ವೈಭವ್ ಜೈನ್​​​ ವಿಚಾರಣೆ ಚುರುಕು: ಮಹತ್ವದ ಮಾಹಿತಿ ಬಹಿರಂಗ

ಸ್ಯಾಂಡಲ್​ವುಡ್​ಗೆ ಡ್ರಗ್ಸ್ ಮಾಫಿಯಾ​​ ನಂಟು ಆರೋಪ ಪ್ರಕರಣದಲ್ಲಿ ಬಂಧಿತನಾಗಿರುವ 5ನೇ ಆರೋಪಿ ವೈಭವ್ ಜೈನ್ ತನಿಖೆಯನ್ನು ಸಿಸಿಬಿ ಚುರುಕುಗೊಳಿಸಿದೆ.

ಬೆಂಗಳೂರು: ಸ್ಯಾಂಡಲ್​ವುಡ್​ಗೆ ಡ್ರಗ್ಸ್​​​ ಮಾಫಿಯಾ ನಂಟು ಆರೋಪ ಪ್ರಕರಣದಲ್ಲಿ ಸಿಸಿಬಿ ವಶದಲ್ಲಿರುವ ಚಿನ್ನದ ವ್ಯಾಪಾರಿ‌ ಮಗ 5ನೇ ಆರೋಪಿ ವೈಭವ್ ಜೈನ್ ತನಿಖೆ ಚುರುಕುಗೊಳ್ಳುತ್ತಿದೆ. ಈ ವೇಳೆ ಈತ ಹಲವು ವಿಚಾರಗಳನ್ನು ಬಾಯ್ಬಿಟ್ಟಿದ್ದಾನೆ ಎನ್ನಲಾಗಿದೆ.

ಕಾಟನ್ ಪೇಟೆ ಠಾಣೆಯಲ್ಲಿ ವೈಭವ್ ಜೈನ್ ವಿರುದ್ಧ ಎಫ್ಐಆರ್ ದಾಖಲಾಗಿದ್ದು, ಈತ ನಟಿ‌ ರಾಗಿಣಿ ಆಪ್ತ ಎಂದು ತಿಳಿದು ಬಂದಿದೆ. ಈತನ ಬಂಧನದ ಬಳಿಕ ನಟ ಸಂತೋಷ್ ಕುಮಾರ್​ ಹಾಗೂ ನಿರೂಪಕ ಅಕುಲ್ ಬಾಲಾಜಿ ಜೊತೆಗಿನ ನಂಟಿನ ಬಗ್ಗೆ ಮಾಹಿತಿ ಲಭ್ಯವಾಗಿದೆ.

ಸದ್ಯ ಪಾರ್ಟಿಯಲ್ಲಿ ಹೇಗೆ ಡ್ರಗ್ಸ್​​​ ಸಪ್ಲೈ ಮಾಡುತ್ತಿದ್ದ, ಪಾರ್ಟಿಗಳು ಎಲ್ಲೆಲ್ಲಾ ನಡೆಯುತಿತ್ತು, ಪಾರ್ಟಿ ಯಾರು ಆಯೋಜನೆ ಮಾಡುತ್ತಿದ್ದರು, ಪಾರ್ಟಿ ಯಾವ ರೆಸಾರ್ಟ್​ನಲ್ಲಿ ನಡೆಯುತಿತ್ತು, ತಡರಾತ್ರಿ ಪಬ್ ಪಾರ್ಟಿಗಳಲ್ಲಿ ಯಾರೆಲ್ಲಾ ಭಾಗಿಯಾಗ್ತಿದ್ರು ಎಂಬೆಲ್ಲಾ ಮಾಹಿತಿಯನ್ನು ಈತ ನೀಡಿದ್ದಾನೆ ಎನ್ನಲಾಗಿದೆ.

ಈತ ಚಿನ್ನದ ವ್ಯಾಪಾರಿಯ ಮಗನಾಗಿದ್ದು, ತಂದೆಯ ಜೊತೆ ಚಿನ್ನದ ವ್ಯವಹಾರದಲ್ಲಿ ತೊಡಗಿದ್ದ. ಆದರೆ ತಂದೆಗೆ ಗೊತ್ತಾಗದ ರೀತಿಯಲ್ಲಿ ನಟಿ ರಾಗಿಣಿ, ವಿರೇನ್​ ಖನ್ನಾ ಜೊತೆ ಡ್ರಗ್ಸ್​​ ವ್ಯವಹಾರದಲ್ಲಿ ತೊಡಗಿದ್ದನಂತೆ.

ದೆಹಲಿಯಲ್ಲಿ ಬಂಧಿತನಾದ ಪಾರ್ಟಿ ಆಯೋಜಕ ವಿರೇನ್ ಖನ್ನಾನ ಅಪ್ಪಟ ಶಿಷ್ಯನಾಗಿದ್ದ ವೈಭವ್ ಜೈನ್, ರಾಷ್ಟ್ರಮಟ್ಟದಲ್ಲಿ ಪಾರ್ಟಿ ಆಯೋಜನೆ ಮಾಡುತ್ತಿದ್ದನಂತೆ. ಅಷ್ಟೇ ಅಲ್ಲದೆ, ಪ್ರತಿಷ್ಠಿತ ಹೋಟೆಲ್​ಗಳನ್ನ ಬುಕ್ ಮಾಡಿ ಅದರಲ್ಲಿ ಮೋಜು ಮಸ್ತಿ ಜೊತೆಗೆ ಡ್ರಗ್ಸ್​​ ಕೂಡ ಸಪ್ಲೈ ಮಾಡಿ ಹಲವಾರು ಮಂದಿಯನ್ನ ಪಾರ್ಟಿಗೆ ಸೆಳೆದಿರುವ ವಿಚಾರ ತನಿಖೆ ವೇಳೆ ಬಯಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಸದ್ಯ ವೈಭವ್ ಜೈನ್ ಲಿಸ್ಟ್​ನಲ್ಲಿ ಬಹಳಷ್ಟು ಮಂದಿ ಇದ್ದು, ಈತನ ಹೇಳಿಕೆಯಾಧಾರದ ಮೇರೆಗೆ ಸಿಸಿಬಿ ಪಕ್ಕಾ ಪ್ಲಾನ್ ಮಾಡಿ ಕೆಲವರನ್ನ ಖೆಡ್ಡಾಕ್ಕೆ ಕೆಡವಲು ಮುಂದಾಗಿದೆ.