ಇನ್ಮುಂದೆ ಈ ಬ್ಯಾಗ್​ ಬಳಸಿದ್ರೂ ಬೀಳುತ್ತೆ ದಂಡ.. ಪಾಲಿ ಪ್ರೋಪಿಲಿನ್​ ಚೀಲ ಮಾರಾಟಕ್ಕೂ ಬ್ರೇಕ್​

ಪಾಲಿ ಪ್ರೋಪಿಲಿನ್ ಬ್ಯಾಗ್​ಗಳು ಮಣ್ಣಿನಲ್ಲಿ ಕರಗುವುದಿಲ್ಲ, ಇದು ಬಟ್ಟೆ ಬ್ಯಾಗ್​ ಎಂದು ನಂಬಿ ಮೋಸಹೋಗಬೇಡಿ ಎಂದು ಟ್ವಿಟರ್​ ಬಳಕೆದಾರರೊಬ್ಬರು ಪೋಸ್ಟ್​ ಮಾಡಿದ್ದರು ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಬಿಬಿಎಂಪಿ ಘನ ತ್ಯಾಜ್ಯ ವಿಭಾಗದ ಆಯುಕ್ತ ಡಿ. ರಂದೀಪ್​ ಅವರು ಪಾಲಿ ಪ್ರೋಪಿಲಿನ್​ ಬ್ಯಾಗ್​ಗಳ ಮಾರಾಟವನ್ನೂ ನಿಷೇಧಿಸುವುದಾಗಿ ಹೇಳಿದ್ದಾರೆ.

ಹೈದರಾಬಾದ್ : ಪ್ಲ್ಯಾಸ್ಟಿಕ್​ ಕವರ್​ಗಳ ಮಾರಾಟದ ಮೇಲೆ ಹದ್ದಿನ ಕಣ್ಣಿಟ್ಟಿದ್ದ ಬಿಬಿಎಂಪಿ ಇನ್ನುಮುಂದೆ ಬಟ್ಟೆ ಬ್ಯಾಗ್​ನಂತೆ ಕಾಣುವ ಅರೆ ಪ್ಲಾಸ್ಟಿಕ್​ ಬ್ಯಾಗ್​ಗಳನ್ನೂ ನಿಷೇಧಿಸಲಿದೆ.

ಪಾಲಿ ಪ್ರೋಪಿಲಿನ್​ ಎಂದು ಕರೆಯುವ ಬ್ಯಾಗ್​ಗಳನ್ನು ಅಂಗಡಿ, ಮಾಲ್​ ಹಾಗೂ ಮದುವೆ ಮನೆಗಳಲ್ಲಿ ತಾಂಬೂಲ ನೀಡಲೂ ಬಳಕೆ ಮಾಡಲಾಗುತ್ತದೆ. ಈ ಬ್ಯಾಗ್​ಗಳು ಮಣ್ಣಿನಲ್ಲಿ ಕರಗುವುದಿಲ್ಲ, ಇದು ಬಟ್ಟೆ ಬ್ಯಾಗ್​ ಎಂದು ನಂಬಿ ಮೋಸಹೋಗಬೇಡಿ ಎಂದು ಟ್ವಿಟರ್​ ಬಳಕೆದಾರರೊಬ್ಬರು ಪೋಸ್ಟ್​ ಮಾಡಿದ್ದರು ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಬಿಬಿಎಂಪಿ ಘನ ತ್ಯಾಜ್ಯ ವಿಭಾಗದ ಆಯುಕ್ತ ಡಿ. ರಂದೀಪ್​ ಅವರು ಪಾಲಿ ಪ್ರೋಪಿಲಿನ್​ ಬ್ಯಾಗ್​ಗಳ ಮಾರಾಟವನ್ನೂ ನಿಷೇಧಿಸುವುದಾಗಿ ಹೇಳಿದ್ದಾರೆ.

ಸಿದ್ಧಾರ್ಥ್​ ನಾಯಕ್​ ಎನ್ನುವವರು ಟ್ವೀಟ್​ ಮಾಡಿ ದಯವಿಟ್ಟು ಯಾರೂ ಮೋಸ ಹೋಗಬೇಡಿ. ಪಾಲಿ ಪ್ರೋಪಿಲಿನ್​ ಬ್ಯಾಗ್​ಗಳನ್ನು ಪಾಲಿಥಿನ್​ ಹ್ಯಾಂಡ್​ ಕವರ್​ಗೆ ಪರ್ಯಾಯ ಎಂದು ನಂಬಿಸಲಾಗುತ್ತಿದೆ. ಅಲ್ಲದೇ ಇದು ಪರಿಸರ ಸ್ನೇಹಿ ಬ್ಯಾಗ್​ ಎಂದೂ ಮಂಕುಬೂದಿ ಎರಚಲಾಗುತ್ತಿದೆ. ಇದು ಶುದ್ಧ ಸುಳ್ಳು. ಇದನ್ನು ನಂಬಿ ಮೋಸಹೋಗಬೇಡಿ. ಪಾಲಿ ಪ್ರೋಪಿಲಿನ್​ ಬ್ಯಾಗ್​ಗಳು ಮಣ್ಣಿನಲ್ಲಿ ಕರಗುವುದಿಲ್ಲ. ಹಾಗಾಗಿ ಇದೂ ಕೂಡ ಪರಿಸರಕ್ಕೆ ಹಾನಿಕಾರಕ ಎಂದು ಹೇಳಿದ್ದರು.

ರಂದೀಪ್​ ಹೇಳಿದ್ದೇನು?
ನಾನ್​ ವೋವೆನ್​ ಪಾಲಿಪ್ರೋಪಿಲಿನ್​ ಬ್ಯಾಗ್​ಗಳು ಪ್ಲಾಸ್ಟಿಕ್​-ಬಟ್ಟೆ ಎರಡೂ ಅಲ್ಲ. ಅದು ಪ್ಲಾಸ್ಟಿಕ್​ಗೆ ಪರ್ಯಾಯವಲ್ಲ. ಎರಡೂ ಕೂಡ ಬ್ಯಾನ್​ ಆಗಿರುವ ಪಾಲಿಥಿನ್​ ಪ್ಲಾಸ್ಟಿಕ್​ ಬ್ಯಾಗ್​ಗಳಿಗೆ ಸಮವಾಗಿರುವುದರಿಂದ ಅವುಗಳ ಮಾರಾಟಗಾರರಿಗೆ ದಂಡ ವಿಧಿಸಲಾಗುವುದು.

ಏನಿದು ಪಾಲಿ ಪ್ರೋಪಿಲಿನ್​?
ಪಾಲಿಪ್ರೋಪಿಲಿನ್​ನಲ್ಲಿ ವೋವೆನ್​ ಹಾಗೂ ನಾನ್​ ವೋವೆನ್​ ಎಂಬ ಎರಡು ಬಗೆಗಳಿವೆ. ಎರಡನ್ನೂ ಕೂಡ ರೀಸೈಕಲ್​ ಮಾಡಿದ ಪ್ಲಾಸ್ಟಿಕ್​ನಿಂದ ಮಾಡಲಾಗುತ್ತದೆ. ಪಾಲಿಮರ್​​ ಮತ್ತು ಪ್ಲಾಸ್ಟಿಕ್​ನ ಸಂಯೋಜನೆಯಿಂದಾಗಿ ಇದರ ಮೆಟೀರಿಯಲ್​ ತಯಾರಾಗುತ್ತದೆ.

ಎಲ್ಲಿ ಬಳಕೆ ಆಗುತ್ತದೆ?
ನಾನ್​ ವೋವೆನ್​ ಪಾಲಿ ಪ್ರೋಪಿಲಿನ್​ ಎಂದು ಕರೆಯುವ ಈ ಮೆಟೀರಿಯಲ್​ಅನ್ನು ಟೀಬ್ಯಾಗ್​ಗಳು, ಫೇಸ್​ ಟಿಶ್ಯೂ, ಬಟ್ಟೆಗಳ ಪ್ಯಾಕೇಜಿಂಗ್​ನಲ್ಲಿ ಇದು ಮಹತ್ವದ ಪಾತ್ರ ವಹಿಸುತ್ತದೆ. ಮಾರುಕಟ್ಟೆ ಪ್ರದೇಶಗಳಲ್ಲಿ ಇದು 2ರಿಂದ 5 ರೂಪಾಯಿವರೆಗೂ ಮಾರಾಟವಾಗುತ್ತದೆ. ಮದುವೆಮನೆಗಳಲ್ಲಿ ತಾಂಬೂಲ ನೀಡಲು ಈ ಕವರ್​ ಬಳಸುತ್ತಾರೆ.

ಮೊದಲು ತಯಾರಾಗಿದ್ದು ಯಾವಾಗ?
1951ರಲ್ಲಿ ಪೆಟ್ರೋಲಿಯಂ ವಿಜ್ಞಾನಿ ಪೌಲ್​ ಹೊಗನ್​ ಮತ್ತು ರಾಬರ್ಟ್​ ಬ್ಯಾಂಕ್ಸ್​ ಅವರು ಈ ಉತ್ಪನ್ನವನ್ನು ಕಂಡುಹಿಡಿದರು. ಪ್ಲಾಸ್ಟಿಕ್​ ಹಾಗೂ ಪಾಲಿಮರ್​ಅನ್ನು ಬಳಸಿ ಪ್ಲಾಸ್ಟಿಕ್​ಅನ್ನು ಮೃದುವಾಗಿಸಿ ಬಟ್ಟೆಯಂತೆ ಮಾಡುವುದು ಇದರ ಪ್ರಕ್ರಿಯೆ. ಈ ಉತ್ಪನ್ನ ಬಹು ಬೇಗನೆ ಬೇಡಿಕೆ ಪಡೆದುಕೊಂಡಿತು. ಪರಿಣಾಮವಾಗಿ ಇಬ್ಬರೂ ವಿಜ್ಞಾನಿಗಳು ದಿಢೀರ್​ ಶ್ರೀಮಂತರಾದರು.

ಮಾರಾಟ ಮಾಡುವವರು ಯಾರು?

ಪಾಲಿ ಪ್ರೋಪಿಲಿನ್​ ಬ್ಯಾಗ್​ಗಳನ್ನು ಸಾಮಾನ್ಯವಾಗಿ ಮಾರುಕಟ್ಟೆಗಳಲ್ಲಿ ಮಾರಾಟಮಾಡುತ್ತಾರೆ. ಫ್ಲಿಪ್​ಕಾರ್ಟ್​, ಅಮೇಜಾನ್​ ನಂತರ ಆನ್​ಲೈನ್​ ಮಾರುಕಟ್ಟೆ ತಾಣಗಳಲ್ಲೂ ಕೂಡ ಈ ಬ್ಯಾಗ್​ಗಳು ಲಭ್ಯವಾಗುತ್ತವೆ. ಪ್ಲಾಸ್ಟಿಕ್​ಗಿಂತ ಹೆಚ್ಚು ತೂಕ ತಡೆಯುವ ಈ ಬ್ಯಾಗ್​ಗಳು ಪರಿಸರ ಸ್ನೇಹಿ ಎಂದು ಹೇಳಲಾಗುತ್ತಿತ್ತು.