಹೇರಲಾಗಿದೆ. ಸಾರಿಗೆ ನೌಕರರು ಯಾವುದೇ ವ್ಯಕ್ತಿಯೊಂದಿಗೆ ವ್ಯವಹಾರಿಸುವಾಗ ಆರು ಅಡಿ ಸಾಮಾಜಿಕ ಅಂತರ ಕಡ್ಡಾಯ ಮಾಡಲಾಗಿದೆ.

ಸಿಬ್ಬಂದಿ ವೈಯಕ್ತಿಕ ಶುಚಿತ್ವಕ್ಕೆ ಆದ್ಯತೆ:

ಸಾರಿಗೆ ಸಿಬ್ಬಂದಿ ಕರ್ವವ್ಯ ನಿರ್ವಹಣೆ ಸಂದರ್ಭದಲ್ಲಿ ಪ್ರತಿಯೊಬ್ಬ ವೈಯಕ್ತಿಕ ಶುಚಿತ್ವಕ್ಕೆ ಮೊದಲ ಆದ್ಯತೆ ಕೊಡಬೇಕು. ಪ್ರತಿಯೊಬ್ಬರೂ ಮಾಸ್ಕ್ ಧರಿಸಬೇಕು. ಕರ್ತವ್ಯಕ್ಕೆ ಹಾಜರಾಗುವ ಪ್ರತಿಯೊಬ್ಬ ಸಿಬ್ಬಂದಿಯನ್ನು ಪ್ರವೇಶ ದ್ವಾರದ ಬಳಿಯೇ ಥರ್ಮಲ್ ಟೆಸ್ಟಿಂಗ್​ಗೆ ಒಳಪಡಿಸಬೇಕು. ಸಾರಿಗೆ ನೌಕರರು ಯಾವುದೇ ವ್ಯಕ್ತಿಯೊಂದಿಗೆ ವ್ಯವಹರಿಸುವಾಗ ಕನಿಷ್ಠ ಆರು ಅಡಿ ಸಾಮಾಜಿಕ ಅಂತರವನ್ನು ಪಾಲಿಸಬೇಕು. ಎಲ್ಲಾ ಶಾಖೆಗಳಲ್ಲೂ ಸ್ಯಾನಿಟೈಸರ್ ಅಥವಾ ಸೋಪ್ ವ್ಯವಸ್ಥೆ ಕಲ್ಪಿಸಬೇಕು.

ಸಂಚಾರಕ್ಕೂ ಮುನ್ನ ಬಸ್​ ಕ್ಲೀನ್​ ಆಗಿರಬೇಕು:

ಬಸ್​ಗಳು ಡಿಪೋದಿಂದ ಹೊರಗೆ ಬರುವ ಮೊದಲು ಸಂಪೂರ್ಣ ಸ್ವಚ್ಛವಾಗಿ ಇರಬೇಕು. ಪ್ರತಿ ಟ್ರಿಪ್ ಆದ ಮೇಲೆ ರಾಸಾಯನಿಕ ಸಿಂಪಡಣೆ ಮಾಡಿ ಬಸ್ ಮತ್ತೆ ಸಂಚಾರ ಆರಂಭಿಸಬೇಕು.

ನಾಳೆಯಿಂದ ಸಾರಿಗೆ ಸಂಚಾರ ಆರಂಭ

ಟಿಕೆಟ್ ವಿತರಣೆ ಹೇಗೆ:

ಬಿಎಂಟಿಸಿಯಲ್ಲಿ 6,500 ಬಸ್​ಗಳು ಇದ್ದು, ನಾಳೆಯಿಂದ 2000 ಬಿಎಂಟಿಸಿ ಬಸ್ ಸಂಚಾರ ಮಾತ್ರ ಇರಲಿದೆ. ನಗರದಲ್ಲಿ ಎಸಿ ವೋಲ್ವೋ ಬಸ್ ಸಂಚಾರ ನಡೆಸುವುದಿಲ್ಲ. ಬೆಳಗ್ಗೆ 7 ರಿಂದ ಸಂಜೆ 7 ಗಂಟೆಯವರಿಗೆ ಮಾತ್ರ ಬಸ್ ಕಾರ್ಯಾಚರಣೆ ಆಗಲಿದೆ. ಇನ್ನು ಟಿಕೆಟ್​ಗಾಗಿ ಇಟಿಎಂ ಮಷಿನ್, ತಿಂಗಳ ಪಾಸ್ ಹಾಗೂ ದಿನ ಪಾಸ್​ಗೆ ಅವಕಾಶ ಕಲ್ಪಿಸಲಾಗಿದೆ.

ಕ್ವಾರಂಟೈನ್ ಇಲ್ಲ:

ಬೇರೆ ಜಿಲ್ಲೆಗಳಿಗೆ ಪ್ರಯಾಣಿಸುವ ಪ್ರಯಾಣಿಕರಿಗೆ ಕ್ವಾರಂಟೈನ್ ಮಾಡುವುದಿಲ್ಲ.‌ ರೋಗ ಲಕ್ಷಣಗಳು ಇಲ್ಲದವರಿಗೆ ಕ್ವಾರಂಟೈನ್ ಇರುವುದಿಲ್ಲ.