ಕೊರೊನಾ ಮಾಹಿತಿ ನಿರ್ವಹಣಾ ಜವಾಬ್ದಾರಿ ಸಚಿವ ಸುರೇಶ್​ ಕುಮಾರ್​ಗೆ: ಪರಿಷತ್ ಮಾಜಿ ಸದಸ್ಯ ಆಕ್ಷೇಪ

ಕೊರೊನಾ ಮಾಹಿತಿ ನಿರ್ವಹಣೆ ಜವಾಬ್ದಾರಿಯನ್ನು ಕರ್ನಾಟಕದ ವೈದ್ಯಕೀಯ ಶಿಕ್ಷಣ ಸಚಿವ ಡಾ. ಸುಧಾಕರ್ ಮತ್ತು ಆರೋಗ್ಯ ಸಚಿವ ಶ್ರೀರಾಮುಲುಗೆ ನೀಡದೇ ಪ್ರಾಥಮಿಕ ಹಾಗೂ ಪ್ರೌಢ ಶಿಕ್ಷಣ ಸಚಿವ ಸುರೇಶ್​ ಕುಮಾರ್​ಗೆ ನೀಡಿರೋದಕ್ಕೆ ಕೆಲವರಿಂದ ಆಕ್ಷೇಪ ವ್ಯಕ್ತವಾಗಿದೆ.

ಬೆಂಗಳೂರು:ಕೊರೊನಾ ಮಾಹಿತಿ ನಿರ್ವಹಣೆಗೆ ಪ್ರಾಥಮಿಕ ಹಾಗೂ ಪ್ರೌಢ ಶಿಕ್ಷಣ ಸಚಿವ ಸುರೇಶ್​ ಕುಮಾರ್ ಅವರನ್ನು ನೇಮಿಸಿದ್ದಕ್ಕೆ ತೀವ್ರ ಆಕ್ರೋಶ ವ್ಯಕ್ತವಾಗುತ್ತಿದೆ. ಇಲಾಖೆಗೆ ಸಂಬಂಧ ಪಡದ, ಸಂಸದೀಯ ಖಾತೆಯೂ ಇಲ್ಲದ ಸುರೇಶ್​ ಕುಮಾರ್ ಅವರನ್ನು ಕೋವಿಡ್​-19 ಸೋಂಕು ನಿರ್ವಹಣಾ ಜವಾಬ್ದಾರಿ ನೀಡಿದ ಮುಖ್ಯಮಂತ್ರಿಗಳ ನಡೆಯನ್ನು ವಿಧಾನ ಪರಿಷತ್ ಮಾಜಿ ಸದಸ್ಯ ರಮೇಶ್​ ಬಾಬು ಪ್ರಶ್ನಿಸಿದ್ದಾರೆ.

ಈ ಸಂಬಂಧ ಟ್ವೀಟ್​ ಮಾಡಿರುವ ರಮೇಶ್ ಬಾಬು, ನಮ್ಮ ರಾಜ್ಯದ ಮುಖ್ಯಮಂತ್ರಿ ಹಾಗೂ ವೈದ್ಯಕೀಯ ಶಿಕ್ಷಣ ಸಚಿವರನ್ನೇ ಕ್ವಾರಂಟೈನ್​ನಲ್ಲಿ ಇಟ್ಟು ಕೊರೊನಾ ಮಾಹಿತಿ ನಿರ್ವಹಣೆ ಜವಾಬ್ದಾರಿಯನ್ನು ಸುರೇಶ್​ ಕುಮಾರ್​ಗೆ ವಹಿಸಿದ್ದಾರೆ. ಇವರನ್ನು ಕ್ವಾರಂಟೈನ್​​ನಲ್ಲಿಡಲು ಮುಖ್ಯಮಂತ್ರಿಗೆ ಬಂದ ಅನುಮಾನವೇನು? ಎಂದು ಪ್ರಶ್ನಿಸಿದ್ದಾರೆ.

ಇದರ ಜೊತೆಗೆ ಕೊರೊನಾದಿಂದ ರಾಜ್ಯದ ಜನ ತತ್ತರಿಸಿರುವಾಗ ಸರ್ಕಾರದಿಂದ ಸಹಜವಾಗಿ ಪರಿಹಾರ ಬಯಸುತ್ತಾರೆ. ಈ ಸಂದರ್ಭದಲ್ಲಿ ನಿಮ್ಮ ಗುಂಪುಗಾರಿಕೆ ನಮಗೆ ಅನಾವಶ್ಯಕ. ಇದ್ದರೂ ಅದು ನಿಮ್ಮ ನಿಮ್ಮಲ್ಲೇ ಬಗೆಹರಿಯಲಿ. ಕೊರೊನಾ ವಿರುದ್ಧ ಸರ್ಕಾರದ ಜೊತೆಗೆ ಜನಸಾಮಾನ್ಯರೂ ಕೈಜೋಡಿಸಿದ್ದಾರೆ. ಮುಖ್ಯಮಂತ್ರಿಗಳು ಎಲ್ಲಾ ಸಚಿವರನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಕೆಲಸ ಮಾಡಬೇಕು ಎಂದು ಮನವಿ ಮಾಡಿದ್ದಾರೆ.