ಬೆಂಗಳೂರು:ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ಟೊಮೆಟೊ ಬೆಲೆ ಗಗನಕ್ಕೇರಿದೆ. ತಿಂಗಳ ಹಿಂದೆ ಕೇವಲ ಕೆ.ಜಿಗೆ 20 ರೂ.ಗೆ ಒಂದು ಕೆ.ಜಿ. ಸಿಗುತ್ತಿದ್ದ ಟೊಮೆಟೊ ಇದೀಗ 80ರಿಂದ 100 ರೂ.ಗೆ ಜಿಗಿದಿದೆ. ಮಹಾನಗರದ ವಿವಿಧ ಮಾರುಕಟ್ಟೆಗಳಲ್ಲಿ ಟೊಮೆಟೊ 80 ರೂ.ಗೆ ಸಗಟು ಹಾಗೂ 100 ರೂ.ಗೆ ಚಿಲ್ಲರೆ ರೂಪದಲ್ಲಿ ಲಭಿಸುತ್ತಿದೆ.
ಬೆಂಗಳೂರು ಹೊರವಲಯದ ಮಳಿಗೆ ಹಾಗೂ ತಳ್ಳುಗಾಡಿಗಳಲ್ಲಿ ತರಕಾರಿ ಮಾರುವ ವ್ಯಾಪಾರಿಗಳು ಕೆಜಿಗೆ 100 ರೂ.ನಂತೆ ಟೊಮೆಟೊ ಮಾರಾಟ ಮಾಡುತ್ತಿದ್ದಾರೆ. ನಗರದ ಕೆಲವು ತರಕಾರಿ ವ್ಯಾಪಾರಿಗಳು ನಿನ್ನೆ, ಮೊನ್ನೆಯವರೆಗೂ ಕೆ.ಜಿಗೆ 60 ರೂಪಾಯಿಯಂತೆ ಮಾರಾಟ ಮಾಡಿದ್ದರು. ಆದರೆ ಇಂದು ಅವರು 70 ರಿಂದ 80 ರೂ. ಹೇಳುತ್ತಿದ್ದಾರೆ. ಒಂದೆರಡು ದಿನಗಳಲ್ಲಿ ಬೆಲೆ ಇನ್ನಷ್ಟು ಹೆಚ್ಚಳವಾಗುವ ಸಾಧ್ಯತೆ ಇದೆ ಎಂದು ವ್ಯಾಪಾರಿಗಳು ಹೇಳುತ್ತಾರೆ.
ಬೆಲೆ ಏರಿಕೆಗೆ ಕಾರಣಗಳೇನು? :ಸಕಾಲಕ್ಕೆ ಬಾರದ ಮಳೆ, ಅಕ್ಕಪಕ್ಕದ ರಾಜ್ಯಗಳಿಂದ ಸಮರ್ಪಕವಾಗಿ ತರಕಾರಿ ಪೂರೈಕೆಯಾಗದ ಹಿನ್ನೆಲೆಯಲ್ಲಿ ಟೊಮೆಟೊ ಬೆಲೆಯಲ್ಲಿ ದಿಢೀರ್ ಹೆಚ್ಚಳವಾಗಿದೆ. ಸಾಕಷ್ಟು ರೈತರಿಗೆ ಟೊಮೆಟೊ ಬೆಳೆ ಹಿಂದೆ ಕಹಿ ಅನುಭವ ನೀಡಿದೆ. ಬೆಲೆ ಸರಿಯಾಗಿ ಸಿಗದೇ ರಸ್ತೆಗೆ ಸುರಿದಿದ್ದನ್ನು ಕಂಡಿದ್ದೇವೆ. ಹಂತಹಂತವಾಗಿ ಬೆಂಗಳೂರು ಸುತ್ತಮುತ್ತಲಿನ ತರಕಾರಿ ಬೆಳೆಯುವ ರೈತರು ಹೂವು ಬೆಳೆಯುವತ್ತ ಹೆಚ್ಚು ಆಸಕ್ತಿ ತೋರಿಸುತ್ತಿರುವುದು ಟೊಮೆಟೊ ಪೂರೈಕೆಯ ಕೊರತೆಗೆ ಕಾರಣವಾಗಿದೆ.
ಇದರ ಜೊತೆಗೆ, ಬಿಳಿ ನೊಣ ಕಾಟ ಹಾಗೂ ಹವಾಮಾನ ವೈಪರೀತ್ಯದಿಂದಲೂ ಟೊಮೆಟೊ ಬೆಲೆ ದಿಢೀರ್ ಏರಿಕೆಯಾಗಿದೆ. ಶನಿವಾರದ ಮಾರುಕಟ್ಟೆಯಲ್ಲಿ 15 ಕೆ.ಜಿ ತೂಕದ ಒಂದು ಬಾಕ್ಸ್‌ ಸುಮಾರು 1,100 ರೂ.ಗೆ ಮಾರಾಟವಾಗುವ ಮೂಲಕ ಟೊಮೆಟೊ ಬೆಳೆಗಾರರಲ್ಲಿ ಕೊಂಚ ಹರ್ಷ ಮೂಡಿಸಿತ್ತು. ಆದರೆ, ಹೊಸ ಟೊಮೆಟೊ ಬೆಳೆ ಬರುವವರೆಗೂ ಸಮಸ್ಯೆ ಹೀಗೆಯೇ ಇರಲಿದೆ.
ಏಷ್ಯಾ ಖಂಡದಲ್ಲೇ ಅತಿ ದೊಡ್ಡ ಟೊಮೆಟೊ ಮಾರುಕಟ್ಟೆ ಎನಿಸಿರುವ ಕೋಲಾರದ ಮಾರುಕಟ್ಟೆಯಲ್ಲಿ 15 ಕೆ.ಜಿ ಟೊಮೆಟೊದ ಒಂದು ಕ್ರೇಟ್ ನಿನ್ನೆ 1,300 ರೂಪಾಯಿವರೆಗೂ ಮಾರಾಟವಾಗಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಇನ್ನೂ ಹೆಚ್ಚಿನ ಬೆಲೆಗೆ ಮಾರಾಟ ಮಾಡಲಾಗುತ್ತದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ಉತ್ಪಾದನೆ ಕಡಿಮೆಯಾಗಿದ್ದು ಬೆಲೆ ಏರಿಕೆಯಾಗುತ್ತಿದೆ ಎಂಬ ಮಾಹಿತಿಯೂ ಇದೆ. ಮುಂಗಾರು ಮಳೆ ಸರಿಯಾಗಿ ಬಾರದ ಕಾರಣ ಶೇ 30ರಷ್ಟು ಬೆಲೆ ನಾಶವಾಗಿದೆ.