ಬೆಂಗಳೂರು: ಅವರಿಬ್ಬರಿಗೂ ಮದುವೆ ಆಗಿ ಆದಾಗಲೇ ಐದು ವರ್ಷ ಕಳೆದಿತ್ತು. ಇವರ ದಾಂಪತ್ಯಕ್ಕೆ ಸಾಕ್ಷಿ ಎಂಬಂತೆ ಇಬ್ಬರು ಮಕ್ಕಳು ಸಹ ಇದ್ದಾರೆ. ಆದರೆ, ಹೆಂಡತಿಗೆ ಮಾತ್ರ ಹಳೆ ಪ್ರಿಯಕರ ಆಗಾಗ ಕಾಲ್ ಮಾಡುತ್ತಿದ್ದ. ಇವರಿಬ್ಬರ ಸ್ನೇಹಕ್ಕೆ ಗಂಡ ಅಡ್ಡ ಬರುತ್ತಿದ್ದ ಎಂಬ ಕಾರಣಕ್ಕೆ ಆತ ಗೆಳತಿಯ ಗಂಡನ ಕೊಲೆ ಮಾಡಿರುವ ಪ್ರಕರಣ ರಾಜಧಾನಿ ಬೆಂಗಳೂರಿನಲ್ಲಿ ಬೆಳಕಿಗೆ ಬಂದಿದೆ. ಈ ಪ್ರಕರಣದ ಸಂಬಂಧ ಏಳು ಆರೋಪಿಗಳನ್ನು ಚಂದ್ರಾಲೇಔಟ್ ಪೊಲೀಸರು ಬಂಧಿಸಿದ್ದಾರೆ.
ಜೋಹೇಬ್ ಅಬ್ರಾಹಂ ಕೊಲೆಯಾದ ವ್ಯಕ್ತಿ. ಈತನ ಪೋಷಕರು ದೂರು ನೀಡಿದ ಆಧಾರದ ಮೇರೆಗೆ ಪ್ರಕರಣ ದಾಖಲಿಸಿಕೊಂಡಿದ್ದ ಪೊಲೀಸರು, ಇನ್‌ಸ್ಪೆಕ್ಟರ್ ಮನೋಜ್‌ ನೇತೃತ್ವದ ತಂಡ ಕಾರ್ಯಾಚರಣೆ ನಡೆಸಿ ನದೀಂ ಪಾಷಾ, ತನ್ವೀರ್ ಮುಬಾರಕ್, ಮೊಹಮ್ಮದ್ ತಬ್ರೇಜ್ ಸೇರಿ ಏಳು ಜನ ಆರೋಪಿಗಳನ್ನು ಹೆಡೆಮುರಿ ಕಟ್ಟಿದ್ದಾರೆ.
ಶಬ್ರೀನ್ ಎಂಬಾಕೆಯನ್ನು ಅಬ್ರಹಾಂ ಐದು ವರ್ಷದ ಹಿಂದೆ ಮದುವೆಯಾಗಿದ್ದರು. ಈತನ ಮಾವ ಅಬ್ರಹಾಂಗೆ ಒಂದು ಚಿಲ್ಲರೆ ಅಂಗಡಿ ಹಾಕಿಕೊಟ್ಟು ಮನೆ ಅಳಿಯನನ್ನಾಗಿ ಮಾಡಿಕೊಂಡಿದ್ದರು. ಅದಾಗಿಯೂ ಶಬ್ರೀನ್ ಕಾಲೇಜು ದಿನಗಳಿಂದ ಪರಿಚಿತನಾಗಿದ್ದ ಆರೋಪಿ ನದೀಂ ಜೊತೆಗೆ ಸ್ನೇಹ ಮುಂದುವರಿಸಿದ್ದಳು. ಇದೇ ವಿಚಾರಕ್ಕೆ ಪತ್ನಿ-ಪತಿ ನಡುವೆ ಜಗಳ ನಡೆಯುತ್ತಿತ್ತು ಎನ್ನಲಾಗ್ತಿದೆ.