ಬೆಂಗಳೂರು: ಹಿಂದಿ ಭಾಷೆ ಕಲಿಯುತ್ತೇನೆ. ಆದರೆ, ಅದನ್ನು ಬಲವಂತವಾಗಿ ನನ್ನ ಮೇಲೆ ಹೇರುವ ಹಕ್ಕು ಯಾರಿಗೂ ಇಲ್ಲವೆಂದು ನಟ, ಪ್ರಜಾಕೀಯ ಸಂಸ್ಥಾಪಕ ಹಾಗೂ ನಿರ್ದೇಶಕ ಉಪೇಂದ್ರ ಕೇಂದ್ರದ ತ್ರಿಭಾಷಾ ನೀತಿ ವಿರುದ್ಧ ಕಿಡಿಕಾರಿದ್ದಾರೆ.
ನಾವೆಲ್ಲ ಮುಂಬೈಯಲ್ಲಿ ಶೂಟಿಂಗ್ ಮಾಡುತ್ತೇವೆ. ಹಾಗಾಗಿ ಹಿಂದಿ ಕಲಿಯುತ್ತೇನೆ. ತಮಿಳುನಾಡಿನಲ್ಲಿ ಹೋಗಿ ಕೂಡಾ ಸಿನಿಮಾ ಮಾಡುತ್ತೇವೆ. ಅದರಿಂದ ತಮಿಳು ಭಾಷೆಯನ್ನು ಕಲಿಯುತ್ತೇನೆ. ಇದನ್ನು ಸರ್ಕಾರ ನಮಗೆ ಹೇಳುವ ಅವಶ್ಯಕತೆ ಏನಿದೆ ಎಂದು ಪ್ರಶ್ನಿಸಿದರು.
ನಾಯಕರನ್ನು ಅವಲಂಭಿಸುವ ಮನಸ್ಥಿತಿ ಬದಲಾಗಬೇಕು. ನಾವು ನಾಯಕರ ಹಿಂದಿನ ಕುರಿಗಳಾಗಿದ್ದೇವೆ. ಒಂದು ಭಾಷೆಯನ್ನು ಕಲಿಯಿರಿ ಎಂದು ನಮಗೆ ಹೇಳೋಕೆ ಯಾರಿವರು? ಅಲ್ಲದೇ ದ್ವಿಭಾಷೆ ನೀತಿ ನಮಗೂ ಬೇಡ. ಯಾವುದೇ ಭಾಷೆಯನ್ನು ಬಲವಂತವಾಗಿ ನಮ್ಮ ಮೇಲೆ ಹೇರುವುದು ಸಮಂಜಸವಲ್ಲ ಎಂದು ಕುಟುಕಿದರು.
ಕಲಿಯುವುದು ನಮಗೆ ಸಂಬಂಧಪಟ್ಟ ವಿಷಯವಾಗಿದೆ. ತ್ರಿಭಾಷೆ ಕಲಿಯಲೇಬೇಕು ಎಂಬುದು ತಪ್ಪು ನಿರ್ಧಾರ. ಈಗ ಇದರ ಬಗ್ಗೆ ಅಭಿಯಾನ ಮಾಡಲಾಗುತ್ತಿದೆ. ನನಗೆ ಬೇಕು ಎಂದರೇ ನಾಲ್ಕು ಭಾಷೆ ಕಲಿಯುತ್ತೇನೆ. ಯೋಚನೆ ಮಾಡೋಕೆ ಬೇರೆ ವಿಷಯಗಳಿವೆ. ಸರ್ಕಾರ ಇದನ್ನು ಒತ್ತಡ ಹೇರಿ ಮಾಡಿಸುವುದಕ್ಕೆ ಆಗಲ್ಲವೆಂದು ಹಿಂದಿ ಹೇರಿಕೆಗೆ ಉಪ್ಪಿ ಆಕ್ಷೇಪ ವ್ಯಕ್ತಪಡಿಸಿದರು.
