ನಿಮ್ಮ ವಾರ್ಡ್​ನಲ್ಲೇ ಜನ ನಿಮ್ಮನ್ನು ಬೆಂಬಲಿಸಿಲ್ಲ: ಬಿಎಸ್‍ವೈ ಕಾಲೆಳೆದ ಕಾಂಗ್ರೆಸ್

ಮೊನ್ನೆ ಪ್ರಕಟವಾದ ಶಿಕಾರಿಪುರ ಪುರಸಭೆ ಚುನಾವಣೆ ಫಲಿತಾಂಶದಲ್ಲಿ ಬಿಜೆಪಿಗೆ ಹಿನ್ನಡೆಯಾಗಿದೆ. ಈ ಹಿನ್ನೆಲೆಯಲ್ಲಿ ಕಾಂಗ್ರೆಸ್​​ ಟ್ವಿಟ್ಟರ್​ ಮೂಲಕ ಬಿಜೆಪಿ ರಾಜ್ಯಾಧ್ಯಕ್ಷ ಹಾಗೂ ಶಿಕಾರಿಪುರ ಕ್ಷೇತ್ರದ ಶಾಸಕರಾಗಿರುವ ಯಡಿಯೂರಪ್ಪ ಅವರ ಕಾಲೆಳೆದಿದೆ. ಅಲ್ಲದೆ, ಮೈತ್ರಿ ಸರ್ಕಾರ ಪತನವಾಗಲಿದೆ ಎನ್ನುತ್ತಿರುವ ಬಿಜೆಪಿ ನಾಯಕರಿಗೆ ಈ ಮೂಲಕ ಟಾಂಗ್​ ನೀಡಿದೆ.

ಬೆಂಗಳೂರು:ಸ್ಥಳೀಯ ಸಂಸ್ಥೆ ಚುನಾವಣೆಯಲ್ಲಿ ಶಿಕಾರಿಪುರದ ಬಿಎಸ್‍ವೈ ಮನೆಯಿರುವ ವಾರ್ಡ್​ನಲ್ಲೇ ಬಿಜೆಪಿಗೆ ಸೋಲಾಗಿದ್ದಕ್ಕೆ ಕಾಂಗ್ರೆಸ್‍ ಟ್ವೀಟ್‍ ಮೂಲಕ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‍. ಯಡಿಯೂರಪ್ಪರನ್ನು ಟ್ವೀಟ್ ಮೂಲಕ ಕಾಲೆಳೆದಿದೆ.

ಮೊನ್ನೆ ಪ್ರಕಟವಾದ ಶಿಕಾರಿಪುರ ಪುರಸಭೆ ಚುನಾವಣೆ ಫಲಿತಾಂಶದಲ್ಲಿ ಬಿಜೆಪಿಗೆ ಹಿನ್ನಡೆಯಾಗಿದೆ. ಇಲ್ಲಿನ ಒಟ್ಟು 23 ವಾರ್ಡ್‍ಗಳ ಪೈಕಿ ಕಾಂಗ್ರೆಸ್ 12, ಬಿಜೆಪಿ 8, ಪಕ್ಷೇತರರು 3 ಸ್ಥಾನ ಗೆದ್ದಿದ್ದು, ಇಲ್ಲಿ ಜೆಡಿಎಸ್‍ ಖಾತೆ ತೆರೆದಿಲ್ಲ. ಆದ್ರೆ ಕಾಂಗ್ರೆಸ್‍ ಸ್ವತಂತ್ರವಾಗಿ ಅಧಿಕಾರಕ್ಕೆ ಬಂದಿದೆ.

ಈ ಫಲಿತಾಂಶವನ್ನು ಮುಂದಿಟ್ಟುಕೊಂಡು ಕಾಂಗ್ರೆಸ್ ಟ್ವೀಟ್‍ ಮೂಲಕ ಬಿಎಸ್‍ವೈ ಲೇವಡಿ ಮಾಡಿದೆ. ಟ್ವೀಟ್‍ನಲ್ಲಿ “20 ಕಾಂಗ್ರೆಸ್ ಶಾಸಕರು ಸಂಪರ್ಕದಲ್ಲಿದ್ದಾರೆ, ಸರ್ಕಾರ ಉರುಳಲಿದೆ ಎಂದಿದ್ದ ಕರ್ನಾಟಕ ಬಿಜೆಪಿ ರಾಜ್ಯಾಧ್ಯಕ್ಷ ಬಿಎಸ್​ವೈ ಅವರೇ, ಶಿಕಾರಿಪುರ ಪುರಸಭೆಯನ್ನು; ನಿಮ್ಮ ಮನೆಯಿರುವ ವಾರ್ಡನ್ನೂ ನಿಮ್ಮಿಂದ ಉಳಿಸಿಕೊಳ್ಳಲಾಗಿಲ್ಲ. ಈ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ನಿಮ್ಮ ಕ್ಷೇತ್ರವೂ ಸೇರಿದಂತೆ ರಾಜ್ಯವು ಮೈತ್ರಿ ಸರ್ಕಾರವನ್ನು ಬೆಂಬಲಿಸಿದೆ’ ಎನ್ನುವ ಮೂಲಕ ಕಾಂಗ್ರೆಸ್​ ಟಾಂಗ್​ ನೀಡಿದೆ.