ನಂದಿನಿ vs ಅಮುಲ್: ವಿವಾದವೇಕೆ? ವಾಸ್ತವ ಏನು?

ನಂದಿನಿ-ಅಮುಲ್ ವಿಚಾರ ಇದೀಗ ಪ್ರತಿಪಕ್ಷ ಹಾಗೂ ಆಡಳಿತಾರೂಢ ಬಿಜೆಪಿ ಮಧ್ಯೆ ತೀವ್ರ 'ಹಾಲಾಹಲ'ಕ್ಕೆ ಕಾರಣವಾಗಿದೆ‌. ಆರೋಪ-ಪ್ರತ್ಯಾರೋಪಗಳ ಮಧ್ಯೆ ಹಾಲಿನ ವಾಸ್ತವತೆ ನೋಡೋಣ.

ಕರ್ನಾಟಕದಲ್ಲಿ ಸದ್ಯ ನಂದಿನಿ-ಅಮುಲ್ ಮಧ್ಯೆ ಪೈಪೋಟಿ ನಡೆಯುತ್ತಿದೆ. ರಾಜ್ಯದಲ್ಲಿ ಅಮುಲ್ ಹಾಲು ಮಾರಾಟ ಮಾಡುತ್ತಿರುವ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ, ಅದರಲ್ಲೂ ಮುಖ್ಯವಾಗಿ ರಾಜಕೀಯವಾಗಿ ವ್ಯಾಪಕ ವಿರೋಧ ವ್ಯಕ್ತವಾಗುತ್ತಿದೆ. ಚುನಾವಣೆಯ ಹೊಸ್ತಿಲಲ್ಲಿ ಈ ಜಟಾಪಟಿ ಇನ್ನೂ ತಾರಕಕ್ಕೇರಿದೆ. ಅಷ್ಟಕ್ಕೂ ರಾಜ್ಯದ ಹೆಮ್ಮೆಯ ನಂದಿನಿ ಬ್ರಾಂಡ್ ಬುನಾದಿ, ಅಮುಲ್ ಮಾರುಕಟ್ಟೆ, ಸಹಕಾರ ತತ್ವ ಏನಿದೆ ಎಂಬ ಸಮಗ್ರ ವರದಿ ಇಲ್ಲಿದೆ.

ಕರ್ನಾಟಕ ಸಹಕಾರ ಹಾಲು ಉತ್ಪಾದಕರ ಮಹಾಮಂಡಳಿ (ಕೆಎಂಎಫ್) ದೇಶದ 2ನೇ ಅತೀ ದೊಡ್ಡ ಸಹಕಾರ ಹಾಲು ಮಹಾಮಂಡಳ ಸಂಸ್ಥೆ. ಗುಜರಾತ್ ಮೂಲದ ಅಮುಲ್ ದೇಶದ ಅಗ್ರಗಣ್ಯ ಸಹಕಾರ ಹಾಲು ಮಹಾಮಂಡಳ. ಸದ್ಯ ಈ ಎರಡೂ ಬ್ರಾಂಡ್​​ಗಳ ಹಾಲಿನ ವಿಚಾರ ರಾಜ್ಯದಲ್ಲಿ ಸಂಘರ್ಷ ಉಂಟು ಮಾಡಿದೆ. ಚುನಾವಣೆ ಹೊಸ್ತಿಲಲ್ಲಿ ಹಾಲಿನ ಹೋರಾಟಕ್ಕೆ ರಾಜಕೀಯ ಹುಳಿಯೂ ಬೆರೆತಿದೆ. ಗುಜರಾತ್ ಮೂಲದ ಅಮುಲ್ ರಾಜ್ಯದಲ್ಲಿ ಹಾಲು ಮಾರಾಟ ಮಾಡುತ್ತಿರುವುದೇ ಈಗ ಕನ್ನಡಿಗರ ಆಕ್ರೋಶಕ್ಕೆ ಕಾರಣ.

ಸಾಮಾಜಿಕ ಜಾಲತಾಣದಲ್ಲಿ ಬಾಯ್ಕಾಟ್ ಅಮುಲ್ ಅಭಿಯಾನ ಆರಂಭವಾಗಿದೆ. ಚುನಾವಣೆ ಹಿನ್ನೆಲೆಯಲ್ಲಿ ರಾಜಕೀಯ ಪಕ್ಷಗಳು ವಿವಾದವನ್ನು ರಾಜಕೀಯ ದಾಳವಾಗಿ ಬಳಸಲು ಆರಂಭಿಸಿವೆ. ಕನ್ನಡದ ಹೆಮ್ಮೆಯ ನಂದಿನಿಯನ್ನು ಮುಚ್ಚುವ ಪ್ರಯತ್ನ ಎಂಬುದು ಆರೋಪ. ಈ ವಿಚಾರ ಇದೀಗ ಪ್ರತಿಪಕ್ಷ ಹಾಗೂ ಆಡಳಿತಾರೂಢ ಬಿಜೆಪಿ ಮಧ್ಯೆ ತೀವ್ರ ಗಲಾಟೆಗೆ ಕಾರಣವಾಗಿದೆ‌.

ರಾಜ್ಯದಲ್ಲಿ 26 ಲಕ್ಷ ಗ್ರಾಮೀಣ ರೈತರಿಂದ ದಿನಂಪ್ರತಿ ಸರಾಸರಿ 85 ಲಕ್ಷ ಲೀಟರ್ ಹಾಲು ಸಂಗ್ರಹಿಸಿ, ಸುಮಾರು 150ಕ್ಕೂ ಹೆಚ್ಚು ವಿವಿಧ ನಂದಿನಿ ಹಾಲು ಮತ್ತು ಹಾಲಿನ ಉತ್ಪನ್ನಗಳನ್ನು ರಾಜ್ಯದ ಜನತೆಗೆ ಕಳೆದ 4 ದಶಕಗಳಿಂದ ಒದಗಿಸಲಾಗುತ್ತಿದೆ. ಕಳೆದ 5 ವರ್ಷಗಳ ಅವಧಿಯಲ್ಲಿ ಹಾಲಿನ ಸರಾಸರಿ ಶೇಖರಣೆ ಶೇ.6 ರಿಂದ 7ರಷ್ಟು ಪ್ರಗತಿಯಾಗಿದೆ.

ನಂದಿನಿ ಬ್ರಾಂಡ್ ವಹಿವಾಟು ಏನು?:ಕೆಎಂಎಫ್ ಹಾಗೂ ಸಹಕಾರ ಸಂಘಗಳು ಒಟ್ಟು ವಾರ್ಷಿಕವಾಗಿ 22,000 ಕೋಟಿ ರೂ ಮೌಲ್ಯದ ನಂದಿನಿ ಹಾಲು ಉತ್ಪನ್ನಗಳ ಮೂಲಕ ವಹಿವಾಟು ನಡೆಸುತ್ತಿದೆ. ರಾಜ್ಯದಲ್ಲಿ ಈಗಾಗಲೇ 18 ಖಾಸಗಿ ಹಾಲಿನ ಬ್ರಾಂಡ್​ಗಳು ವಹಿವಾಟು ನಡೆಸುತ್ತಿವೆ. ಈ ಮಧ್ಯೆ ನಂದಿನಿ ಹಾಲು ಮೊಸರು ಮಾರುಕಟ್ಟೆ ಪಾಲು ಶೇ.84ರಷ್ಟು ಎಂದು ಎಂಡಿ ಬಿ.ಸಿ.ಸತೀಶ್ ತಿಳಿಸಿದ್ದಾರೆ. ಕೆಎಂಎಫ್ ಆನ್​ಲೈನ್ ಮೂಲಕ ಬೆಂಗಳೂರಲ್ಲಿ ಹಾಲಿನ ಮಾರಾಟ ಮಾಡುತ್ತಿದೆ. ಆ ಮೂಲಕ ಪ್ರತಿನಿತ್ಯ 2.5 ಲಕ್ಷ ಲೀಟರ್ ಹಾಲು ಮಾರಾಟ ಮಾಡಲಾಗುತ್ತಿದೆ. ಬೆಂಗಳೂರಲ್ಲಿ ಒಟ್ಟು 33 ಲಕ್ಷ ಲೀಟರ್ ಹಾಲು ಮಾರಾಟವಾಗುತ್ತಿದೆ. ಈ ಪೈಕಿ ಕೆಎಂಎಫ್ ನ ನಂದಿನಿ ಹಾಲಿನ ಮಾರಾಟ 26 ಲಕ್ಷ ಲೀಟರ್ ಆಗಿದೆ ಎಂದು ಕೆಎಂಎಫ್ ತಿಳಿಸಿದೆ.

ಪ್ರತಿ ತಿಂಗಳು ಕೆಎಂಎಫ್ ದೇಶ ಕಾಯುವ ಸೈನಿಕರಿಗೆ ಒಂದು ಕೋಟಿ ಲೀಟರ್ ಹಾಲು ಸರಬರಾಜು ಮಾಡುತ್ತಿದೆ. ದೇಶದ ಅನೇಕ ನಗರಗಳಲ್ಲಿ ನಂದಿನಿ ಹಾಲು ಮತ್ತು ಹಾಲಿನ ಉತ್ಪನ್ನಗಳು ಲಭ್ಯವಿದೆ. ಮಹಾರಾಷ್ಟ್ರದ ಮುಂಬೈ, ಪುಣೆ, ಸೊಲ್ಲಾಪುರ, ವಿದರ್ಭ ಪ್ರಾಂತ್ಯ (ನಾಗಪುರ), ಹೈದರಾಬಾದ್, ಚೆನ್ನೈ, ಕೇರಳ ಮತ್ತು ಗೋವಾದಲ್ಲಿ ನಂದಿನಿ ತನ್ನ ‌ಮಾರುಕಟ್ಟೆ ವಿಸ್ತರಿಸಿದೆ. ಪ್ರತಿ ನಿತ್ಯ 7 ಲಕ್ಷಕ್ಕೂ ಅಧಿಕ ಲೀಟರ್ ಹಾಲು ಮತ್ತು ಮೊಸರನ್ನು ಸ್ಥಳೀಯವಾಗಿ ಅಲ್ಲಿನ ಗ್ರಾಹಕರಿಗೆ ಮಾರಾಟ ಮಾಡಲಾಗುತ್ತಿದೆ ಎಂದು KMF ತಿಳಿಸಿದೆ.

ರಾಜ್ಯದಲ್ಲಿ ಅಮುಲ್ ಮಾರುಕಟ್ಟೆ ಏನು?:ಕರ್ನಾಟಕದಲ್ಲಿ ಅಮುಲ್ ಉತ್ಪನ್ನಗಳು ಮೊದಲಿನಿಂದಲೂ ಮಾರಾಟವಾಗುತ್ತಿವೆ. ಅಮುಲ್ ಐಸ್ ಕ್ರೀಂ, ಹಾಲಿನ ಇತರ ಉಪ ಉತ್ಪನ್ನಗಳು ರಾಜ್ಯಾದ್ಯಂತ ವ್ಯಾಪಕವಾಗಿ ಮಾರಾಟವಾಗುತ್ತಿದೆ. ಆದರೆ, ಈ ಬಾರಿ ಆನ್​ಲೈನ್ ಮೂಲಕ ಬೆಂಗಳೂರಿನ ಕೆಲವೆಡೆ ಪಾಲಿಥಿನ್ ಪ್ಯಾಕ್​ನಲ್ಲಿ ಹಾಲು ಮಾರಾಟ ಮಾಡಲು ಬರುತ್ತಿದೆ. ಇದು ಆತಂಕಕ್ಕೆ ಕಾರಣವಾಗಿದೆ.

ಅಮುಲ್​​ ಐಸ್ ಕ್ರೀಂ ತಯಾರಿಕೆಗೆ ನಂದಿನಿ ಹಾಲು ಬಳಕೆ: ಅಮುಲ್ ರಾಜ್ಯದಲ್ಲಿ ಹಾಲು ಮಾರಾಟ ಮಾಡಲು ಈ ಮುಂಚಿನಿಂದಲೂ ಪ್ರಯತ್ನಿಸ್ತಿದೆ. ಅಮುಲ್ ಎಲ್ಲಾ ಉತ್ಪನ್ನಗಳು ಇಲ್ಲಿ ಮೊದಲಿನಿಂದ ರಾಜ್ಯದಲ್ಲಿ ಮುಕ್ತವಾಗಿ ಮಾರಾಟವಾಗುತ್ತಿದೆ. ಅದಕ್ಕೆ ಯಾವ ವಿರೋಧ ವ್ಯಕ್ತವಾಗಿಲ್ಲ. ಅಮುಲ್ ಬೆಂಗಳೂರು ಕರ್ನಾಟಕ ಸೇರಿದಂತೆ ದಕ್ಷಿಣ ರಾಜ್ಯಗಳಲ್ಲಿ ಉತ್ತಮ ಗುಣಮಟ್ಟದ ಐಸ್ ಕ್ರೀಂ ಮಾರುತ್ತಿದೆ. ಅಮುಲ್ ಐಸ್ ಕ್ರೀಂ ತಯಾರಿಗೆ ಬಳಕೆಯಾಗುತ್ತಿರುವುದು ನಂದಿನಿ ಹಾಲೇ. Amul ಐಸ್ ಕ್ರೀಂಗಾಗಿ ಪ್ರತಿದಿನ ಸಾವಿರಾರು ಲೀಟರ್ ನಷ್ಟು ಶುದ್ಧ ನಂದಿನಿ ಹಾಲನ್ನು KMF ದಶಕಗಳಿಂದ ಒದಗಿಸುತ್ತಿದೆ.

ಸಹಕಾರ ತತ್ವ ಏನು ಹೇಳುತ್ತದೆ?:ದಶಕಗಳಿಂದ ಅಮುಲ್ ಮತ್ತು ನಂದಿನಿ ಪರಸ್ಪರ ಸಹಕಾರ ತತ್ವ ಅಳವಡಿಸಿಕೊಂಡು ಬಂದಿದೆ. ಪರಸ್ಪರ ಸೋದರತ್ವದ ಸಹಕಾರಿ ಹೊಂದಾಣಿಕೆಯಲ್ಲಿ ವ್ಯವಹರಿಸುತ್ತಿವೆ.‌ ಈ ಮೊದಲಿನಿಂದಲೂ ಅಮುಲ್ ರಾಜ್ಯದಲ್ಲಿ ಹಾಲು ಮಾರಾಟಕ್ಕೆ ಯತ್ನಿಸುತ್ತಲೇ ಇದೆ. ಆದರೆ ಕಾಲಕಾಲಕ್ಕೆ ಬೇಡ ಎಂದು ಕೆಎಂಎಫ್ ಮನವಿ ಮಾಡಿ ನಿಲ್ಲಿಸುತ್ತಿದೆ. ಅವರೂ ನಂದಿನಿಯೊಂದಿಗೆ ಇದ್ದ ಸಹಕಾರ ಬಾಂದವ್ಯದಲ್ಲಿ ತಮ್ಮ ಪ್ರಯತ್ನ ಮುಂದುವರಿಸಲಿಲ್ಲ. ಆದರೆ ಈ ಬಾರಿ ಅಮುಲ್ ಹಾಲು ಮಾರಾಟಕ್ಕೆ ಮುಂದಾಗಿದೆ. ಹೀಗಾಹಿ ಕೆಎಂಎಫ್ ಮತ್ತೆ ರಾಜ್ಯದಲ್ಲಿ ಹಾಲು ಮಾರಾಟ ಮಾಡದಂತೆ ಅಮುಲ್​ಗೆ ಮನವಿ ಸಲ್ಲಿಸಲು ಮುಂದಾಗಿದೆ.

ಸಹಕಾರಿ ನಿಯಮದಂತೆ ಬೇರೆ ರಾಜ್ಯಗಳ ಹಾಲು ಉತ್ಪಾದಕ ಮಹಾಮಂಡಳಗಳು ಕರ್ನಾಟಕದಲ್ಲಿ ಹಾಲು ಶೇಖರಿಸಿ, ಡೇರಿ ಸ್ಥಾಪಿಸಿ ಹಾಲು ಸಂಸ್ಕರಣೆ ಮಾಡಲು ಅವಕಾಶ ಇಲ್ಲ. ಹಾಗಾಗಿ ಅದನ್ನು ಬೇರೆ ರಾಜ್ಯಗಳಲ್ಲಿ ಮಾಡಲಾಗುತ್ತದೆ. ಇತ್ತ ಕೆಎಂಎಫ್ ಹಾಲು ಕೊರತೆ ಇರುವ ರಾಜ್ಯಗಳಲ್ಲಿ ಮಾತ್ರ ಅಲ್ಲಿನ ಹಾಲು ಮಂಡಳಿಗಳ ಕೋರಿಕೆ ಮೇರೆಗೆ, ಸಹಮತಿಯೊಂದಿಗೆ ಹಾಲು ಮಾರಾಟ ಮಾಡುತ್ತಿದೆ.

ಅದೇ ಸಹಕಾರ ಬಾಂಧವ್ಯದಲ್ಲಿ ಕೆಎಂಎಫ್ ನಮ್ಮಲ್ಲಿ ಹಾಲು ಯಥೇಚ್ಛವಾಗಿದ್ದರೂ ನಂದಿನಿ ಹಾಲನ್ನು ಗುಜರಾತ್ ಅಥವಾ ಅಮುಲ್ ಮೂಲ ಕ್ಷೇತ್ರದ ನಗರಗಳಲ್ಲಿ ಮಾರಾಟ ಮಾಡಲು ಹೋಗಿಲ್ಲ. ಹೀಗಾಗಿ ಇತ್ತ ಅಮುಲ್ ಕೂಡ ಈ ಹಿಂದಿನಿಂದ ಅನುಸರಿಸುತ್ತಾ ಬರುತ್ತಿರುವ ಸಹಕಾರ ತತ್ವದಡಿ ಕರ್ನಾಟಕದಲ್ಲಿ ಅಮುಲ್ ತನ್ನ ಹಾಲು ಮಾರಲು ಮುಂದಾಗಬಾರದು. ಈ ನಿಟ್ಟಿನಲ್ಲಿ ಕೆಎಂಎಫ್ ಅಮುಲ್ ಜೊತೆ ಮಾತುಕತೆ ನಡೆಸಿ, ಈ ಹಿಂದಿನ ಸಹಕಾರ ಪದ್ಧತಿ ಮುಂದುವರಿಸುವಂತೆ ಮನವಿ ಮಾಡಲಿದೆ ಎಂದು ಕೆಎಂಎಫ್ ಅಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನೂ ಓದಿ:ನಂದಿನಿ ಹಾಲನ್ನೇ ಬಳಸಲು ನಿರ್ಧರಿಸಿದ ಬೆಂಗಳೂರು ಹೊಟೇಲ್ ಸಂಘ