ನೀನು ನನ್ನ ಮಗನಿಗೆ 27ನೇಯವಳು.. ಅತ್ಯಾಚಾರ ಸಂತ್ರಸ್ತೆ ಎದುರು ಆರೋಪಿ ತಂದೆಯ ಜಂಬ!!

2019ರಲ್ಲಿ ಯುವತಿ ಬೆಂಗಳೂರಲ್ಲಿ ಕೆಲಸ ಹುಡುಕುತ್ತಿದ್ದಾಗ ಯುವಕ ರೆಸ್ಯೂಮ್ ತೆಗೆದುಕೊಂಡು ಕೆಲಸ ಕೊಡಿಸುತ್ತೇನೆ ಎಂದು ಸಂಬಂಧಿಕರ ಮನೆಗೆ ಕರೆದೊಯ್ದು ಅತ್ಯಾಚಾರವೆಸಗಿದ್ದ..

ಬೆಂಗಳೂರು :ಕೆಲಸ ಕೊಡಿಸುವ ನೆಪದಲ್ಲಿ ಮತ್ತು ತರಿಸುವ ಕೇಕ್ ತಿನ್ನಿಸಿ ಅತ್ಯಾಚಾರ ಮಾಡಿ ಖಾಸಗಿ ಕ್ಷಣಗಳ ಅಶ್ಲೀಲ ವಿಡಿಯೋ ಚಿತ್ರಿಕರಿಸಿದ್ದ ಆರೋಪಿ ಬಂಧನ ಮಾಡುವಲ್ಲಿ ಚಂದ್ರಲೇಔಟ್ ಠಾಣೆ ಪೊಲೀಸರು ಯಶಸ್ವಿಯಾಗಿದ್ದಾರೆ. ಮಂಡ್ಯ ಮೂಲದ ಸಾಗರ್ ಗೌಡ ಬಂಧಿತ ಆರೋಪಿ.

ಸಾಗರ್ ಬೆಂಗಳೂರಲ್ಲಿ ಆನ್​ಲೈನ್ ಫುಡ್ ಡೆಲಿವರಿ ಬಾಯ್ ಆಗಿ ಕೆಲಸ ಮಾಡುತ್ತಿದ್ದ. ಸಂತ್ರಸ್ತೆಯ ಸಂಬಂಧಿಯ ಬರ್ತ್​ ಡೇ ಪಾರ್ಟಿಯಲ್ಲಿ ಈತ ಪರಿಚಯನಾಗಿದ್ದ. 2019ರಲ್ಲಿ ಯುವತಿ ಬೆಂಗಳೂರಲ್ಲಿ ಕೆಲಸ ಹುಡುಕುತ್ತಿದ್ದಾಗ ಯುವಕ ರೆಸ್ಯೂಮ್ ತೆಗೆದುಕೊಂಡು ಕೆಲಸ ಕೊಡಿಸುತ್ತೇನೆ ಎಂದು ಸಂಬಂಧಿಕರ ಮನೆಗೆ ಕರೆದೊಯ್ದಿದ್ದ. ಇದೇ ವೇಳೆ ಕೇಕ್​ನಲ್ಲಿ ಮತ್ತು ಬರುವ ಪೌಡರ್ ಹಾಕಿ ಕೇಕ್ ತಿನ್ನಿಸಿದ್ದ. ನಂತರ ಯುವತಿಯ ಅಶ್ಲೀಲ ಫೋಟೋ ಹಾಗೂ ವಿಡಿಯೋಗಳನ್ನ ಚಿತ್ರೀಕರಿಸಿ, ಬೆದರಿಕೆ ಹಾಕುತ್ತಿದ್ದ.

ಇದನ್ನೂ ಓದಿ:ಕಲ್ಯಾಣ ಮಂಟಪಕ್ಕೆ ಪೊಲೀಸರ ಎಂಟ್ರಿ: ಮದುವೆಗೆ ಬಂದಿದ್ದ ಯುವತಿಯೇ ಆದಳು ಮದುಮಗಳು!

ಬಳಿಕ ಯುವತಿ ಪೊಲೀಸರಿಗೆ ದೂರು ನೀಡುವ ಭಯದಲ್ಲಿ ಮದುವೆ ಆಗುವ ನಾಟಕವಾಡಿದ್ದಾನೆ. ಆದರೆ, ಆರೋಪಿಯು ಈ ಹಿಂದೆ ಹೀಗೆಯೇ 26 ಜನರಿಗೆ ಮೋಸ ಮಾಡಿರುವ ವಿಚಾರ ಬೆಳಕಿಗೆ ಬಂದಿದೆ. ಈ ವಿಚಾರ ತಿಳಿದು ಸಂತ್ರಸ್ತೆ ಮಂಡ್ಯದ ಮಳವಳ್ಳಿ ಬಳಿಯ ಆರೋಪಿಯ ಪೋಷಕರ ಬಳಿ ತೆರಳಿದ್ದಾಳೆ.

ಈ ವೇಳೆ ಪೋಷಕರು, ‘ನೀನು ನನ್ನ ಮಗನಿಗೆ 27ನೇಯವಳು. ನಿನಗಿಂತ ಮೊದಲು 26 ಜನ ಹುಡುಗಿಯರ ಜೀವನವನ್ನ ನನ್ನ ಮಗ ಹಾಳು ಮಾಡಿದ್ದಾನೆ. ಅವರಿಗೆಲ್ಲ ಮೊದಲು ನ್ಯಾಯ ಕೊಡಿಸಿ, ಆಮೇಲೆ ನಿನಗೆ ಮದುವೆ ಮಾಡಿಸುತ್ತೇವೆ’ ಎಂದು ಹೇಳಿದ್ದಾರೆ. ಈ ಬಗ್ಗೆ ಸಂತ್ರಸ್ತೆ ಚಂದ್ರಾಲೇಔಟ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ಪೊಲೀಸರು ಈತನನ್ನು ಬಂಧಿಸಿ ತನಿಖೆ ಮುಂದುವರೆಸಿದ್ದಾರೆ.