ಕೊರನಾ ಫೈಟ್​ಗೆ ಮೂಡಲಪಾಳ್ಯ ವಾರ್ಡ್ ಸಜ್ಜು: ಮೊದಲ ಸ್ಯಾನಿಟೈಸಿಂಗ್​‌ ಟನಲ್ ಆರಂಭ

ಕೊರೊನಾ ಹರಡುವಿಕೆಯನ್ನು ತಡೆಗಟ್ಟಲು ಸರ್ಕಾರ ಶತಾಯುಘತಾಯು ಪ್ರಯತ್ನ ನಡೆಸುತ್ತಿದ್ದು, ಈಗಾಗಲೇ ಹಲವಾರು ಕ್ರಮಗಳನ್ನು ಸಹ ಕಲೈಗೊಳ್ಳಲಾಗಿದೆ. ಅದೇ ರೀತಿ ಗೋವಿಂದರಾಜನಗರ ವಿಧಾನಸಭಾ ಕ್ಷೇತ್ರದ ಮೂಡಲಪಾಳ್ಯ ವಾರ್ಡ್ನನಲ್ಲಿ ಮೊದಲ ಜೈವಿಕ ದ್ರಾವಣ ಸಿಂಪಡನೆ ಟನಲ್​​ನನ್ನು ‌ಸ್ಥಾಪಿಸಲಾಗಿದ್ದು, ಇಂದು ಸಚಿವ ಸೋಮಣ್ಣ ಅಧಿಕೃತವಾಗಿ ಚಾಲನೆ ನೀಡಿದರು.

ಬೆಂಗಳೂರು: ಕೊರೊನಾ ಸೋಂಕಿತರ ಸಂಖ್ಯೆ ದಿನೇ ದಿನೆ ಹೆಚ್ಚಾಗುತ್ತಿದ್ದು, ಸೋಂಕು ಹರಡುವುದನ್ನ ತಡೆಗಟ್ಟುವ ನಿಟ್ಟಿನಲ್ಲಿ ಈಗಾಗಲೇ ಹಲವು ಟನಲ್​ಗಳನ್ನು ನಿರ್ಮಿಸಲಾಗಿದ್ದು, ಇದೀಗ, ಬೆಂಗಳೂರಿನ ಗೋವಿಂದರಾಜನಗರ ವಿಧಾನಸಭಾ ಕ್ಷೇತ್ರದ ಮೂಡಲಪಾಳ್ಯ ವಾರ್ಡ್ನನಲ್ಲಿ ಮೊದಲ ಜೈವಿಕ ದ್ರಾವಣ ಸಿಂಪಡನೆ ಟನಲ್​​ನನ್ನು ‌ವಸತಿ ಸಚಿವ ವಿ.ಸೋಮಣ್ಣ, ಬಿ.ಬಿ.ಎಂ.ಪಿ. ಸದಸ್ಯ ದಾಸೇಗೌಡ ಉದ್ಘಾಟನೆ ಮಾಡಿದರು.‌

ಇದೇ ವೇಳೆ ಮಾತಾನಾಡಿದ ವಸತಿ ಸಚಿವ ವಿ.ಸೋಮಣ್ಣ, ಗೋವಿಂದರಾಜನಗರ ವಿಧಾನಸಭಾ ಕ್ಷೇತ್ರದಲ್ಲಿ ಬಡವರು ಮತ್ತು ಮಧ್ಯಮ ವರ್ಗದವರ ಸಂಖ್ಯೆ ಹೆಚ್ಚಿದೆ. ಕೊರೊನಾ ವೈರಸ್ ಸಾಂಕ್ರಮಿಕ ರೋಗದ ವಿರುದ್ಧ ಇಗಾಗಲೇ ಜನಜಾಗೃತಿ ಮೂಡಿಸಲಾಗಿದೆ. ಮೂಡಲಪಾಳ್ಯ ವಾರ್ಡಿನ ಮಾರ್ಕೆಟ್ ಬರುವವರಿಗೆ ಜೈವಿಕ ದ್ರಾವಣ ಸಿಂಪಡನೆ ಮಾಡುವುದರಿಂದ ಕೊರೊನಾ ವೈರಸ್ ಮುಕ್ತ ಮಾಡಲು ಸಹಕಾರಿಯಾಗಿದೆ ಎಂದರು.

ಇನ್ನು ಗೋವಿಂದರಾಜನಗರ ವಿಧಾನಸಭಾ ಕ್ಷೇತ್ರದಲ್ಲಿ ನಾಲ್ಕು ಕಡೆ ಜೈವಿಕ ದ್ರಾವಣ ಸಿಂಪಡನೆ ಟನಲ್ ಸ್ಥಾಪಿಸಲಾಗುವುದು, ಇನ್ನು ಮೂರು ತಿಂಗಳುಗಳ ಕಾಲ ಜನರು ಇದರ ಸದುಪಯೋಗಪಡಿಸಿಕೊಳ್ಳಬೇಕು ಎಂದು ಕರೆ ನೀಡಿದರು.

ಬಿ.ಬಿ.ಎಂ.ಪಿ.ಸದಸ್ಯ ದಾಸೇಗೌಡ ಮಾತನಾಡಿ, ಬೆಂಗಳೂರಿನ ಪ್ರಪ್ರಥಮ ಜೈವಿಕ ದ್ರಾವಣ ಸಿಂಪಡನೆ ಟನಲ್ ಇದಾಗಿದ್ದು, ಒಂದು ಲಕ್ಷ ರೂಪಾಯಿ ವೆಚ್ಚದಲ್ಲಿ ಈ ಟನಲ್​​ನನ್ನು ಸ್ಥಾಪಿಸಲಾಗಿದೆ. ಜೈವಿಕ ದ್ರಾವಣದಲ್ಲಿ ಯಾವುದೇ ರಾಸಯನಿಕ ಇರುವುದಿಲ್ಲ, ಇದನ್ನು ಸಿಂಪಡನೆ ಮಾಡುವುದರಿಂದ ದೇಹದ ಮೇಲೆ ಯಾವುದೇ ಕೆಟ್ಟ ಪರಿಣಾಮ ಬೀರುವುದಿಲ್ಲ ಎಂದು ತಿಳಿಸಿದರು.