ಖಾಸಗಿ ಬಸ್‌ಗಳ ಟಿಕೆಟ್ ದರ ಡಬಲ್‌! : ಚುನಾವಣಾ ಆಯೋಗ, ಸಾರಿಗೆ ಇಲಾಖೆಗೆ ದೂರು

ನಿನ್ನೆ 500, 600 ರೂ ಇದ್ದ ಬಸ್‌ ಟಿಕೆಟ್ ಬೆಲೆ ಇಂದು 1,300 ರೂಪಾಯಿಗೆ ಏರಿಕೆಯಾಗಿದೆ. ಖಾಸಗಿ ಬಸ್​​​ಗಳ ಈ ಟಿಕೆಟ್ ದಂಧೆ ಮತದಾನದ ಮೇಲೆ ಕೆಟ್ಟ ಪರಿಣಾಮ ಬೀರಲಿದೆ ಎಂದು ಆರೋಪಿಸಿ ಖಾಸಗಿ ಬಸ್​​​​ ಮಾಲೀಕರುಗಳ ವಿರುದ್ಧ, ಕನ್ನಡ ಒಕ್ಕೂಟ ಅಧ್ಯಕ್ಷ ನಾಗೇಶ್ ಚುನಾವಣಾ ಆಯೋಗ ಹಾಗು ಸಾರಿಗೆ ಇಲಾಖೆಗೆ ದೂರು ನೀಡಿದರು.

ಬೆಂಗಳೂರು:ಲೋಕಸಭೆ ಚುನಾವಣೆ ಹಿನ್ನೆಲೆಯಲ್ಲಿ ಸರ್ಕಾರಿ ಬಸ್​​​​ಗಳು ಹೆಚ್ಚಿನ ಸಂಖ್ಯೆಯಲ್ಲಿ ಚುನಾವಣಾ ಕಾರ್ಯಕ್ಕೆ ನಿಯೋಜನೆಗೊಂಡಿವೆ. ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಖಾಸಗಿ ಬಸ್​​​​​ ಮಾಲೀಕರುಗಳು ತಮ್ಮ ಬಸ್‌ಗಳ ಟಿಕೆಟ್‌ ದರಗಳನ್ನು ಡಬಲ್‌ ಮಾಡಿದ್ದಾರೆ.

ಎಲೆಕ್ಷನ್ ಬಂತು, ಊರಿಗೆ ಹೋಗಿ ವೋಟ್ ಹಾಕಿ ಬರೋಣ ಅಂತ ಮುಂಚಿತವಾಗಿ ಬಸ್ ಸೀಟ್ ಟಿಕೆಟ್ ಬುಕ್ ಮಾಡಬೇಕು ಎಂದುಕೊಂಡವರು, ಬಸ್ ಟಿಕೆಟ್ ದರ ನೋಡಿ ಬೆಚ್ಚಿಬೀಳುತ್ತಿದ್ದಾರೆ. ನಿನ್ನೆ ಮೊನ್ನೆ 500, 600 ರೂ ಇದ್ದ ಟಿಕೆಟ್ ಬೆಲೆ ದರ ಇಂದು 1,300 ರೂಪಾಯಿ ಆಗಿದೆ. ಖಾಸಗಿ ಬಸ್​​​ಗಳ ಈ ಟಿಕೆಟ್ ದಂಧೆಯಿಂದ ಮತದಾನದ ಪ್ರಮಾಣ ಕಡಿಮೆಯಾಗುತ್ತಿದೆ ಎನ್ನಲಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಖಾಸಗಿ ಬಸ್​​​​ಗಳ ವಿರುದ್ಧ ಕನ್ನಡ ಒಕ್ಕೂಟ ಅಧ್ಯಕ್ಷ ನಾಗೇಶ್ ಇಂದು ಚುನಾವಣಾ ಆಯೋಗ ಹಾಗು ಸಾರಿಗೆ ಇಲಾಖೆಗೆ ದೂರು ನೀಡಿದರು.

ಖಾಸಗಿ ಬಸ್ಸುಗಳ ವಿರುದ್ಧ ದೂರು ಬಂದ ಹಿನ್ನೆಲೆಯಲ್ಲಿ ಚುನಾವಣಾ ಆಯೋಗ ಆರ್​​​​ಟಿಓ ಅಧಿಕಾರಿಗಳ ಸಭೆ ಕರೆದಿದ್ದಾರೆ. ಈ ಬಗ್ಗೆ ಮಾತಾನಾಡಿದ ಅಪರ ಸಾರಿಗೆ ಆಯುಕ್ತ ನರೇಂದ್ರ ಹೊಳ್ಕರ್, ದರ ಏರಿಕೆ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತಿದ್ದು, ಇದುವರೆಗೂ 600 ಟ್ರಾವೆಲ್ಸ್‌​​​​ಗಳ ಮೇಲೆ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ ಎಂದರು.

ಈ ಹಿಂದೆ ನಡೆದ ಚುನಾವಣೆಗಳ ವೇಳೆಯಲ್ಲೂ ದೂರುಗಳ ಹಿನ್ನೆಲೆಯಲ್ಲಿ ತನಿಖೆ ನಡೆಸಿ ಕ್ರಮ ಕೈಗೊಳ್ಳಲಾಗಿದೆ. ಒಟ್ಟು, 842 ವಾಹನಗಳ ವಿರುದ್ಧ ಕ್ರಮಕೈಗೊಂಡಿದ್ದು, 584 ವಾಹನಗಳ ಲೈಸೆನ್ಸ್ ಅಮಾನತು ಮಾಡಲಾಗಿದೆ. ‌368 ವಾಹನಗಳ ವಿರುದ್ಧ ದಂಡ ವಿಧಿಸಿ, 1ಕೋಟಿ 35 ಲಕ್ಷ ದಂಡ ವಿಧಿಸಲಾಗಿದ್ದು ಕೋರ್ಟ್‌ನಲ್ಲಿ ಜಾರ್ಜ್ ಶೀಟ್ ಸಲ್ಲಿಸಲಾಗಿದೆ ಅಂತ ತಿಳಿಸಿದರು.