ಸಿಲಿಕಾನ್​ ಸಿಟಿಯಲ್ಲಿ ಶ್ರೀಮಂತರ ದರ್ಬಾರ್​: ಸ್ವಲ್ಪ ಮಿಸ್​​ ಆದರೂ ಹಾರಿ ಹೋಗುತ್ತೆ ಅಮಾಯಕರ ಪ್ರಾಣ ಪಕ್ಷಿ

ಬೆಂಗಳೂರು ನಗರ ಅಭಿವೃದ್ಧಿಯಾದಂತೆ, ನಗರದಲ್ಲಿನ ಶ್ರೀಮಂತರ ಮಕ್ಕಳ ಉಪಟಳವೂ ಹೆಚ್ಚಾಗುತ್ತಿದೆ. ಐಷಾರಾಮಿ ಕಾರು ಓಡಿಸುವ ಅಮಲಿನಲ್ಲಿ ಇಲ್ಲೋರ್ವ ಪೊಲೀಸ್​​ ಚೌಕಿಗೆ ಗುದ್ದಿ ಜಖಂಗೊಳಿಸಿದ್ದಾನೆ.

ಬೆಂಗಳೂರು:ಸಿಲಿಕಾನ್ ಸಿಟಿಯಲ್ಲಿ ಶ್ರೀಮಂತರ ಮಕ್ಕಳ ಐಷಾರಾಮಿ ಕಾರುಗಳ ಹಾವಳಿ ಹೆಚ್ಚುತ್ತಿದ್ದು, ಸಾಮಾನ್ಯರು ರಸ್ತೆಯಲ್ಲಿ ಓಡಾಡಲು ಭಯಪಡುವಂತಾಗಿದೆ. ಸದ್ಯ ಫನ್ ವರ್ಲ್ಡ್ ಮಾಲಿಕ ವಿನಯ್ ಕುಮಾರ್ ಸಬರ್ವಾಲ್ ಪುತ್ರ ಸನ್ನಿ ಸಬರ್ವಾಲ್ ತನ್ನ ಕಾರಿನಲ್ಲಿ ಸ್ಟಂಟ್​​ ಮಾಡಲು ಹೋಗಿ ಅಪಘಾತ ಮಾಡಿದ್ದಾನೆ.

ಕಬ್ಬನ್​ ಪಾರ್ಕ್​ ಬಳಿ ಇರುವ ಪೊಲೀಸ್​​ ಚೌಕಿಗೆ ಸನ್ನಿ ಸಬರ್ವಾಲ್ ತನ್ನ ಕಾರನ್ನು ನುಗ್ಗಿಸಿದ್ದು, ಪೊಲೀಸ್​​ ಚೌಕಿ ಜಖಗೊಂಡಿದೆ. ಪೊಲೀಸ್​ ಚೌಕಿಗೆ ಕಾರು ನುಗ್ಗಿಸಿದ್ದು ಮಾತ್ರವಲ್ಲದೆ ನಂತರ ಅದರ ಮುಂದೆ ನಿಂತು ಫೋಟೊ ಸಹ ಕ್ಲಿಕ್ಕಿಸಿಕೊಂಡಿದ್ದಾನೆ.

ಕಾರು ಅಪಘಾತದ ವಿಡಿಯೋ ಹಾಗೂ ಜಖಂಗೊಂಡಿರುವ ಪೊಲೀಸ್ ಚೌಕಿಯ ಫೋಟೊವನ್ನು ಸನ್ನಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾನೆ. ಸದ್ಯ ಈ ವಿಡಿಯೋ ಎಲ್ಲೆಡೆ ವೈರಲ್​​ ಆಗಿದೆ.

ಕೆಲ ದಿನಗಳ ಹಿಂದಷ್ಟೇ ಶಾಸಕ ಹ್ಯಾರಿಸ್​​ ಪುತ್ರ ನಲಪಾಡ್​​ ಕಾರು ಗುದ್ದಿದ್ದ ಪ್ರಕರಣವನ್ನು ಪತ್ತೆ ಹಚ್ಚಿದ ಪೊಲೀಸರು, ಭಾನುವಾರ ಸಿಟಿಯಲ್ಲಿ ಓಡಾಡಿದ್ದ ಐಷಾರಾಮಿ ಕಾರುಗಳ ಕುರಿತು ಸಂಪೂರ್ಣ ತನಿಖೆ ನಡೆಸುತ್ತಿದ್ದಾರೆ.