ಪಾಕಿಸ್ತಾನ ಜಿಂದಾಬಾದ್ ಪ್ರಕರಣ: ನಾಲ್ಕು ದಿನ ಪೊಲೀಸ್ ಕಸ್ಟಡಿಗೆ‌ ಯುವತಿ ಅಮೂಲ್ಯ

ಪಾಕಿಸ್ತಾನ ಜಿಂದಾಬಾದ್ ಕೂಗಿದ ಪ್ರಕರಣ ಸಂಬಂಧ ಯುವತಿ ಅಮೂಲ್ಯಳನ್ನು‌ ನಾಲ್ಕು ದಿನಗಳ ಕಾಲ‌ ಪೊಲೀಸ್ ಕಸ್ಟಡಿಗೆ‌ ನೀಡಿ‌ ಐದನೇ ಎಸಿಎಂಎಂ ನ್ಯಾಯಾಧೀಶರು ಆದೇಶಿಸಿದ್ದಾರೆ.

ಬೆಂಗಳೂರು:ಪಾಕಿಸ್ತಾನ ಜಿಂದಾಬಾದ್ ಕೂಗಿದ ಪ್ರಕರಣ ಸಂಬಂಧ ಯುವತಿ ಅಮೂಲ್ಯಳನ್ನು‌ ನಾಲ್ಕು ದಿನಗಳ ಕಾಲ‌ ಪೊಲೀಸ್ ಕಸ್ಟಡಿಗೆ‌ ನೀಡಿ‌ ಐದನೇ ಎಸಿಎಂಎಂ ನ್ಯಾಯಾಧೀಶರು ಆದೇಶಿಸಿದ್ದಾರೆ.

ಕಾನೂನು ಸುವ್ಯವಸ್ಥೆ ಧಕ್ಕೆ ಹಿನ್ನೆಲೆಯಲ್ಲಿ ಕೋರಮಂಗಲದ ಎನ್​ಜಿವಿ ಬಡಾವಣೆಯಲ್ಲಿರುವ ಐದನೇ ಎಸಿಎಂಎಂ ನ್ಯಾಯಾಧೀಶರ ಮನೆಗೆ ಅಮೂಲ್ಯಳನ್ನು ಮಂಗಳವಾರ‌ ಪೊಲೀಸರು ಹಾಜರುಪಡಿಸಿದರು. ಅಮೂಲ್ಯಳ ವಿಚಾರಣೆಗಾಗಿ ಪೊಲೀಸ್ ವಶಕ್ಕೆ ನೀಡುವಂತೆ ಅಭಿಯೋಜಕರ ಮನವಿ ಪುರಸ್ಕರಿಸಿದ ನ್ಯಾಯಾಧೀಶರು‌ ನಾಲ್ಕು ದಿನಗಳ‌ ಕಾಲ ಪೊಲೀಸ್ ವಶಕ್ಕೆ‌ ನೀಡಿದರು.

ನ್ಯಾಯಾಧೀಶರ ಅನುಮತಿ ಪಡೆದು ಬಸವೇಶ್ವರ ನಗರ ಠಾಣಾ ವ್ಯಾಪ್ತಿಯಲ್ಲಿ ಕಳೆದ‌ ಮೂರು ವರ್ಷಗಳಿಂಎ ವಾಸವಾಗಿದ್ದ ಅಮೂಲ್ಯಳನ್ನು ಪಿಜಿಗೆ ಕರೆದೊಯ್ದು ಪರಿಶೀಲಿಸಿದರು. ನಂತರ ಠಾಣೆಯಲ್ಲೇ ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ. ಈಗಾಗಲೇ ಆಕೆಯ ಸ್ನೇಹಿತರು ಹಾಗೂ ಆಕೆಯ ಪೋಸ್ಟ್​ಗಳಿಗೆ ಕಮೆಂಟ್‌ ಮಾಡಿರುವವರನ್ನ ವಿಚಾರಣೆ ನಡೆಸಿದ್ದಾರೆ.

ಬಸವೇಶ್ವರ ನಗರ ಪೊಲೀಸ್ ಠಾಣೆ ಬಳಿ ಒಂದು ಕೆಎಸ್​ಆರ್​ಪಿ ತುಕಡಿ ಹಾಗೂ ಬೇರೆ ಠಾಣೆಯ ಮಹಿಳಾ ಪೊಲೀಸರನ್ನು ನಿಯೋಜಿಸಲಾಗಿದೆ.