ಬೆಂಗಳೂರು: ಕೊರೊನಾ ಸೋಂಕಿತರ ಸಂಖ್ಯೆ ದಿನೇ ದಿನೆ ಏರಿಕೆ ಆಗುತ್ತಲೇ ಇದೆ. ಚಿಕಿತ್ಸೆ ನೀಡುವ ವೈದ್ಯರಿಗೂ ಆತಂಕ ಶುರುವಾಗಿದೆ. ಹೀಗಾಗಿ, ಕೊರೊನಾ ವಿರುದ್ಧ ಹೋರಾಡುತ್ತಿರುವವರಿಗೆ ನೆರವಾಗಲು ರೋಬೋವೊಂದು ಬಂದಿದೆ.
ರಾಜ್ಯದಲ್ಲಿ ರೋಬೋ ಬಳಕೆಗೆ ಪರೀಕ್ಷೆ! ಕೊರೊನಾ ವಿರುದ್ಧದ ವಾರ್ಗೆ ಕರ್ನಾಟಕ ಸರ್ಕಾರದ ಜೊತೆ ವಿಪ್ರೋ ಸಂಸ್ಥೆ ಕೈ ಜೋಡಿಸಿದ್ದು, ದೇಶದಲ್ಲೇ ಮೊದಲ ರೋಬೋಟ್ ಬಳಕೆ ಮಾಡಲಾಗುತ್ತಿದೆ. ವೈದ್ಯಕೀಯ ಶಿಕ್ಷಣ ಇಲಾಖೆಯು ಕೊರೊನಾ ಪೀಡಿತರ ಚಿಕಿತ್ಸೆಗೆ ರೊಬೋಟ್ಗಳನ್ನು ಬಳಸಲು ಪ್ರಯೋಗ ನಡೆಸಿದೆ.
ಎರಡು ಮೂರು ಬಗೆಯ ರೋಬೋಟ್ಗಳನ್ನು ಅಖಾಡಕ್ಕಿಳಿಸಲು ಪ್ರಯೋಗ ನಡೆದಿದೆ. ಕೊರೊನಾ ಪೀಡಿತರ ಜ್ವರ, ಬಿಪಿ ತಪಾಸಣೆ ನಡೆಸಬಲ್ಲ, ಐಸಿಯು ಹೊರಗಿನಿಂದಲೇ ಕೊರೊನಾ ಪೀಡಿತರಿಗೆ ಸ್ಪಂದಿಸಬಲ್ಲ ಹಾಗೂ ವೈದ್ಯಕೀಯ ಸಿಬ್ಬಂದಿ ಹೇಳಿದಂತೆ ಓಡಾಡಬಲ್ಲ ರೋಬೋಟ್ ಪ್ರಯೋಗ ನಡೆಯುತ್ತಿದೆ.
ಸದ್ಯ ರೋಗಿಗಳಿಗೆ ಊಟ, ಔಷಧ ಪೂರೈಸಬಲ್ಲ ರೋಬೋಟ್ನ ಡೆಮೋ ಪರೀಕ್ಷೆಯು ಬೆಂಗಳೂರು ಮೆಡಿಕಲ್‌ ಕಾಲೇಜು ಸಂಶೋಧನಾ ತಂಡದಿಂದ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ನಡೆಯುತ್ತಿದೆ. ಈ ಡೆಮೋ ಪರೀಕ್ಷೆ ಯಶಸ್ವಿ ಆದರೆ ಕೊರೊನಾ ವಿರುದ್ಧದ ಯುದ್ಧದಲ್ಲಿ ರೋಬೋಗಳಿಂದಲೇ ರೋಗಿಗಳ ಆರೈಕೆ ಶುರುವಾಗಲಿದೆ.
