ಬೆಂಗಳೂರು:ಸಂಚಾರಿ ನಿಯಮ ಉಲ್ಲಂಘಿಸಿದ ವಾಹನ ಸವಾರರೊಬ್ಬರು ದಂಡ ವಿಧಿಸಿದ ಪೊಲೀಸರ ಬಳಿ ಸೂಕ್ತ ಸಾಕ್ಷಿ ಕೇಳಿದ್ದರು. ಈ ಪ್ರಕರಣದಲ್ಲಿ ನಗರ ಸಂಚಾರಿ ಪೊಲೀಸರ ಟ್ವೀಟ್ ಪ್ರತಿಕ್ರಿಯೆ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಗಮನ ಸೆಳೆಯುತ್ತಿದೆ.
ಫೆಲಿಕ್ಸ್ ರಾಜ್ ಹೆಸರಿನ ಟ್ವಿಟರ್ ಖಾತೆಯ ಬಳಕೆದಾರರಿಗೆ ಹೆಲ್ಮೆಟ್‌ರಹಿತ ದ್ವಿಚಕ್ರ ವಾಹನ ಚಾಲನೆಗಾಗಿ ಸಂಚಾರಿ ಪೊಲೀಸರು ಸ್ಕೂಟರ್ ನಂಬರ್ ಪ್ಲೇಟ್ ಫೋಟೋ ಸಹಿತ ದಂಡದ ರಶೀದಿ ರವಾನಿಸಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ ಚಾಲಕ ರಶೀದಿಯ ಫೋಟೋವನ್ನು ಟ್ವೀಟ್ ಮಾಡಿ, ತನ್ನ ನಿಯಮ ಉಲ್ಲಂಘನೆಗೆ ಸಾಕ್ಷಿ ನೀಡುವಂತೆ ಕೇಳಿದ್ದರು. ಇಲ್ಲವಾದಲ್ಲಿ ದಂಡವನ್ನು ಹಿಂಪಡೆಯುವಂತೆಯೂ ಸವಾಲೆಸೆದಿದ್ದರು. ಕೆಲವೇ ನಿಮಿಷಗಳಲ್ಲಿ ಪ್ರತಿಕ್ರಿಯಿಸಿರುವ ಬೆಂಗಳೂರು ಸಂಚಾರಿ ಪೊಲೀಸ್ ಅಧಿಕೃತ ಟ್ವಿಟರ್ ಹ್ಯಾಂಡಲ್ ಮೂಲಕ ಸ್ಕೂಟರ್ ಚಾಲಕ ಹೆಲ್ಮೆಟ್ ಧರಿಸದಿರುವ ಫೋಟೋವನ್ನು ಲಗತ್ತಿಸಿದ್ದಾರೆ.