ಬಾರ್ ಮುಚ್ಚುವಂತೆ ವಿದ್ಯಾರ್ಥಿಗಳಿಂದ ಪ್ರತಿಭಟನೆ.. ತೆರೆದ ಒಂದೇ ದಿನಕ್ಕೆ ಬಿತ್ತು ಬೀಗ...!

ರೆಸಿಡೆನ್ಸಿ ಯುನಿವರ್ಸಿಟಿ ಕಾಲೇಜು ಬಳಿ ಬುಧವಾರ ತಾನೇ ಆರಂಭವಾಗಿದ್ದ ಬಾರ್​ನಿಂದ ವಿದ್ಯಾರ್ಥಿಗಳಿಗೆ ಸಾಕಷ್ಟು ತೊಂದರೆಯಾಗಿತ್ತು. ಹಾಗಾಗಿ ವಿದ್ಯಾರ್ಥಿಗಳು ಬಾರ್ ಮುಂದೆ ರಸ್ತೆ ತಡೆದು ಪ್ರತಿಭಟನೆ ನಡೆಸಿ ಒಂದೇ ದಿನಕ್ಕೆ ಬಾರ್ ಕ್ಲೋಸ್ ಮಾಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಬೆಂಗಳೂರು: ಸ್ಥಳೀಯರು ಹಾಗೂ ಕಾಲೇಜು ವಿದ್ಯಾರ್ಥಿಗಳ‌ ಪ್ರತಿಭಟನೆಯಿಂದ ಒಂದೇ ದಿನಕ್ಕೆ ಬಾರ್ ಕ್ಲೋಸ್ ಆದ ಘಟನೆ ಯಲಹಂಕ ತಾಲೂಕಿನ ರಾಜನಕುಂಟೆಯ ದಿಬ್ಬೂರು ಗ್ರಾಮದ ಬಳಿ ನಡೆದಿದೆ.

ಬುಧವಾರ ಓಪನ್​ ಆಗಿದ್ದ ಬಾರ್​ನಿಂದ ಪಕ್ಕದಲ್ಲೇ ಇದ್ದ ರೆಸಿಡೆನ್ಸಿ ಯುನಿವರ್ಸಿಟಿ ಕಾಲೇಜು ವಿದ್ಯಾರ್ಥಿಗಳಿಗೆ ಸಾಕಷ್ಟು ತೊಂದರೆಯಾಗಿತ್ತು. ಅಲ್ಲದೇ ಈ ರಸ್ತೆಯಲ್ಲಿ ಸಾಕಷ್ಟು ಅಪಘಾತಗಳು ಸಂಭವಿಸಿವೆ. ಇದರಿಂದ ಬೇಸತ್ತ ಸ್ಥಳೀಯರು ಹಾಗೂ ವಿದ್ಯಾರ್ಥಿಗಳು ಬಾರ್ ಮುಂದೆ ರಸ್ತೆ ತಡೆದು ಪ್ರತಿಭಟನೆ ನಡೆಸಿದ್ರು. ಅಬಕಾರಿ ಇಲಾಖೆಗೆ ಧಿಕ್ಕಾರ ಕೂಗಿದ್ದಲ್ಲದೇ ನ್ಯಾಯ ಸಿಗುವವರೆಗೂ ಹೋರಾಟ ಮಾಡುವುದಾಗಿ ಆಕ್ರೋಶ ವ್ಯಕ್ತಪಡಿಸಿದರು.

ಇನ್ನು ಈ ಜಾಗ ಕೃಷಿ ಜಮೀನಾಗಿದ್ದು, ನಿಯಮವನ್ನು ಗಾಳಿಗೆ ತೂರಿ ಬಾರ್ ನಿರ್ಮಾಣ ಮಾಡಲಾಗಿದೆ ಎನ್ನುವ ಮಾತು ಕೇಳಿಬಂದಿದೆ. ವಿದ್ಯಾಸಂಸ್ಥೆಯ ಸನಿಹದಲ್ಲಿ ಬಾರ್ ತೆರೆಯುವಂತಿಲ್ಲ. ಅಲ್ಲದೇ ಇದಕ್ಕೆ ಅಬಕಾರಿ ಇಲಾಖೆ ಎನ್​ಒಸಿ ಹೇಗೆ ಕೊಟ್ಟಿದೆ. ಇದನ್ನು ತೆರೆಯಲು ಅಧಿಕಾರಿಗಳು ಅನುಮತಿ ನೀಡಿದ್ದಾರೆ. ಇದನ್ನು ಕೂಡಲೇ ಮುಚ್ಚಬೇಕು ಎಂದು ಆಗ್ರಹಿಸಿ ವಿದ್ಯಾರ್ಥಿಗಳು ಪ್ರತಿಭಟನೆ ನಡೆಸಿದ್ದರು.

ಇನ್ನು ಪ್ರತಿಭಟನೆ ಸ್ಥಳಕ್ಕೆ ಆಗಮಿಸಿದ ಯಲಹಂಕ ತಹಶಿಲ್ದಾರ್​ ರಘು ಮೂರ್ತಿ, ಸ್ಥಳ ಪರಿಶೀಲಿಸಿ ಬಾರ್ ಮಾಲೀಕರನ್ನು ತರಾಟೆಗೆ ತೆಗೆದುಕೊಂಡು ಕೂಡಲೇ ಬಾರ್ ಮುಚ್ಚುವಂತೆ ಹೇಳಿದ್ದಲ್ಲದೆ, ಹೇಳಿ ‌ಸ್ವತಃ ಅವರೇ ನಿಂತು ಬಾರ್ ಮುಚ್ಚಿಸಿದ್ದಾರೆ.