ಬೆಂಗಳೂರು:ನಾನು ಯಾವ ಸಿಎಂಗೇನು ಕಡಿಮೆ ಇಲ್ಲ ಅಂತಾ ಮಾಜಿ ಸಿಎಂ ಸಿದ್ದರಾಮಯ್ಯ ವಿರುದ್ಧ ಬಿಜೆಪಿ ಅಭ್ಯರ್ಥಿ ಎಂಟಿಬಿ ನಾಗರಾಜ್ ವಾಗ್ದಾಳಿ ನಡೆಸಿದ್ದಾರೆ.
ಹೊಸಕೋಟೆ ನಗರದಲ್ಲಿ ಚುನಾವಣಾ ಸಭೆ ನಡೆಸಿ ಮಾತನಾಡಿದ ಎಂಟಿಬಿ ನಾಗರಾಜ್, ನಾನು ಹೊಸಕೋಟೆ ಕ್ಷೇತ್ರದಲ್ಲಿ ಈಗಾಗಲೇ ಗೆದ್ದಿದ್ದೇನೆ. ನನ್ನ ಮಂತ್ರಿ ಮಾಡಲಿ, ಮಾಡದೇ ಇರಲಿ. ನಾನು ಯಾವ ಸಿಎಂಗೂ ಕಮ್ಮಿ ಇಲ್ಲ ಅಂತ ಸಿದ್ದರಾಮಯ್ಯಗೆ ಟಾಂಗ್ ನೀಡಿದರು.
ನನ್ನ ಹೊಸಕೋಟೆಗೆ ಕರೆದು ತಂದು ನಿಲ್ಲಿಸಿದ್ದು ಎಸ್.ಎಂ.ಕೃಷ್ಣ ಮಾತ್ರ. ಇಲ್ಲಿ ಕಾಂಗ್ರೆಸ್ನಿಂದ ನಿಂತು ಮುನೇಗೌಡರು ಮೂರು ಬಾರಿ ಸೋತಿದ್ದರು. ಅದಕ್ಕೆ ಗತಿ ಇಲ್ಲದೆ ಈ ಮಿನಿ ಬಿಹಾರ್ನಲ್ಲಿ ತಂದು ಕಾಂಗ್ರೆಸ್ನವರು ನನ್ನನ್ನ ನಿಲ್ಲಿಸಿದರು ಎಂದು ಗುಡುಗಿದ್ರು. ಜೊತೆಗೆ ಈ ಭಾಗದಲ್ಲಿ ನನ್ನಿಂದಾಗಿ ಕಾಂಗ್ರೆಸ್ಗೆ ವರ್ಚಸ್ಸು ಹೆಚ್ಚಾಯಿತು. ಕಾಂಗ್ರೆಸ್ನಿಂದ ನನಗೆ ಏನು ಸಿಕ್ಕಿಲ್ಲಾ ಅಂತಾ ಸಿದ್ದರಾಮಯ್ಯ ಮಾತುಗಳಿಗೆ ತಿರುಗೇಟು ನೀಡಿದ್ರು.
ಇನ್ನು ಶರತ್ ಬಚ್ಚೇಗೌಡಗೆ ಬುದ್ಧಿ ಭ್ರಮಣೆ ಆಗಿದೆ. ರಿಯಲ್ ಎಸ್ಟೇಟ್ ಸೈಟ್ ಮಾದರಿಯಲ್ಲಿ ಜನನಾಯಕರಿಗೆ ಬೆಲೆ ಕಟ್ಟುತ್ತಿದ್ದಾರೆ ಅಂತಾ ತಮ್ಮ ಮೇಲೆ ಶರತ್ ಮಾಡಿರುವ ಆರೋಪ ಸುಳ್ಳು. ನಾನು ಯಾರಿಗೂ ಯಾವ ಬೆಲೆಯನ್ನೂ ಕಟ್ಟಿಲ್ಲ. ಶರತ್ ಬಚ್ಚೇಗೌಡಗೆ ಬಿಜೆಪಿ ಟಿಕೆಟ್ ಕೈ ತಪ್ಪಿದ್ದರಿಂದ ಬುದ್ಧಿ ಭ್ರಮಣೆಯಾಗಿದೆ. ಅದಕ್ಕೆ ಇಂತಹ ಹೇಳಿಕೆಗಳನ್ನ ನೀಡುತ್ತಿದ್ದಾರೆ ಎಂದು ತಿರುಗೇಟು ನೀಡಿದರು.
