ವಿದ್ಯಾರ್ಥಿಗಳು ಹಣ ಕೊಟ್ಟು ಕೋವಿಡ್ ಪರೀಕ್ಷೆ ಮಾಡಿಸುವ ಅವಶ್ಯಕತೆ ಇಲ್ಲ: ಡಿಸಿಎಂ ಅಶ್ವತ್ಥ ನಾರಾಯಣ

ಎಂಟು ತಿಂಗಳ ನಂತರ ಕಾಲೇಜುಗಳು ಆರಂಭವಾಗಿವೆ. ಯುಜಿಸಿ ಗೈಡ್​​ ಲೈನ್ಸ್, ರಾಜ್ಯ ಸರ್ಕಾರದ ನಿರ್ಣಯ ಮತ್ತು ವಿದ್ಯಾರ್ಥಿಗಳು-ಪೋಷಕರ ಒತ್ತಾಯದ ಮೇರೆಗೆ ಕಾಲೇಜು ಆರಂಭ ಮಾಡಲಾಗಿದೆ. ಆರೋಗ್ಯ ಇಲಾಖೆಯಿಂದ ಉಚಿತ ಕೋವಿಡ್ ಪರೀಕ್ಷೆ ಮಾಡಲಾಗುವುದು. ಯಾವ ವಿದ್ಯಾರ್ಥಿಯೂ ಹಣ ಕೊಟ್ಟು ಕೋವಿಡ್ ಪರೀಕ್ಷೆ ಮಾಡಿಸಿಕೊಳ್ಳುವ ಅವಶ್ಯಕತೆ ಇಲ್ಲ ಎಂದು ಡಿಸಿಎಂ ಅಶ್ವತ್ಥ ನಾರಾಯಣ ಹೇಳಿದ್ದಾರೆ.

ಬೆಂಗಳೂರು:ಸ್ನಾತಕೋತ್ತರ, ಪದವಿ, ಡಿಪ್ಲೊಮಾ ಕಾಲೇಜುಗಳ ಅಂತಿಮ ವರ್ಷದ ತರಗತಿಗಳು ಇಂದಿನಿಂದ ಆರಂಭವಾಗಿವೆ. ಕೋವಿಡ್ ಹಿನ್ನೆಲೆ 8 ತಿಂಗಳಿನಿಂದ ಬಂದ್ ಆಗಿದ್ದ ಕಾಲೇಜುಗಳು ಎಸ್​​ಒಪಿ ಮಾರ್ಗಸೂಚಿಯಂತೆ ಬಾಗಿಲು ತೆರೆಯುತ್ತಿವೆ. ಈ ಹಿನ್ನೆಲೆ ಉಪ ಮುಖ್ಯಮಂತ್ರಿ ಡಾ. ಸಿ.ಎನ್.ಅಶ್ವತ್ಥ ನಾರಾಯಣ ನಗರದ ಮಹಾರಾಣಿ ಕ್ಲಸ್ಟರ್ ಕಾಲೇಜಿಗೆ ಭೇಟಿ ನೀಡಿ ಪರಿಶೀಲಿಸಿದರು. ಅಲ್ಲದೆ ವಿದ್ಯಾರ್ಥಿಗಳೊಂದಿಗೆ ಮಾತುಕತೆ ಕೂಡ ನಡೆಸಿದರು.

ನಂತರ ಮಾತಾನಾಡಿದ ಅವರು, ಎಂಟು ತಿಂಗಳ ನಂತರ ಕಾಲೇಜುಗಳು ಆರಂಭವಾಗಿವೆ. ಯುಜಿಸಿ ಗೈಡ್ ಲೈನ್ಸ್, ರಾಜ್ಯ ಸರ್ಕಾರದ ನಿರ್ಣಯ ಮತ್ತು ವಿದ್ಯಾರ್ಥಿಗಳು-ಪೋಷಕರ ಒತ್ತಾಯದ ಮೇರೆಗೆ ಕಾಲೇಜು ಆರಂಭ ಮಾಡಲಾಗಿದೆ. ಆನ್​ಲೈನ್ ತರಗತಿಗಳು ತೃಪ್ತಿಕರವಾಗಿರಲಿಲ್ಲ, ಹಲವು ಸಮಸ್ಯೆಗಳು ಎದುರಿಸಬೇಕಾಯಿತು. ಹೀಗಾಗಿ ವಿದ್ಯಾರ್ಥಿಗಳು ಅವ್ರ ಅನುಕೂಲಕ್ಕೆ ತಕ್ಕಂತೆ ಆನ್​ಲೈನ್ ಅಥವಾ ಆಫ್​ಲೈನ್ ತರಗತಿಗಳಲ್ಲಿ ಕಲಿಯಬಹುದು ಎಂದರು.

ಇನ್ನು ಕೋವಿಡ್​ನ ಎಲ್ಲಾ ಮಾರ್ಗಸೂಚಿಗಳು ಪಾಲನೆಯಾಗಿವೆ. ಆರೋಗ್ಯ ಇಲಾಖೆಯಿಂದ ಉಚಿತ ಕೋವಿಡ್ ಪರೀಕ್ಷೆ ಮಾಡಲಾಗುವುದು. ಯಾವ ವಿದ್ಯಾರ್ಥಿಯೂ ಹಣ ಕೊಟ್ಟು ಕೋವಿಡ್ ಪರೀಕ್ಷೆ ಮಾಡಿಸಿಕೊಳ್ಳುವ ಅವಶ್ಯಕತೆ ಇಲ್ಲ ಎಂದರು.

ಹಂತ ಹಂತವಾಗಿ ಕಾಲೇಜು ನಡೆಯಲಿದೆ. ಅಂತಿಮ‌ ವರ್ಷದವರಿಗೆ ರೆಗ್ಯುಲರ್ ಕಾಲೇಜ್, ಮೊದಲ ಮತ್ತು ಎರಡನೇ ವರ್ಷದವರಿಗೆ ಕಾಂಟ್ಯಾಕ್ಟ್ ಕ್ಲಾಸ್ ಮಾಡ್ತಿದ್ದೇವೆ. ಯಾರಿಗೂ ಒತ್ತಾಯ ಮಾಡಿಲ್ಲ. ಸ್ವಇಚ್ಛೆಯಿಂದ ವಿದ್ಯಾರ್ಥಿಗಳು ಬರಬಹುದು. ಎಲ್ರೂ ಕೋವಿಡ್ ಸರ್ಟಿಫಿಕೇಟ್ ತರೋದು ಕಡ್ಡಾಯ. ನಿಧಾನಕ್ಕೆ ವಿದ್ಯಾರ್ಥಿಗಳ ಸಂಖ್ಯೆ ಹೆಚ್ಚುವ ನಿರೀಕ್ಷೆ ಇದೆ. ಯಾರಿಗೆ ಕಾಲೇಜಿನ ಅವಶ್ಯಕತೆ ಇದೆ ಅವರು ಬರಬಹುದು. ಯಾರಿಗೂ ಒತ್ತಾಯವಿಲ್ಲ. ಬರಲು ಇಷ್ಟವಿಲ್ಲದವರು, ಭಯ ಇರುವವರು ಮನೆಯಲ್ಲೇ ತರಗತಿ ಅಟೆಂಡ್ ಮಾಡಬಹುದು ಎಂದರು.