ಬೆಂಗಳೂರು: ಕನ್ನಡ ವಿರೋಧಿ ಸಂಘಟನೆಗಳನ್ನು ಕೂಡಲೇ ನಿಷೇಧಿಸಬೇಕು, ಕನ್ನಡಿಗರಿಗೆ ರಕ್ಷಣೆ ನೀಡಬೇಕು ಎಂದು ಒತ್ತಾಯಿಸಿ ಕರ್ನಾಟಕ ರಕ್ಷಣಾ ವೇದಿಕೆಯ ಕಾರ್ಯಕರ್ತರು ಬೆಂಗಳೂರಿನಿಂದ ಬೆಳಗಾವಿಗೆ ಜಾಥಾ ಹೊರಟಿದ್ದಾರೆ.
ಬೆಳಗಾವಿಯಲ್ಲಿ ರಾಜ್ಯದ ವಿವಿಧ ಭಾಗಗಳ ಕಾರ್ಯಕರ್ತರು ಸೇರಿ ನಾಳೆ ಮಹಾರಾಷ್ಟ್ರದ ಗಡಿ ದಾಟಲು ನಿರ್ಧರಿಸಿದ್ದು, ಇಂದು ಮೇಖ್ರಿ ಸರ್ಕಲ್ನಿಂದ ಬೆಳಗಾವಿ ಕಡೆಗೆ ಜಾಥಾ ಹೊರಟಿದ್ದಾರೆ.
ಮಹಾರಾಷ್ಟ್ರ ಗಡಿಮುಟ್ಟಲು ಕರವೇ ನಿರ್ಧಾರ
ಈ ವೇಳೆ ಮಾತನಾಡಿದ ಕರ್ನಾಟಕ ರಕ್ಷಣಾ ವೇದಿಕೆ ರಾಜ್ಯಾಧ್ಯಕ್ಷ ಪ್ರವೀಣ್ ಕುಮಾರ್ ಶೆಟ್ಟಿ, ಬೆಳಗಾವಿಯಲ್ಲಿ ಶಿವಸೇನೆ ಹಾಗೂ ಎಮ್ಇಎಸ್ ಸಂಘಟನೆಗಳು ಕನ್ನಡದ ಶಾಲು ಹಾಗೂ ಬಾವುಟ ಹಾಕಿಕೊಂಡವರಿಗೆ ಹೊಡೀತೀವಿ ಎಂದು ಸವಾಲು ಹಾಕಿದ್ದಾರೆ. ಈ ಸವಾಲು ಸ್ವೀಕರಿಸಿ ಮಹಾರಾಷ್ಟ್ರ ಗಡಿ ಮುಟ್ಟುವ ಕೆಲಸವನ್ನು ಬೆಳಗಾವಿ ಮುಖಾಂತರ ಮಾಡುತ್ತಿದ್ದೇವೆ. ಕೇಂದ್ರ ಹಾಗೂ ರಾಜ್ಯ ಸರ್ಕಾರ ಕನ್ನಡಿಗರಿಗೆ ಸೂಕ್ತ ರಕ್ಷಣೆ ನೀಡಬೇಕು ಎಂದು ಒತ್ತಾಯಿಸಿದರು.