ಡಿಕೆಶಿ ಸಿಬಿಐ ಕಚೇರಿಗೆ ಆಗಮನ ಹಿನ್ನೆಲೆ: ಗಂಗಾನಗರ ಆಫೀಸ್ ಎದುರು ಬಂದೋಬಸ್ತ್​

ಸಿಬಿಐ ವಿಚಾರಣೆಗೆ ಸಂಬಂಧಿಸಿದಂತೆ ಡಿ.ಕೆ ಶಿವಕುಮಾರ್ ಇಂದು ಮಧ್ಯಾಹ್ನದ ನಂತರ ಡಿಕೆ ಹೆಬ್ಬಾಳ ಬಳಿಯ ಗಂಗಾನಗರ ಸಿಬಿಐ ಕಚೇರಿ ಮುಂದೆ ಹಾಜರಾಗಲಿದ್ದಾರೆ. ಹೀಗಾಗಿ ಡಿಕೆಶಿ ವಿಚಾರಣೆಗೆ ಹಾಜರಾಗುವ ಸಂದರ್ಭದಲ್ಲಿ ಯಾರನ್ನೂ ಸಿಬಿಐ ಕಚೇರಿ ಸುತ್ತ ಬಾರದ ಹಾಗೆ ಪೊಲೀಸರು ತಡೆಯಲಿದ್ದಾರೆ.

ಬೆಂಗಳೂರು:ಬೀದರ್​ನಿಂದ ಡಿ.ಕೆ. ಶಿವಕುಮಾರ್ ಸಹೋದರ ಡಿಕೆ ಸುರೇಶ್ ನಿವಾಸಕ್ಕೆ ಆಗಮಿಸಿದ್ದಾರೆ. ಅಕ್ರಮವಾಗಿ ಹಣ ಸಂಪಾದನೆ ಮಾಡಿರುವ ಆರೋಪ ಹೊತ್ತಿರುವ ಡಿಕೆಶಿಗೆ ಸಿಬಿಐ ವಿಚಾರಣೆಗೆ ಹಾಜರಾಗುವಂತೆ ನೋಟಿಸ್ ನೀಡಿದೆ. ಈ ಹಿನ್ನೆಲೆಯಲ್ಲಿ ಇಂದು ಮಧ್ಯಾಹ್ನದ ನಂತರ ಡಿಕೆ ಹೆಬ್ಬಾಳ ಬಳಿಯ ಗಂಗಾನಗರ ಸಿಬಿಐ ಕಚೇರಿ ಮುಂದೆ ಹಾಜರಾಗಲಿದ್ದಾರೆ.

ಸುರೇಶ್ ಮನೆಯಲ್ಲಿ ಮೀಟಿಂಗ್ ‌ಮಾಡುತ್ತಿದ್ದು, ಮೀಟಿಂಗ್​ನಲ್ಲಿ ಆಡಿಟರ್, ವಕೀಲರು ಭಾಗಿಯಾಗಿದ್ದಾರೆ. ಸಹೋದರ ಸುರೇಶ್ ಜೊತೆ ಮಾತನಾಡಿದ ಬಳಿಕ ಸಿಬಿಐ ವಿಚಾರಣೆಗೆ ತೆರಳಲಿದ್ದಾರೆ. ಇನ್ನು ಈ ಹಿಂದೆ ಡಿಕೆಶಿ ನಿವಾಸದ ಮೇಲೆ ಸಿಬಿಐ ದಾಳಿ ನಡೆದಾಗ ಕಾರ್ಯಕರ್ತರು ಗುಂಪು ಸೇರಿ ಪ್ರತಿಭಟನೆ ನಡೆಸಿದ್ದರು.‌ ಹೀಗಾಗಿ ಯಾವುದೇ ತೊಂದರೆಯಾಗಬಾರದೆಂದು ಸದ್ಯ ಆರ್​ಟಿ ನಗರ ಪೊಲೀಸರು ಭದ್ರತೆ ಮಾಡಿದ್ದು, ಸ್ಥಳದಲ್ಲಿ 1 ಕೆಎಸ್​ಆರ್​ಪಿ ನಿಯೋಜನೆ ಮಾಡಲಾಗಿದೆ. ಹಾಗೆಯೇ ಇನ್ಸ್​ಪೆಕ್ಟರ್​, ಸಬ್ ಇನ್ಸ್​ಪೆಕ್ಟರ್, ಕಾನ್ಸ್‌ಟೇಬಲ್ ಮೊಕ್ಕಾಂ ಹೂಡಿದ್ದಾರೆ.

ಇನ್ನು ಡಿಕೆಶಿ ವಿಚಾರಣೆಗೆ ಹಾಜರಾಗುವ ಸಂದರ್ಭದಲ್ಲಿ ಯಾರನ್ನೂ ಸಿಬಿಐ ಕಚೇರಿ ಸುತ್ತ ಸೇರದಂತೆ ಪೊಲೀಸರು ತಡೆಯಲಿದ್ದಾರೆ.