ರಾಜ್ಯದ 8 ಜಿಲ್ಲೆಗಳಲ್ಲಿ ಮೈನಸ್ ವ್ಯಾಕ್ಸಿನ್ ವೇಸ್ಟೇಜ್: ಮೈಸೂರಿಗೆ ಮೊದಲ ಸ್ಥಾನ

ಕೋವಿಡ್-19 ಲಸಿಕೆ ವಿತರಣೆ ವೇಳೆ ಒಂದಿಷ್ಟು ಡೋಸ್ ಲಸಿಕೆ ವಿವಿಧ ಕಾರಣಗಳಿಂದ ವ್ಯರ್ಥವಾಗಬಹುದೆಂದು ಅಂದಾಜಿಸಲಾಗಿತ್ತು. ಆದರೂ, ರಾಜ್ಯದ ಕೆಲವೊಂದು ಜಿಲ್ಲೆಗಳಲ್ಲಿ ಎಚ್ಚರಿಕೆಯಿಂದ ಲಸಿಕೆ ವ್ಯರ್ಥವಾಗದಂತೆ ನೋಡಿಕೊಳ್ಳಲಾಗಿದೆ. ಇನ್ನೂ ಕೆಲವೆಡೆ ಹೆಚ್ಚಿನ ಲಸಿಕೆ ವ್ಯರ್ಥವಾಗಿದೆ. ಎಲ್ಲೆಲ್ಲಿ ಎಷ್ಟೆಷ್ಟು ಲಸಿಕೆ ವ್ಯರ್ಥವಾಗಿದೆ ಎಂಬುದರ ಮಾಹಿತಿ ಇಲ್ಲಿದೆ.

ಬೆಂಗಳೂರು : ರಾಜ್ಯದಲ್ಲಿ ಕೋವಿಡ್ ಲಸಿಕೆ ಅಭಿಯಾನ ಮುಂದುವರೆದಿದ್ದು, ಲಸಿಕೆ ವ್ಯರ್ಥವಾಗದಂತೆ ನೋಡಿಕೊಳ್ಳಲಾಗಿದೆ. ಎಂಟು ಜಿಲ್ಲೆಗಳಲ್ಲಿ ಮೈನಸ್​​ ವೇಸ್ಟೇಜ್ ದಾಖಲಾಗಿದ್ದು, ಲಸಿಕೆ ವ್ಯರ್ಥವಾಗದಂತೆ ಜಿಲ್ಲಾಡಳಿತಗಳು ಎಚ್ಚರ ವಹಿಸಿವೆ.

ಹಾವೇರಿ, ಧಾರಾವಾಡ, ಬೆಂಗಳೂರು, ಮೈಸೂರಿನಲ್ಲಿ ಲಸಿಕೆ ನೀಡಿಕೆ ಉತ್ತಮವಾಗಿದೆ. ಈ ಎಲ್ಲಾ ಜಿಲ್ಲೆಗಳಲ್ಲಿ 10 ಜನರ ಇರುವಿಕೆಯನ್ನು ನೋಡಿಕೊಂಡು ವ್ಯಾಕ್ಸಿನ್ ವಯಲ್ ತೆರೆಯುವ ‌ತಂತ್ರ ಅನುಸರಿಸಿವೆ. ಹೀಗಾಗಿ, ಲಸಿಕೆ ವ್ಯರ್ಥವಾಗದಂತೆ ಕ್ರಮಕೈಗೊಳ್ಳಲಾಗಿದೆ. ಸಾಮಾನ್ಯವಾಗಿ ಒಂದು ವಯಲ್‌ಗೆ ಒಂದು ಡೋಸ್ ಲಸಿಕೆ ವ್ಯರ್ಥ ಎಂದು ಪರಿಗಣಿಸಲಾಗುತ್ತದೆ. ಆದರೆ, ಈ ಜಿಲ್ಲೆಗಳಲ್ಲಿ ವ್ಯರ್ಥ ಎಂದು ಪರಿಗಣಿಸುವ ಡೋಸ್‌ಗಳನ್ನೂ ಬಳಕೆ ಮಾಡಲಾಗಿದೆ.

ರಾಜ್ಯದಲ್ಲಿ ಅತಿ‌ ಹೆಚ್ಚು ಲಸಿಕೆ ವ್ಯರ್ಥ ಮಾಡಿರುವುದರಲ್ಲಿ ಬಾಗಲಕೋಟೆ ಜಿಲ್ಲೆ ಮೊದಲ ಸ್ಥಾನದಲ್ಲಿದೆ. ಇದುವರೆಗೆ ಬಾಗಲಕೋಟೆಯಲ್ಲಿ ಶೇ. 12.6 ರಷ್ಟು ಲಸಿಕೆ ವ್ಯರ್ಥವಾಗಿದೆ.

ಲಸಿಕೆ ಕಡಿಮೆ ವ್ಯರ್ಥವಾಗಿರುವ ಜಿಲ್ಲೆಗಳು (ಶೇಖಡವಾರು)

ಕ್ರ.ಸಂ	ಜಿಲ್ಲೆ	ಡೋಸ್	ಲಸಿಕೆ ವ್ಯರ್ಥ ( ಶೇ.)
1	ಮೈಸೂರು	-497	-0.1
2	ಬಿಬಿಎಂಪಿ	-33,785	-1.2
3	ಕೊಡಗು	-1,285	-1.3
4	ಬೆಳಗಾವಿ	-7,139	-1.7
5	ಚಿಕ್ಕಮಗಳೂರು	-3,776	-2.5
6	ಉತ್ತರ ಕನ್ನಡ	-6,381	-3.6
7	ಹಾವೇರಿ	-5,156	-4.1
8	ಧಾರವಾಡ	-8,786	-4.2