ಡ್ರಗ್ಸ್​​​ ಪ್ರಕರಣ : 5 ಕೆಜಿ ಗಾಂಜಾ ವಶ, 15 ಆರೋಪಿಗಳ ಬಂಧನ

ಸಿಲಿಕಾನ್​​ ಸಿಟಿಯಲ್ಲಿ ಗಾಂಜಾ ನಶೆ ಹೆಚ್ಚುತ್ತಿದ್ದು, ಹಲವು ಪ್ರತ್ಯೇಕ ಪ್ರಕರಣಗಳಲ್ಲಿ 15 ಆರೋಪಿಗಳನ್ನು ಬಂಧಿಸಿ ಒಟ್ಟು 5.916ಕೆಜಿ ಗಾಂಜಾ ವಶಕ್ಕೆ ಪಡೆದಿದ್ದಾರೆ.

ಬೆಂಗಳೂರು: ಕಳೆದ ಕೆಲವು ದಿನಗಳಿಂದ ಗಾಂಧಿನಗರದಲ್ಲಿ ಗಾಂಜಾ ನಶೆ ಚರ್ಚೆ ಜೋರಾಗಿ ನಡೆಯುತ್ತಿದೆ. ಪ್ರಕರಣ ಸಂಬಂಧ ನಟಿ ರಾಗಿಣಿ ಹಾಗೂ ಹಲವರನ್ನ ಈಗಾಗಲೇ ಬಂಧಿಸಲಾಗಿದೆ. ಈ ಮಧ್ಯೆ ಪೊಲೀಸರು ಹಲವಾರು ಗಾಂಜಾ ಆರೋಪಿಗಳನ್ನ ಇಂದು ಅರೆಸ್ಟ್​ ಮಾಡಿದ್ದಾರೆ.

ನಗರದ ಪಶ್ಚಿಮ ವಿಭಾಗದ ಪೊಲೀಸರು ಕೂಡ ಬೇಟೆ ಆರಂಭಿಸಿದ್ದು, 12 ಪ್ರಕರಣಗಳಲ್ಲಿ 15 ಜನರನ್ನು ಬಂಧಿಸಿ ಒಟ್ಟು 5.916ಕೆಜಿ ಗಾಂಜಾ, 25,080 ರೂ ನಗದು, ಒಂದು ಕಾರು ಮತ್ತು ಬೈಕ್ ವಶಪಡಿಸಿಕೊಂಡಿದ್ದಾರೆ.

ಸುನಿಲ್ ಕುಮಾರ್(37), ರಘು(27), ನಾಗರಾಜ್(35), ಹಾದ್(27), ರವಿ(19), ಶರೀಫ್(25), ಸಲ್ಮಾನ್(23), ಇಮ್ರಾನ್ (22), ಇಮ್ರಾನ್ ಖಾನ್(26), ಮುನಿಯಾಂಡಿ(22), ಮಂಜುನಾಥ(19), ಜ್ಯೋತಿ(32), ರಾಜೇಶ್ವರಿ (45) ಮತ್ತು ಯಾಜ್ ಶೇಖ್(25) ಬಂಧಿತ ಆರೋಪಿಗಳು.

ಮಾಗಡಿ ರಸ್ತೆ ಠಾಣಾ ಪೊಲೀಸರು ಸೆ.5ರಂದು ನಡೆಸಿದ ಪ್ರತ್ಯೇಕ ಎರಡು ಕಾರ್ಯಾಚರಣೆಯಲ್ಲಿ ಗಾಂಜಾ ಮಾರಾಟ ಮಾಡುತ್ತಿದ್ದ ಮೂವರು ಆರೋಪಿಗಳನ್ನು ಬಂಧಿಸಿದ್ರೆ, ಜ್ಞಾನಭಾರತಿ ಠಾಣಾ ಪೊಲೀಸರು ಓರ್ವನನ್ನು ಬಂಧಿಸಿದ್ದಾರೆ.

ರಾಜರಾಜೇಶ್ವರಿನಗರ ಠಾಣಾ ಪೊಲೀಸರು ಸೆ.1 ಮತ್ತು ಸೆ.4ರಂದು ದಾಳಿ ನಡೆಸಿ ಎರಡು ಪ್ರಕರಣಕ್ಕೆ ಸಂಬಂಧಿಸಿದ ಇಬ್ಬರನ್ನು ವಶಕ್ಕೆ ಪಡೆದಿದ್ದಾರೆ. ಚಾಮರಾಜಪೇಟೆ ಠಾಣಾ ಪೊಲೀಸರು ಸೆ.4 ಮತ್ತು 5ರಂದು ನಡೆಸಿದ ಮೂರು ದಾಳಿಗಳಲ್ಲಿ ಮೂವರನ್ನು ಬಂಧಿಸಿದ್ದಾರೆ.

ಚಂದ್ರ ಲೇಔಟ್ ಠಾಣಾ ಪೊಲೀಸರು ಇಬ್ಬರು ಆರೋಪಿಗಳನ್ನು ಬಂಧಿಸಿದರೆ, ಜೆ.ಜೆ.ನಗರ, ಬಸವೇಶ್ವರ ನಗರ ಠಾಣಾ ಪೊಲೀಸರು ತಲಾ ಒಬ್ಬೊಬ್ಬರನ್ನು, ಕಾಟನ್‌ಪೇಟೆ ಪೊಲೀಸರು ಇಬ್ಬರು ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.