ಬೆಂಗಳೂರು:ಪೊಲೀಸ್ ಇನ್ಸ್ಪೆಕ್ಟರ್ವೊಬ್ಬರು ನಡು ರಸ್ತೆಯಲ್ಲಿ ಗೂಂಡಾ ವರ್ತನೆ ತೋರಿದ್ದಾರೆ ಎಂದು ನಗರದ ಸರ್ಜಾಪುರ ರಸ್ತೆಯ ಮಹಾವೀರ್ ಆರ್ಕೇಡ್ ಅಪಾರ್ಟ್ಮೆಂಟ್ ನಿವಾಸಿಯೊಬ್ಬರು ವಿಡಿಯೋಗಳೊಂದಿಗೆ ಟ್ವೀಟ್ ಮಾಡಿ ಕ್ರಮಕ್ಕೆ ಆಗ್ರಹಿಸಿದ್ದಾರೆ.
ಈ ಬಗ್ಗೆ ಅಭಿಷೇಕ್ ಎಂಬುವರು ವಿಡಿಯೋ ಶೇರ್ ಮಾಡಿದ್ದು, 'ನನ್ನ ನೆರೆಹೊರೆಯ ವ್ಯಕ್ತಿ ಮೇಲೆ ಜೊತೆ ಗೂಂಡಾ ಪೊಲೀಸ್ ಥಳಿಸಿದ್ದಾರೆ. ಮೆಂಟೇನನ್ಸ್ ಸಂಬಂಧ ಅಧಿಕಾರಿ ಈ ರೀತಿ ಹಲ್ಲೆ ನಡೆಸಿದ್ದಾರೆ' ಎಂದು ಟ್ವೀಟ್ನಲ್ಲಿ ಆರೋಪಿಸಿದ್ದಾರೆ.
'ಕೆಲ ತಿಂಗಳ ಹಿಂದೆ ಕೂಡ ಇವರು ಸ್ಥಳೀಯ ಗೂಂಡಾಗಳನ್ನು ಕರೆತಂದು ಯಾರನ್ನೂ ಅಪಾರ್ಟ್ಮೆಂಟ್ ಒಳಗೆ ಮತ್ತು ಹೊರಗೆ ಬಿಡದೆ ಮುಖ್ಯ ಗೇಟ್ ಬಂದ್ ಮಾಡಿದ್ದರು. ಸಹಾಯಕ್ಕಾಗಿ ಪೊಲೀಸರನ್ನು ಕರೆದಾಗ, ಗೇಟ್ ತೆರೆದಿದ್ದರು. ಆದರೆ ಬಳಿಕ ಗೂಂಡಾಗಳೊಂದಿಗೆ ಮಾತುಕತೆ ನಡೆಸಿ ಎಂದಿದ್ದರು' ಎಂದೂ ಕೂಡ ಅಭಿಷೇಕ್ ಟ್ವೀಟ್ ಮಾಡಿದ್ದಾರೆ.
ಅಭಿಷೇಕ್ ಈ ವಿಡಿಯೋಗಳನ್ನು ಬೆಂಗಳೂರು ಪೊಲೀಸರ ಟ್ವಿಟರ್ ಖಾತೆಗೆ ಟ್ಯಾಗ್ ಮಾಡಿದ್ದು, ಸೂಕ್ತ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದಾರೆ. ಇದನ್ನು ಗಮನಿಸಿದ ಪೊಲೀಸರು ಈ ಬಗ್ಗೆ ಆಗ್ನೇಯ ವಿಭಾಗದ ಡಿಸಿಪಿ ಹಾಗೂ ಹಾಗೂ ಎಲೆಕ್ಟ್ರಾನಿಕ್ ಸಿಟಿ ಎಸಿಪಿಗೆ ಕ್ರಮ ವಹಿಸುವಂತೆ ಸೂಚಿಸಲಾಗಿದೆ ಎಂದು ರೀಟ್ವೀಟ್ ಮಾಡಿದ್ದಾರೆ.