ದ್ವಿತೀಯ ಪಿಯು ಇಂಗ್ಲಿಷ್​​​ ಪರೀಕ್ಷೆ: ಸಾಮಾಜಿಕ ಅಂತರದೊಂದಿಗೆ ಯಶಸ್ವಿ

ರಾಜ್ಯಕ್ಕೆ ಕೊರೊನಾ ಸುಳಿದಿರಲಿಲ್ಲ ಅಂದಿದ್ದರೆ ಪಿಯು ಪರೀಕ್ಷೆ ಮುಕ್ತಾಯವಾಗಿ, ಮೌಲ್ಯಮಾಪನ ಮುಗಿದು ವಿದ್ಯಾರ್ಥಿಗಳು ಫಲಿತಾಂಶದ ನಿರೀಕ್ಷೆಯಲ್ಲಿ ಇರಬೇಕಾಗಿತ್ತು. ಆದರೆ ಕೊರೊನಾ ವೈರಸ್ ಎಲ್ಲವನ್ನು ಉಲ್ಟಾಪಲ್ಟಾ ಮಾಡಿಬಿಡ್ತು. ಬಾಕಿ ಇದ್ದ ಪಿಯು ಇಂಗ್ಲಿಷ್ ಪತ್ರಿಕೆ ಪರೀಕ್ಷೆ ಇಂದು ಸಾಮಾಜಿಕ ಅಂತರದೊಂದಿಗೆ ಯಶಸ್ವಿಯಾಗಿ ಮುಗಿದಿದೆ.

ಬೆಂಗಳೂರು: ಮಾರ್ಚ್ 23 ರಂದು ನಡೆಯಬೇಕಿದ್ದ ಪಿಯು ಇಂಗ್ಲಿಷ್​​ ಪತ್ರಿಕೆ ಪರೀಕ್ಷೆಯನ್ನು, ಕೊರೊನಾ ವೈರಸ್​ನಿಂದಾಗಿ ಮುಂದೂಡಲಾಗಿತ್ತು. ಹೀಗೆ ಮುಂದೂಡಲ್ಪಟ್ಟ ಪರೀಕ್ಷೆ ಇಂದು ಪದವಿಪೂರ್ವ ಶಿಕ್ಷಣ ಇಲಾಖೆ, ಆರೋಗ್ಯ ಇಲಾಖೆ, ಗೃಹ ಇಲಾಖೆಯ ಸಹಕಾರದೊಂದಿಗೆ ಯಶಸ್ವಿಯಾಗಿ ಮುಕ್ತಾಯವಾಗಿದೆ.

ಬೆಳಗ್ಗೆ 10:15ಕ್ಕೆ ಶುರುವಾದ ಪರೀಕ್ಷೆ 1:30ರವರೆಗೆ ನಡೆಯಿತು. ಪರೀಕ್ಷಾ ಕೇಂದ್ರಕ್ಕೆ ಬರುವ ವಿದ್ಯಾರ್ಥಿಗಳಿಗೆ ಮಾಸ್ಕ್ ಕಡ್ಡಾಯವಾಗಿತ್ತು. ಕೇಂದ್ರದ ಹೊರಗಡೆ ಥರ್ಮಲ್ ಸ್ಕ್ರೀನಿಂಗ್ ಹಾಗೂ ಹ್ಯಾಂಡ್ ಸ್ಯಾನಿಟೈಸ್​​ ಮಾಡಲಾಯಿತು.‌ ನಂತರ ಮಾಸ್ಕ್ ಇಲ್ಲದವರಿಗೆ ಕೇಂದ್ರದಲ್ಲೇ ಮಾಸ್ಕ್ ನೀಡಿ ಪರೀಕ್ಷೆಗೆ ಕಳುಹಿಸಲಾಯಿತು. ಸಾಮಾಜಿಕ ಅಂತರ ಕಾಯ್ದುಕೊಳ್ಳಲು ಬಾಕ್ಸ್​​ಗಳನ್ನ ಹಾಕಲಾಗಿತ್ತು. ಜೊತೆಗೆ ಪ್ರತಿ ಪರೀಕ್ಷಾ ಕೊಠಡಿಯಲ್ಲಿ ಪರೀಕ್ಷಾ ಮೇಲ್ವಿಚಾರಕರು ಸಹ ಮಾಸ್ಕ್ ಧರಿಸಿ, ಕೈಗಳಿಗೆ ಗ್ಲೌಸ್ ಧರಿಸಿ ಕೆಲಸ ನಿರ್ವಹಿಸಿದರು.

ಒಟ್ಟು 1016 ಕೇಂದ್ರಗಳಲ್ಲಿ‌ ಪರೀಕ್ಷೆಗೆ 5,95,997 ವಿದ್ಯಾರ್ಥಿಗಳು ಹಾಜರಾಗಿದ್ದು, ಇದರಲ್ಲಿ ಹೊಸಬರು 5,40,484, ಖಾಸಗಿ ವಿದ್ಯಾರ್ಥಿಗಳು 27,120, ಪುನರಾವರ್ತಿತ ವಿದ್ಯಾರ್ಥಿಗಳು 28,393 ಪರೀಕ್ಷೆ ಬರೆದರು. ಜಿಲ್ಲೆಯಿಂದ ಜಿಲ್ಲೆಗೆ ಪರೀಕ್ಷಾ ಕೇಂದ್ರಗಳನ್ನ ಸುಮಾರು 18,529 ವಿದ್ಯಾರ್ಥಿಗಳು ಬದಲಾಯಿಸಿಕೊಂಡಿದ್ದರು. 1889 ವಿದ್ಯಾರ್ಥಿಗಳು ಹೊರ ರಾಜ್ಯಗಳಿಂದ ಬಂದವರಾಗಿದ್ದು, 650 ಪರೀಕ್ಷಾ ಕೇಂದ್ರಗಳ ಬದಲಾವಣೆಯನ್ನ ಮಾಡಲಾಗಿತ್ತು. ಕೊರೊನಾ‌ ಹಿನ್ನೆಲೆ ಹೆಚ್ಚುವರಿ 13,528 ಕೊಠಡಿ ಸಿದ್ಧಪಡಿಸಲಾಗಿತ್ತು. ರಾಜ್ಯಾದ್ಯಂತ 36,592 ಕೊಠಡಿಗಳನ್ನ ಪರೀಕ್ಷೆಗೆ ಬಳಸಲಾಯ್ತು.

ಇಬ್ಬರಿಗೆ ಪ್ರತ್ಯೇಕ‌ ಕೊಠಡಿಯಲ್ಲಿ ಪರೀಕ್ಷೆ:

ವಿಜಯಪುರ ಸೇರಿದಂತೆ ಮತ್ತೊಂದು ಕೇಂದ್ರದಲ್ಲಿ ಆರೋಗ್ಯ ತಪಾಸಣಾ ಸಮಯದಲ್ಲಿ ಇಬ್ಬರು ವಿದ್ಯಾರ್ಥಿಗಳ ಟೆಂಪರೇಚರ್ ಹೆಚ್ಚು ಕಂಡು ಬಂದಿದ್ದರಿಂದ ಅವರನ್ನು ಪ್ರತ್ಯೇಕ ಕೊಠಡಿಗಳಲ್ಲಿ ಕೂರಿಸಿ ಪರೀಕ್ಷೆ ಬರೆಯಲು ಅವಕಾಶ ಕಲ್ಪಿಸಲಾಗಿತ್ತು. ಇಂದು ಯಾವುದೇ ಅಹಿತಕರ ಘಟನೆಗಳು ನಡೆಯದೇ, ಪ್ರಶ್ನೆ ಪತ್ರಿಕೆಗಳ ಸೋರುವಿಕೆ ಇಲ್ಲದೇ ಮತ್ತು ಉತ್ತರ ಪತ್ರಿಕೆಗಳ ನಕಲು ಪ್ರಕರಣಗಳಿಲ್ಲದೇ ಪರೀಕ್ಷೆ ಮುಗಿದಿದೆ ಎಂದು ಸಚಿವ ಸುರೇಶ್ ಕುಮಾರ್ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.

ಪಿಯು ಬೋರ್ಡ್​ನ ಹಂಗಾಮಿ ನಿರ್ದೇಶಕರಾದ ಡಾ. ರೇಜು ಮಾತನಾಡಿ, ಮಾರ್ಚ್ ತಿಂಗಳಲ್ಲಿ ಮುಗಿಯಬೇಕಿದ್ದ ಪರೀಕ್ಷೆ ಇಂದು ಮುಗಿದಿದೆ. ಸೋಪು, ಸ್ಯಾನಿಡೈಸರ್​​ನ್ನ ಎಲ್ಲ ಪರೀಕ್ಷಾ ಕೇಂದ್ರಗಳಲ್ಲಿ ಉಪಯೋಗಿಸಲಾಗಿದೆ. ಎಲ್ಲ ಇಲಾಖೆಗಳು ಪರೀಕ್ಷೆ ನಡೆಸಲು ಸಹಕಾರ ನೀಡಿವೆ, ಎಲ್ಲ ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದಾರೆ. ಇತರೆ ಜಿಲ್ಲೆಗಳಲ್ಲಿ ಮಳೆಯಿಂದ ಸಮಸ್ಯೆ ಆಗಬಹುದು ಅಂತ ಅಂದಾಜಿಸಲಾಗಿತ್ತು. ಆದರೆ ಅತೀ ಹೆಚ್ಚು ಮಳೆ ಎಲ್ಲೂ ಆಗದ ಕಾರಣ, ಯಾವ ಕೇಂದ್ರದಲ್ಲೂ ಯಾವುದೇ ಸಮಸ್ಯೆ ಆಗಿಲ್ಲ ಎಂದು ತಿಳಿಸಿದ್ರು.