ಖಾಸಗಿ ಶಿಕ್ಷಣ ಸಂಸ್ಥೆಗಳಿಂದ ಪ್ರತಿಭಟನೆ: ಡಿ. 20ರಿಂದ ಆನ್​ಲೈನ್ ಕ್ಲಾಸ್​​ ಬಂದ್​!

ಶಿಕ್ಷಣ ಇಲಾಖೆಯಿಂದ ಖಾಸಗಿ ಶಾಲೆಗಳಿಗೆ ಹೊರಡಿಸಲಾಗಿದ್ದ ಆದೇಶವನ್ನು ಖಂಡಿಸಿ ಖಾಸಗಿ ಅನುದಾನ ರಹಿತ ಶಿಕ್ಷಣ ಸಂಸ್ಥೆಗಳು ಪ್ರತಿಭಟನೆ ನಡೆಸಲು ಮುಂದಾಗಿವೆ. ಅಲ್ಲದೇ ಡಿಸೆಂಬರ್​ 20ರಿಂದ ಆನ್​ಲೈನ್​ ಕ್ಲಾಸ್​ ಬಂದ್​ ಮಾಡುವ ನಿರ್ಧಾರ ಕೈಗೊಂಡಿವೆ.

ಬೆಂಗಳೂರು: ಖಾಸಗಿ ಅನುದಾನ ರಹಿತ ಶಿಕ್ಷಣ ಸಂಸ್ಥೆಗಳು (ರೂಪ್ಸಾ) ಇದೇ 20ರಿಂದ ಶಾಲೆಗಳನ್ನು ಮುಚ್ಚಿ ಆನ್​ಲೈನ್ ಕ್ಲಾಸ್ ಬಂದ್ ಮಾಡುವ ನಿರ್ಧಾರ ಕೈಗೊಂಡಿವೆ.

ಸರ್ಕಾರ ಶಾಲೆಗಳನ್ನ ಪುನಾರಂಭಿಸುವ ಸಮಯದಲ್ಲಿ ಶಾಲೆಗಳನ್ನ ಮುಚ್ಚಲು ರೂಪ್ಸಾ ಮುಂದಾಗಿದೆ. ಈಗಾಗಲೇ ಜಿಲ್ಲಾ ಕೇಂದ್ರಗಳಲ್ಲಿ ಸಾಂಕೇತಿಕವಾಗಿ ಪ್ರತಿಭಟನೆ ನಡೆಸಿ ಸರ್ಕಾರಕ್ಕೆ ‌ಮನವಿ ಮಾಡಿರುವ ಶಿಕ್ಷಣ ಸಂಸ್ಥೆಗಳು, ಈ ತಿಂಗಳ 10ನೇ ತಾರೀಖಿನವರೆಗೆ ಸರ್ಕಾರಕ್ಕೆ ಗಡುವು ಸಹ ನೀಡಿವೆ. ಇದೀಗ ಅಂತಿಮವಾಗಿ ಶಾಲೆಗಳನ್ನ ಬಂದ್ ಮಾಡಿ ಪ್ರತಿಭಟನೆಗೆ ಇಳಿಯಲು ನಿರ್ಧಾರ ಮಾಡಿವೆ.

ಸರ್ಕಾರದ ಮುಂದೆ ಮಾನ್ಯತೆ ಪಡೆದ ಖಾಸಗಿ ಅನುದಾನ ರಹಿತ ಶಾಲೆಗಳ ಒಕ್ಕೂಟದ ಬೇಡಿಕೆಗಳೇನು?

• 10-11-2020ರಂದು ಹೊರಡಿಸಿರುವ ಸುತ್ತೋಲೆ ಮರು ಪರಿಶೀಲನೆಗೆ ಒತ್ತಾಯ.
• ರಾಜ್ಯದಲ್ಲಿ ಇದುವರೆಗೂ ಸ್ವಾಭಾವಿಕ ಬೆಳವಣಿಗೆ ಅಡಿಯಲ್ಲಿ ಸಲ್ಲಿಸಿದ ತಿರಸ್ಕೃತ ಅರ್ಜಿಯನ್ನ ಕೋವಿಡ್-19 ಪರಿಸ್ಥಿತಿಗೆ ಅನುಗುಣವಾಗಿ ಕಾಲಾವಕಾಶ ನೀಡಿ ಅನುಮತಿ.
• 5 ಸಾವಿರ ಶಾಲೆಗಳ ನೋಂದಾವಣೆಗೆ (ರಿನೀವಲ್) ಸಲ್ಲಿಸಿದ ಶಾಲೆಗಳ ಪೆಡ್ಡಿಂಗ್ ಇರುವ ಅರ್ಜಿಗಳನ್ನು ಅದಾಲತ್ ರೂಪದಲ್ಲಿ ಏಕಕಾಲಕ್ಕೆ ವಿಲೇವಾರಿ ‌ಮಾಡಬೇಕು.
• 124 ಶಾಲೆಗಳನ್ನು ಮುಚ್ಚುವ ನಿರ್ಧಾರ ಹಿಂಪಡೆಯಬೇಕು.
• 25 ವರ್ಷಗಳಿಂದ ಅನುದಾನಕ್ಕೆ ಒಳಪಡದೆ ಇದ್ದ ಶಾಲೆಗಳನ್ನ ಅನುದಾನಕ್ಕೆ ಒಳಪಡಿಸಬೇಕು.
• ಇದುವರೆಗೂ ಖಾಸಗಿ ಶಾಲಾ ಶಿಕ್ಷಕರು ಸಂಬಳ ಇಲ್ಲದೆ ಸಂಕಷ್ಟದಲ್ಲಿದ್ದಾರೆ. ಅವರಿಗೆ ಆರ್ಥಿಕ ಪ್ಯಾಕೇಜ್ ಘೋಷಣೆ ಮಾಡಬೇಕು.
• ಆರ್ಥಿಕ ಸಂಕಷ್ಟದಲ್ಲಿರುವ ಶಾಲೆಗಳ ವಾಹನಗಳ ಸಾಲಗಳ ಮರುಪಾತಿ ಮುಂದೂಡಬೇಕು.
• ಶಾಲೆಗಳ ಕಟ್ಟಡಗಳು ಸುರಕ್ಷತಾ ಪ್ರಮಾಣ ಪತ್ರದ ಅಗತ್ಯತೆಯ ಕುರಿತು ಸುತ್ತೋಲೆ ಮರು ಪರಿಶೀಲನೆಗೆ ಒತ್ತಾಯ.

ಶಿಕ್ಷಣ ಇಲಾಖೆ ಹೊರಡಿಸಿರುವ ‌ಸುತ್ತೋಲೆಯಲ್ಲಿ ಇರುವ ಅಂಶಗಳೇನು?

• ಖಾಸಗಿ ಶಾಲೆಗಳು ಕಟ್ಟಡ ಮಾನದಂಡ ಅಳವಡಿಸಿಕೊಳ್ಳುವ ಬಗ್ಗೆ ಸೂತ್ತೋಲೆ.
• ಸರ್ಕಾರದ ಈ ಸುತ್ತೋಲೆಗೆ ಖಾಸಗಿ ಶಾಲೆಗಳ ಒಕ್ಕೂಟದಿಂದ ಆಕ್ರೋಶ.
• ಶಾಲೆಗಳ ಕಟ್ಟಡ ಮಾನದಂಡದ ಬಗ್ಗೆ ಸುರಕ್ಷತಾ ಪ್ರಮಾಣ ಪತ್ರ ಕಡ್ಡಾಯ.
• ಕೋರ್ಟ್ ತೀರ್ಪಿನ್ವಯ, ಅನುದಾನಿತ ಹಾಗೂ ಖಾಸಗಿ ಶಾಲೆಗಳ ಕಟ್ಟಡ ಹಾಗೂ ಕಟ್ಟಡದ ಗುಣಮಟ್ಟದ ಬಗ್ಗೆ ನ್ಯಾಷನಲ್ ಬಿಲ್ಡಿಂಗ್ ಕೋಡ್​ನಲ್ಲಿ ಸರ್ಟಿಫಿಕೇಟ್ ಪಡೆಯುವುದು ಕಡ್ಡಾಯ.
• ಅಗ್ನಿಶಾಮಕ ಇಲಾಖೆಯಿಂದಲೂ ಅಗ್ನಿನಂದಕ ಉಪಕರಣಗಳ ಲಭ್ಯತೆ ಬಗ್ಗೆ ಸರ್ಟಿಫಿಕೇಟ್ ಕಡ್ಡಾಯ.
• ಹೊಸ ಹಾಗೂ ನವೀಕರಣ, ಕಟ್ಟಡದ ಪ್ರಸ್ತುತ ಸ್ಥಿತಿ ಬಗ್ಗೆ ಸರ್ಟಿಫಿಕೇಟ್ ಪಡೆಯೋದು ಕಡ್ಡಾಯ.
• ಸುರಕ್ಷಿತ ಕ್ರಮ ವಹಿಸದ ಶಾಲೆಗಳ ವಿರುದ್ಧ ಸರ್ಕಾರದ ಚಾಟಿ.
• ಸರ್ಟಿಫಿಕೇಟ್ ಇಲ್ದೇ ಇರೋ ಶಾಲೆಗಳ ಅನುಮತಿ ರದ್ದು.

ಶಿಕ್ಷಣ ಇಲಾಖೆಯಿಂದ ಖಾಸಗಿ ಶಾಲೆಗಳಿಗೆ ಆದೇಶ ಹೊರಡಿಸಿದ್ದು, ಇದೀಗ ಅದುವೇ ಸಂಕಷ್ಟವಾಗಿದೆ. ಖಾಸಗಿ ಶಾಲೆಗಳಿಗೆ ಮಾತ್ರ ಯಾಕೆ ಈ ರೂಲ್ಸ್? ಸರ್ಕಾರಿ ಶಾಲೆಗಳಿಗೆ ಯಾಕಿಲ್ಲಾ ಈ ರೂಲ್ಸ್‌? ಸರ್ಕಾರಿ‌ ಶಾಲೆಗಳು ಎಲ್ಲವೂ ಸುರಕ್ಷಿತವಾಗಿವೆಯೇ, ಖಾಸಗಿ ಶಾಲೆಗಳನ್ನ ಮುಚ್ಚಿಸಲು ಇದು ಷಡ್ಯಂತ್ರನಾ ಎಂದು ಆರೋಪಿಸಿದ್ದಾರೆ. ಖಾಸಗಿ ಶಾಲೆ ಮುಚ್ಚಿಸಿ ಸರ್ಕಾರಿ ‌ಶಾಲೆಗಳ ವಿದ್ಯಾರ್ಥಿಗಳ ಸಂಖ್ಯೆ ಹೆಚ್ಚಿಸುವ ಹುನ್ನಾರ ಅಂತಾ ಆಕ್ರೋಶ ಹೊರಹಾಕಿದ್ದಾರೆ. ಈ ನಿಯಮದಿಂದ 10 ಸಾವಿರ ಖಾಸಗಿ ಶಾಲೆಗಳನ್ನು ಕ್ಲೋಸ್ ಮಾಡ್ಬೇಕಾಗುತ್ತೆ ಎಂಬುದು ಖಾಸಗಿ ಸಂಸ್ಥೆಗಳ ಆರೋಪವಾಗಿದೆ.

ಸರ್ಕಾರ ಖಾಸಗಿ ಶಾಲೆಗಳ ಸಿಬ್ಬಂದಿ, ಮಾಲೀಕರ ಹೊಟ್ಟೆ ಮೇಲೆ ಹೊಡೆಯೋ ಕೆಲಸ ಮಾಡ್ತಿದೆ. ನಮ್ಗೂ ಕಷ್ಟ ಇದೆ, ನಮ್ಮ ಕಷ್ಟವನ್ನು ಆಲಿಸಿ ಅಂತಾ ಶಿಕ್ಷಣ ಇಲಾಖೆಗೆ ಮನವಿ ಮಾಡಿದ್ದಾರೆ. ಇದೇ 20ರಂದು ರೂಪ್ಸಾದಿಂದ ಸಭೆ ನಡೆಯಲಿದ್ದು, ಅದರಲ್ಲಿ ನಿರ್ಣಯ ತೆಗೆದುಕೊಳ್ಳಲಾಗುವುದು ಅಂತ ಲೋಕೇಶ್ ಮಾಹಿತಿ ನೀಡಿದ್ದಾರೆ.

ರೂಪ್ಸಾ/ ಕ್ಯಾಮ್ಸ್ ನಡುವೆ ಮುಸುಕಿನ ಗುದ್ದಾಟ:

ಇತ್ತ ನೋಂದಾಯಿತ ಖಾಸಗಿ ಶಾಲೆಗಳ ಸಂಘಟನೆ ಹಾಗೂ ಖಾಸಗಿ ಅನುದಾನ ರಹಿತ ಶಾಲೆಗಳ ಒಕ್ಕೂಟಗಳ ನಡುವೆ ಮುಸುಕಿನ ಗುದ್ದಾಟ ಶುರುವಾಗಿದೆ‌. ಒಂದು ಕಡೆ ರೂಪ್ಸಾ ರಾಜ್ಯಾದ್ಯಂತ ಆನ್​​ಲೈನ್ ಕ್ಲಾಸ್ ಬಂದ್ ಮಾಡ್ತೀವಿ ಅಂದರೆ, ಇತ್ತ ಕ್ಯಾಮ್ಸ್ ಕಾರ್ಯದರ್ಶಿ ಶಶಿಕುಮಾರ್ ನಮ್ಮ ಒಕ್ಕೂಟದ ಅಡಿ ಬರುವ ಯಾವ ಶಾಲೆ ಬಂದ್ ಆಗುವುದಿಲ್ಲ. ಆನ್​​ಲೈನ್‌ ಕ್ಲಾಸ್ ನಡೆಯಲಿದೆ ಎಂದಿದ್ದಾರೆ. ನಮ್ಮ ಒಕ್ಕೂಟದಲ್ಲಿ 4 ಸಾವಿರ ಶಾಲೆಗಳು ನೋಂದಣಿ ಮಾಡಿಕೊಂಡಿದ್ದು, ನಾವು ಯಾವುದೇ ಬಂದ್​ಗೆ ಬೆಂಬಲ ನೀಡೋದಿಲ್ಲ ಎಂದಿದ್ದಾರೆ.