ನಕಲಿ ಕೀ ಬಳಸಿ ಅಂಗಡಿ ದೋಚುತ್ತಿದ್ದ ಖತರ್ನಾಕ್ ಖದೀಮನ ಬಂಧನ

ಗಾಂಧಿನಗರದ ಎಸ್‌.ಎನ್. ಬಜಾರ್​​ನಲ್ಲಿ ನಡೆದ ಕಳ್ಳತನ ಪ್ರಕರಣವನ್ನು ಭೇದಿಸಿರುವ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದು, ಬಂಧಿತ ಆರೋಪಿ ಮತ್ತು ಆತನ ಸಹಚರರು ಹಲವು ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿರುವ ಮಾಹಿತಿ ಲಭ್ಯವಾಗಿದೆ.

ಬೆಂಗಳೂರು : ನಕಲಿ ಕೀ ಬಳಸಿ ಅಂಗಡಿಗಳ ಬೀಗ ತೆಗೆದು ಮೊಬೈಲ್ ಹಾಗೂ ಹಣ ದೋಚುತ್ತಿದ್ದ ಆರೋಪಿಯನ್ನು ಉಪ್ಪಾರಪೇಟೆ ಪೊಲೀಸರು ಬಂಧಿಸಿದ್ದಾರೆ.

ಗುರಪ್ಪನ ಪಾಳ್ಯದ ನಿವಾಸಿ ಶಬ್ಬೀರ್ (26) ಬಂಧಿತ ಆರೋಪಿ. ಈತ ನಕಲಿ ಕೀ ಬಳಸಿ ಗಾಂಧಿನಗರದ ಎಸ್‌.ಎನ್. ಬಜಾರ್​​ನ​ ಬೀಗ ತೆಗೆದು 9 ಐಫೋನ್, 5,66 ಲಕ್ಷ ರೂ. ನಗದು ದೋಚಿ ಪರಾರಿಯಾಗಿದ್ದ‌. ಈ ಸಂಬಂಧ ಪ್ರಕರಣ ದಾಖಲಿಸಿಕೊಂಡು ಖದೀಮನನ್ನು ಸೆರೆಹಿಡಿದ ಪೊಲೀಸರು,‌ ಹೆಚ್ಚಿನ ವಿಚಾರಣೆಗೊಳಪಡಿಸಿದಾಗ ನಗರದ ಹಲವೆಡೆ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿರುವ ವಿಚಾರ ತಿಳಿದು ಬಂದಿದೆ.

ಬಂಧಿತನಿಂದ ವಶಪಡಿಸಿಕೊಳ್ಳಲಾದ ವಸ್ತುಗಳು

ಈತನೊಂದಿಗೆ ಕೃತ್ಯಕ್ಕೆ ಸಾಥ್ ನೀಡಿದ್ದ ಸಹಚರರಾದ ಜಯ ಮತ್ತು ಶ್ರೀಕಾಂತ್ ಎಂಬುವರು ತಲೆಮರೆಸಿಕೊಂಡಿದ್ದಾರೆ. ಉಪ್ಪಾರಪೇಟೆ, ಕಲಾಸಿಪಾಳ್ಯ, ಚಾಮರಾಜಪೇಟೆ ಪೊಲೀಸ್ ಠಾಣೆಗಳಲ್ಲಿ ದಾಖಲಾಗಿದ್ದ ಐದು‌ ಪ್ರಕರಣಗಳ ಆರೋಪಿಗಳು ಇವರೇ ಎಂಬುದನ್ನು ಪೊಲೀಸರು ಪತ್ತೆ ಹಚ್ಚಿದ್ದಾರೆ. ಬಂಧಿತನಿಂದ 18.49 ಲಕ್ಷ ಬೆಲೆ ಬಾಳುವ 201 ಗ್ರಾಂ ತೂಕದ ಚಿನ್ನಾಭರಣ, 8 ಕೆ.ಜಿ ಬೆಳ್ಳಿ ಮತ್ತು ನಗದು ವಶಕ್ಕೆ ಪಡೆದುಕೊಂಡಿರುವ ಪೊಲೀಸರು, ವಿಚಾರಣೆ ಮುಂದುವರೆಸಿದ್ದಾರೆ.