ಮತದಾನ ಮಾಡಿದ ಚಂದನವನದ ಸ್ಟಾರ್ಸ್‌.. ಸರತಿಯಲ್ಲಿ ನಿಂತು ಸುದೀಪ್​, ಪ್ರೇಮ್, ದುನಿಯಾ ವಿಜಯ್​ ಹಕ್ಕು ಚಲಾವಣೆ​​​​​​​​​​​​​​​​​​​​​​​​​​​​​​​​​​​​​

ಇಂದು ಹಾಗೂ ಏಪ್ರಿಲ್ 23 ರಂದು ರಾಜ್ಯದಲ್ಲಿ ಚುನಾವಣೆ ನಡೆಯುತ್ತಿದ್ದು ಮತದಾರರು ತಮ್ಮ ಹಕ್ಕು ಚಲಾಯಿಸುತ್ತಿದ್ದಾರೆ. ಸೆಲೆಬ್ರಿಟಿಗಳೂ ಕೂಡಾ ಮತಗಟ್ಟೆಗೆ ತೆರಳಿ ಸಾಲಿನಲ್ಲಿ ನಿಂತು ವೋಟು ಮಾಡುತ್ತಿದ್ದಾರೆ.

ಕಿಚ್ಚ ಸುದೀಪ್ ತಮ್ಮ ಪತ್ನಿ ಪ್ರಿಯಾ ಜೊತೆ ಮತಕೇಂದ್ರಕ್ಕೆ ತೆರಳಿ ಮತ ಚಲಾಯಿಸದರು. ಯಾರಿಗೆ ಎಷ್ಟೇ ಕೆಲಸವಿದ್ದರೂ ಸ್ವಲ್ಪ ಬಿಡುವು ಮಾಡಿಕೊಂಡು ಬಂದು ಮತ ಚಲಾಯಿಸಿ. ನಮಗೆ ಸಿಕ್ಕಿರುವ ಈ ಅವಕಾಶವನ್ನು ಯಾವುದೇ ಕಾರಣಕ್ಕೂ ಕಳೆದುಕೊಳ್ಳಬೇಡಿ ಎಂದು ಮನವಿ ಮಾಡಿದರು.

ಲವ್ಲಿ ಸ್ಟಾರ್ ಪ್ರೇಮ್ ತಮ್ಮ ಪತ್ನಿ ಜ್ಯೋತಿಯೊಂದಿಗೆ ಮತಗಟ್ಟೆಗೆ ತೆರಳಿ ಮತ ಚಲಾಯಿಸಿದ್ದಾರೆ. ಇಂದು ಪ್ರೇಮ್ ಅವರ ಹುಟ್ಟುಹಬ್ಬ ಕೂಡಾ. ಮತ ಚಲಾಯಿಸಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಪ್ರೇಮ್​​​, ಇದು ಪ್ರಜಾಪ್ರಭುತ್ವ, ಸೂಕ್ತ ಅಭ್ಯರ್ಥಿಗೆ ಮತ ಚಲಾಯಿಸುವ ಹಕ್ಕು ನಮಗಿದೆ. ಆದ್ದರಿಂದ ಎಲ್ಲರೂ ತಪ್ಪದೆ ಬಂದು ತಮಗೆ ಸರಿ ಎನಿಸಿದ ಅಭ್ಯರ್ಥಿಗೆ ಮತ ಚಲಾಯಿಸಿ ಎಂದರು.

ಈ ಬಾರಿ ಅಂಬರೀಶ್ ನಮ್ಮ ಜೊತೆಗೆ ಇಲ್ಲ, ಅಲ್ಲದೆ ಜನರು ನನ್ನ ಹುಟ್ಟುಹಬ್ಬ ಆಚರಿಸಲು ಬರುವ ಕಾರಣದಿಂದ ಮತ ಚಲಾಯಿಸುವುದು ಮಿಸ್ ಆಗುವುದು ಬೇಡ. ಆದ ಕಾರಣ ನನ್ನ ಅಭಿಮಾನಿಗಳಿಗೆ ಈ ಬಾರಿ ನಾನು ಬರ್ತಡೇ ಆಚರಿಸಿಕೊಳ್ಳುತ್ತಿಲ್ಲ ಎಂದು ಮೊದಲೇ ತಿಳಿಸಿದ್ದೆ. ನನ್ನ ಹುಟ್ಟು ಹಬ್ಬಕ್ಕಿಂತ ಚುನಾವಣೆ ಮುಖ್ಯ ಎಂದರು.

ದುನಿಯಾ ವಿಜಯ್ ಕೂಡಾ ಇಂದು ಮತ ಚಲಾಯಿಸಿದ್ದಾರೆ. ಮತದಾನ ನಮ್ಮ ಹಕ್ಕು. 5 ವರ್ಷಗಳಿಗೊಮ್ಮೆ ನಮಗೆ ಸಿಗುವ ಈ ಅಮೂಲ್ಯ ಅವಕಾಶವನ್ನು ಕಳೆದುಕೊಳ್ಳದೆ ಬಂದು ಮತ ಚಲಾಯಿಸಿ ಎಂದಿದ್ದಾರೆ.