ಬಾಬರಿ ಮಸೀದಿ ತೀರ್ಪು ನ್ಯಾಯಾಲಯದ ಮೇಲಿನ ನಂಬಿಕೆಯನ್ನು ಹುಸಿ ಮಾಡಿದೆ: ಎಸ್​ಡಿಪಿಐ

ಬಾಬರಿ ಮಸೀದಿ ತೀರ್ಪು ನ್ಯಾಯಾಲಯದ ಮೇಲಿನ ನಂಬಿಕೆಯನ್ನು ಹುಸಿ ಮಾಡಿದೆ ಎಂದು ಎಸ್​ಡಿಪಿಐ ಹೇಳಿದೆ.

ಬೆಂಗಳೂರು: ಬಾಬರಿ ಮಸೀದಿ ಧ್ವಂಸ ಪ್ರಕರಣಕ್ಕೆ ಸಂಬಂಧಿಸಿದಂತೆ ಲಖನೌ ಸಿಬಿಐ ವಿಶೇಷ ನ್ಯಾಯಾಲಯದ ತೀರ್ಪು ನ್ಯಾಯಾಂಗದ ಮೇಲಿನ ಸಾಮಾನ್ಯ ಜನರ ಭರವಸೆಯನ್ನು ಕಳೆದುಕೊಳ್ಳುವಂತೆ ಮಾಡಿದೆ ಎಂದು ಎಸ್​ಡಿಪಿಐ ಸಂಘಟನೆ ಆರೋಪಿಸಿದೆ.

ತೀರ್ಪು ವಿರೋಧಿಸಿ ಪ್ರತಿಭಟಿಸಬೇಕಾಗಿದೆ. ಸುಪ್ರೀಂಕೋರ್ಟ್ ಮೆಟ್ಟಿಲೇರಬೇಕಿದೆ ಎಂದು ತೀರ್ಪು ಕುರಿತು ಎಸ್​ಡಿಪಿಐ ಪಕ್ಷದ ರಾಜ್ಯಾಧ್ಯಕ್ಷ ಇಲ್ಯಾಜ್ ಮಹಮ್ಮದ್ ತುಂಬೆ ಪ್ರತಿಕ್ರಿಯೆ ನೀಡಿದ್ದಾರೆ.

ಈ ಕುರಿತು ಮಾತನಾಡಿದ ಅವರು, ಇದು ಘೋರವಾದ ತೀರ್ಪು. 28 ವರ್ಷದ ಬಳಿಕ ಕೊಟ್ಟ ತೀರ್ಪು ಅನ್ಯಾಯದ ತೀರ್ಪು. ಎಲ್ಲಾ ಸಾಕ್ಷಿಗಳು ಇವೆ. ಲಕ್ಷಾಂತರ ಜನರನ್ನು ಸೇರಿಸಿ ಪ್ರೇರಣೆ ಕೊಟ್ಟ ಬಗ್ಗೆಯೂ ಎಲ್ಲರಿಗೂ ತಿಳಿದಿದೆ. ಆದರೂ ಈ ರೀತಿಯ ತೀರ್ಪು ನಮ್ಮ ದೇಶ ತಲೆ ತಗ್ಗಿಸುವಂತಹ ತೀರ್ಪಾಗಿದೆ ಎಂದರು.

ಹಾಗಾದರೆ ಮಸೀದಿ ಧ್ವಂಸ ಮಾಡಿದವರು ಯಾರು? ನ್ಯಾಯಾಲಯ ಈ ರೀತಿ ರಾಜಕೀಯ ಪ್ರೇರಿತ, ಕೋಮು ಪ್ರೇರಿತ ತೀರ್ಪು ಕೊಟ್ಟಿದೆ ಎಂದು ಆರೋಪಿಸಿದ್ದಾರೆ.