ಹೈಕೋರ್ಟ್ ತಿಳಿಸಿದರೂ ಕಾಲೇಜು ಆರಂಭಕ್ಕೆ ಸರ್ಕಾರ ಹಿಂದೇಟು ಹಾಕುತ್ತಿರುವುದು ಯಾಕೆ?

ಶಾಲಾ-ಕಾಲೇಜು ಆರಂಭಿಸುವಂತೆ ಹೈಕೋರ್ಟ್ ತಿಳಿಸಿದರೂ ಸದ್ಯಕ್ಕೆ ಮೊದಲ ಹಂತವಾಗಿ ಸರ್ಕಾರ 9 ಮತ್ತು 10ನೇ ತರಗತಿ ಮಾತ್ರ ಶುರು ಮಾಡಲು ತೀರ್ಮಾನಿಸಿದೆ. ಇಂದಿನ ಸಭೆಯಲ್ಲಿ ಕಾಲೇಜು ಆರಂಭದ ಬಗ್ಗೆ ಸಿಎಂ ಚರ್ಚೆ ನಡೆಸಲಿದ್ದಾರೆ..

ಬೆಂಗಳೂರು :ರಾಜ್ಯದಲ್ಲಿ ಸಮವಸ್ತ್ರದೊಂದಿಗೆ ಹಿಜಾಬ್ ಧರಿಸುವ ವಿವಾದ ಮುಂದುವರೆದಿದೆ. ಸದ್ಯ ಕೋರ್ಟ್ ಅಂಗಳದಲ್ಲಿರುವ ವಿಚಾರಣೆ ಸೋಮವಾರಕ್ಕೆ ಮುಂದೂಡಲಾಗಿದೆ. ನಿನ್ನೆ (ಗುರುವಾರ) ವಾದ-ವಿವಾದ ಆಲಿಸಿದ ಬಳಿಕ ಮುಖ್ಯಮಂತ್ರಿ ‌ಬಸವರಾಜ ಬೊಮ್ಮಾಯಿ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಸೋಮವಾರದಿಂದ ಹೈಸ್ಕೂಲ್ ತರಗತಿ ಆರಂಭಕ್ಕೆ ಗ್ರೀನ್‌ ಸಿಗ್ನಲ್ ಕೊಟ್ಟಿದೆ.

ಆದರೆ, ಕಾಲೇಜುಗಳ ಆರಂಭಕ್ಕೆ ಸರ್ಕಾರ ಹಿಂದೇಟು ಹಾಕುತ್ತಿದೆ. ಶಾಲಾ-ಕಾಲೇಜು ಆರಂಭಿಸುವಂತೆ ಹೈಕೋರ್ಟ್ ತಿಳಿಸಿದರೂ ಸದ್ಯಕ್ಕೆ ಮೊದಲ ಹಂತವಾಗಿ ಸರ್ಕಾರ 9 ಮತ್ತು 10ನೇ ತರಗತಿ ಮಾತ್ರ ಶುರು ಮಾಡಲು ತೀರ್ಮಾನಿಸಿದೆ.

ಇಂದಿನ ಸಭೆಯಲ್ಲಿ ಕಾಲೇಜು ಆರಂಭದ ಬಗ್ಗೆ ಸಿಎಂ ಚರ್ಚೆ ನಡೆಸಲಿದ್ದಾರೆ. ಕಾಲೇಜುಗಳ ವಿಚಾರದಲ್ಲಿ ಶಿಕ್ಷಣ ಇಲಾಖೆಯಿಂದ ಎಚ್ಚರಿಕೆ ಹೆಜ್ಜೆ ಇಡಲು ತೀರ್ಮಾನಿಸಲಾಗಿದೆ.

ಕಾಲೇಜು ಆರಂಭಿಸಲು ಸರ್ಕಾರ ಯಾಕೆ ಹಿಂದೇಟು ಹಾಕುತ್ತಿದೆ ಎಂಬುವುದನ್ನು ನೋಡುವುದಾದರೆ..

1. ಹಿಜಾಬ್ ಹಾಗೂ ಕೇಸರಿ ಶಾಲು ಸಂಘರ್ಷ ಅತ್ಯಂತ ಸೂಕ್ಷ್ಮ ವಿಚಾರ.
2. ಹೀಗಾಗಿ, ಕಾಲೇಜು ಆರಂಭಿಸಿದರೆ ಮತ್ತೆ ಗಲಾಟೆ ಆಗುತ್ತದೆ ಎಂದು ಪೊಲೀಸ್ ಇಲಾಖೆಯಿಂದ ಮಾಹಿತಿ.
3. ಮುಂಜಾಗ್ರತಾ ಕ್ರಮವಾಗಿ ಕಾನೂನು ಸುವ್ಯವಸ್ಥೆ ದೃಷ್ಟಿಯಿಂದ ಹಾಗೂ ಅಹಿತಕರ ಘಟನೆ ನಡೆಯದಂತೆ ಮುನ್ನೆಚ್ಚರಿಕೆ.
4. ಸೋಮವಾರ ಹೈಕೋರ್ಟ್​ನಲ್ಲಿ ಹಿಜಬ್ ಅರ್ಜಿ ವಿಚಾರಣೆ ಇದ್ದು, ತೀರ್ಪು ನೋಡಿಕೊಂಡು ಬಳಿಕ ನಿರ್ಧಾರ.

ಸಾಮಾನ್ಯರಿಗೂ ಅನುಮಾನ ಮೂಡಿಸುತ್ತಿರುವ ವಿವಾದ :ಕೇರಳದಲ್ಲಿ ಹಿಜಾಬ್ ವಿಚಾರ ಬಂದಾಗ ವಿವಾದ ಆಗಲಿಲ್ಲ. ಆದರೆ, ಕರ್ನಾಟದಲ್ಲಿ ಹಿಜಾಬ್ ದೊಡ್ಡ ಮಟ್ಟದಲ್ಲಿ ಚರ್ಚೆ ಆಗುತ್ತಿರುವುದು ಸಾಮಾನ್ಯರಿಗೂ ಅನುಮಾನ ಮೂಡಿಸುತ್ತಿದೆ ಎಂದು ಶಿಕ್ಷಣ ಸಚಿವ ಬಿ ಸಿ ನಾಗೇಶ್ ಹೇಳಿದ್ದಾರೆ.

ಈ ಹಿಂದಿನಿಂದಲೂ ಮುಸ್ಲಿಂ ಮಹಿಳೆಯರಿಗೆ ವಿದ್ಯಾಭ್ಯಾಸ ದೊರೆತಿಲ್ಲ.‌ ಅವರು ಉನ್ನತ ಶಿಕ್ಷಣ ಪಡೆಯಯಬಾರದು ಎಂದು ಹಿಜಾಬ್ ಇಟ್ಟುಕೊಂಡು ಗಲಾಟೆ ಮಾಡ್ತಾರೆ. ಮುಸ್ಲಿಂ ಸಮುದಾಯದವರ ಉದ್ದೇಶವೇ ಹೆಣ್ಣು ಮಕ್ಕಳು ಕಾಲೇಜಿಗೆ ಹೋಗಬಾರದು ಎಂದು.

ಆದರೆ, ನಮ್ಮ ಸರ್ಕಾರ ಇದ್ಯಾವುದನ್ನೂ ಒಪ್ಪಲ್ಲ. ಸಮವಸ್ತ್ರ ಧರಿಸಿಯೇ ಶಾಲಾ-ಕಾಲೇಜಿಗೆ ಬರಬೇಕು. ಹಿಜಾಬ್, ಶಾಲು ಯಾವುದಕ್ಕೂ ಅವಕಾಶ ಇಲ್ಲ.‌ ಸೋಮವಾರದಿಂದ 9, 10ನೇ ತರಗತಿ ಪ್ರಾರಂಭವಾಗುತ್ತದೆ. ಅದಾದ ಬಳಿಕ ಪಿಯುಸಿ, ಡಿಗ್ರಿ ತರಗತಿ ಕೂಡ ಪ್ರಾರಂಭ ಮಾಡುತ್ತೇವೆ ಎಂದು ತಿಳಿಸಿದರು.

ಇದನ್ನೂ ಓದಿ:ಕೋರ್ಟ್‌ ನಾಗರಿಕರ ಮೂಲಭೂತ ಹಕ್ಕು ರಕ್ಷಿಸುತ್ತದೆ, ಸೂಕ್ತ ಸಮಯದಲ್ಲಿ ಅರ್ಜಿ ವಿಚಾರಣೆ: ಸುಪ್ರೀಂಕೋರ್ಟ್‌

ಹಿಜಾಬ್ ವಿವಾದ ಕಾಂಗ್ರೆಸ್​​ನ ಹಿಡನ್ ಅಜೆಂಡಾ. ಮುಸ್ಲಿಂ ಮಹಿಳೆಯರ ವಿಷಯವನ್ನು ರಾಜಕೀಯಕ್ಕೆ ಬಳಕೆ ಮಾಡಿದ್ದಾರೆ ಎಂದು ಸಚಿವ ಬಿ.ಸಿ ನಾಗೇಶ್ ಕಿಡಿಕಾರಿದ್ದಾರೆ. ಈ ಬೆಳವಣಿಗೆ ನೋಡಿದ್ರೆ ಹಾಗೆ ಅನ್ಸಲ್ವಾ? ಎಂದು ಪ್ರಶ್ನಿಸಿದ ಅವರು, ಕೋರ್ಟ್​ನಲ್ಲಿ ವಾದ ಮಾಡಿದ ಲಾಯರ್ ಯಾರು ಅಂತಾ ನೋಡಿದರೆ ಗೊತ್ತಾಗುತ್ತದೆ.

ಕಾಂಗ್ರೆಸ್ ಇಂತಹ ವಿಷಯದಲ್ಲೂ ಸಹ ರಾಜಕೀಯ ಮಾಡುತ್ತದೆ. ಹಲವಾರು ದೇಶ ಹಿಜಾಬ್ ಬ್ಯಾನ್ ಮಾಡಿದೆ. ಆದ್ರೆ, ಅದು ಯಾಕೆ ಸುದ್ದಿ ಆಗಿಲ್ಲ?. ಕರ್ನಾಟಕದ ವಿಷಯ ಮಾತ್ರ ಹೇಗೆ ಅಂತಾರಾಷ್ಟ್ರೀಯ ಮಟ್ಟದ ಸುದ್ದಿಯಾಯಿತು. ಇವೆಲ್ಲ ಗಮನಿಸಿದರೆ ಯಾರದ್ದೋ ಕೈವಾಡ ಇದರಲ್ಲಿ ಇದೆ ಎಂಬುವುದು ಸ್ಪಷ್ಟವಾಗಿ ಗೊತ್ತಾಗುತ್ತದೆ ಎಂದರು.