ಪರಿಶಿಷ್ಟ ಜಾತಿ ಮತ್ತು ಪಂಗಡದ ಅಭಿವೃದ್ಧಿಗಾಗಿನ SCSP/TSP ಅನುದಾನ ಬಳಕೆಯಲ್ಲಿ ಕಳಪೆ ಸಾಧನೆ

ಕರ್ನಾಟಕ ಅನುಸೂಚಿತ ಜಾತಿಗಳ ಉಪ ಹಂಚಿಕೆ ಮತ್ತು ಬುಡಕಟ್ಟುಗಳ ಉಪ ಹಂಚಿಕೆ ಪಂಗಡದ ಅಭಿವೃದ್ಧಿಗಾಗಿ ನೀಡಲಾಗಿದ್ದ ಅನುದಾನ ಸರಿಯಾಗಿ ಬಳಕೆಯಾಗಿಲ್ಲ. ಪರಿಶಿಷ್ಟ ಜಾತಿ ಮತ್ತು ಪಂಗಡದ ಅಭಿವೃದ್ಧಿಗೆ ಜಾರಿಗೆ ತರಲಾಗಿರುವ ಅನುದಾನ ಬಳಕೆಯಲ್ಲಿ ರಾಜ್ಯ ಸರ್ಕಾರ ನಿರಾಸಕ್ತಿ ತೋರಿದೆ.

ಬೆಂಗಳೂರು : ಪರಿಶಿಷ್ಟ ಜಾತಿ ಮತ್ತು ಪಂಗಡದ ಅಭಿವೃದ್ಧಿಗೆ ಜಾರಿಗೆ ತರಲಾಗಿರುವ ಎಸ್‌ಸಿಎಸ್​ಪಿ - ಟಿಎಸ್‌ಪಿ ಅನುದಾನ ಬಳಕೆಯಲ್ಲಿ ರಾಜ್ಯ ಸರ್ಕಾರದ ನಿರಾಸಕ್ತಿ ಎದ್ದು ಕಾಣುತ್ತಿದೆ. 2022-23ರ ಸಾಲಿನ ಮೊದಲ ನಾಲ್ಕು ತಿಂಗಳಲ್ಲಿನ ಪ್ರಗತಿ ನಿರಾಶಾದಾಯಕವಾಗಿದೆ.

2022-23 ಸಾಲಿನಲ್ಲಿ ಕರ್ನಾಟಕ ಅನುಸೂಚಿತ ಜಾತಿಗಳ ಉಪ ಹಂಚಿಕೆ ಮತ್ತು ಬುಡಕಟ್ಟುಗಳ ಉಪ ಹಂಚಿಕೆ(SCSP/TSP)ಯಲ್ಲಿ ಒಟ್ಟು 31,635.54 ಕೋಟಿ ರೂ.ಹಂಚಿಕೆ ಮಾಡಿದೆ. ಈ ಪೈಕಿ SCSPಗೆ 22,474.01 ಕೋಟಿ ರೂ‌. ಮತ್ತು TSPಗೆ 9,161.53 ಕೋಟಿ ರೂ. ಹಂಚಿಕೆ ಮಾಡಲಾಗಿದೆ. ಈ ಅನುದಾನವನ್ನು ಆಯಾ ಇಲಾಖೆಗಳು ಅನುಸೂಚಿತ ಜಾತಿ ಹಾಗೂ ಪಂಗಡದ ಅಭಿವೃದ್ಧಿಗಾಗಿ ಮಾತ್ರ ಬಳಸಬೇಕು.

ಆದರೆ 2022-23ರ ಸಾಲಿನ ಮೊದಲ ನಾಲ್ಕು ತಿಂಗಳಲ್ಲಿ SCSP-TSP ಅನುದಾನ ಬಳಕೆಯಲ್ಲಿ ಬಹುತೇಕ ಇಲಾಖೆಗಳು ನಿರಾಸಕ್ತಿ ತೋರುತ್ತಿವೆ. ಬಹುತೇಕ ಇಲಾಖೆಗಳು ಅನುದಾನ ಬಳಕೆಯೇ ಮಾಡಿಲ್ಲ. ಬೆರಳೆಣಿಕೆಯಷ್ಟು ಇಲಾಖೆಗಳು ಈ ಅನುದಾನ ಬಳಕೆಯಲ್ಲಿ ಉತ್ತಮ ಪ್ರಗತಿ ಕಂಡಿದೆ.

SCSPಯ ಪ್ರಗತಿ ಕೇವಲ 12.56%:SCSPಯಡಿ 2022-23 ಸಾಲಿನಲ್ಲಿ ಒಟ್ಟು 22,474.01 ಕೋಟಿ ರೂ. ಹಂಚಿಕೆ ‌ಮಾಡಲಾಗಿದೆ. ಈ ಪೈಕಿ ಕಳೆದ ನಾಲ್ಕು ತಿಂಗಳಲ್ಲಿ ಬಿಡುಗಡೆಯಾದ ಅನುದಾನ 5,117.80 ಕೋಟಿ ರೂಪಾಯಿ.

ವಿವಿಧ ಇಲಾಖೆಗಳು ಒಟ್ಟು 2,823.40 ಕೋಟಿ ರೂ. ಅನುಸೂಚಿತ ಜಾತಿಗಳ ಉಪ ಹಂಚಿಕೆಯಡಿ ಖರ್ಚು ಮಾಡಿದೆ. ಅಂದರೆ ಒಟ್ಟು ಅನುದಾನ ಬಿಡುಗಡೆ ಪ್ರತಿ 55.17% ಖರ್ಚು ಮಾಡಿದೆ. ಒಟ್ಟು ಸಂಚಿಕೆಯ ಪ್ರತಿ ಈವರೆಗೆ ಕೇವಲ 12.56% ಮಾತ್ರ ಪ್ರಗತಿ ಕಾಣಲಾಗಿದೆ. ಒಟ್ಟು 15 ಇಲಾಖೆಗಳು ತೀರಾ ಕಳಪೆ ಆರ್ಥಿಕ ಪ್ರಗತಿ ಸಾಧಿಸಿದೆ ಎಂದು ಸಾಂಖ್ಯಿಕ ಹಾಗೂ ಯೋಜನಾ ಇಲಾಖೆ ಅಂಕಿಅಂಶ ನೀಡಿದೆ.

TSPಯ ಪ್ರಗತಿ ಕೇವಲ 13.59%:TSPಯಡಿ 2022-23 ಸಾಲಿನಲ್ಲಿ ಒಟ್ಟು 9,161.53 ಕೋಟಿ ರೂ. ಅನುದಾನ ಹಂಚಿಕೆ ಮಾಡಲಾಗಿದೆ. ಈ ಪೈಕಿ ಕಳೆದ ನಾಲ್ಕು ತಿಂಗಳಲ್ಲಿ ಬಿಡುಗಡೆಯಾದ ಅನುದಾನ 1,918.25 ಕೋಟಿ ರೂಪಾಯಿ.

ವಿವಿಧ ಇಲಾಖೆಗಳು ಕಳೆದ ನಾಲ್ಕು ತಿಂಗಳಲ್ಲಿ ಬುಡಕಟ್ಟುಗಳ ಉಪಹಂಚಿಕೆಯಡಿ ಖರ್ಚು ಮಾಡಿದ್ದು 1,244.60 ಕೋಟಿ ರೂಪಾಯಿ. ಅಂದರೆ ಒಟ್ಟು ಅನುದಾನ ಬಿಡುಗಡೆ ಪ್ರತಿ 64.88% ಖರ್ಚು ಮಾಡಲಾಗಿದೆ. ಆದರೆ ಒಟ್ಟು ಹಂಚಿಕೆಯ ಮುಂದೆ ಈವರೆಗೆ ಖರ್ಚು ಮಾಡಿದ್ದು ಕೇವಲ 13.59%.

ಕಳಪೆ ಪ್ರಗತಿ ಕಂಡ ಇಲಾಖೆಗಳು ಯಾವುವು?:

1. ಕೃಷಿ ಇಲಾಖೆ:ಎಸ್​ಸಿಎಸ್​ಪಿ- 9.34% , ಟಿಎಸ್​ಪಿ- 5.25%
2. ಆಹಾರ ಇಲಾಖೆ:ಎಸ್​ಸಿಎಸ್​ಪಿ- 9.08%, ಟಿಎಸ್​ಪಿ- 9.41%
3. ಅರಣ್ಯ,ಪರಿಸರ ಇಲಾಖೆ:ಎಸ್​ಸಿಎಸ್​ಪಿ- 12.17%, ಟಿಎಸ್​ಪಿ- 2.39%
4. ಉನ್ನತ ಶಿಕ್ಷಣ ಇಲಾಖೆ:ಎಸ್​ಸಿಎಸ್​ಪಿ-1.11%, ಟಿಎಸ್​ಪಿ- 1.38%
5. ಗೃಹ ಇಲಾಖೆ:ಎಸ್​ಸಿಎಸ್​ಪಿ - 0%, ಟಿಎಸ್​ಪಿ- 0%
6. ಐಟಿ/ಬಿಟಿ ಇಲಾಖೆ:ಎಸ್​ಸಿಎಸ್​ಪಿ- 6.25%, ಟಿಎಸ್​ಪಿ- 11.04%
7. ಶಿಕ್ಷಣ ಇಲಾಖೆ:ಎಸ್​ಸಿಎಸ್​ಪಿ- 6.92%, ಟಿಎಸ್​ಪಿ- 8.09%
8. ಕಂದಾಯ ಇಲಾಖೆ:ಎಸ್​ಸಿಎಸ್​ಪಿ- 0.77%, ಟಿಎಸ್​ಪಿ- 0.09%
9. ಗ್ರಾಮೀಣಾಭಿವೃದ್ಧಿ ಇಲಾಖೆ:ಎಸ್​ಸಿಎಸ್​ಪಿ- 2.81%, ಟಿಎಸ್​ಪಿ- 2.99%
10. ಪ್ರವಾಸೋದ್ಯಮ ಇಲಾಖೆ:ಎಸ್​ಸಿಎಸ್​ಪಿ- 0%, ಟಿಎಸ್​ಪಿ- 0%
11. ಜಲಸಂಪನ್ಮೂಲ ಇಲಾಖೆ:ಎಸ್​ಸಿಎಸ್​ಪಿ- 7.16%, ಟಿಎಸ್​ಪಿ- 10.38%
12. ಯುವ ಸಬಲೀಕರಣ, ಕ್ರೀಡಾ ಇಲಾಖೆ:ಎಸ್​ಸಿಎಸ್​ಪಿ- 0.40%, ಟಿಎಸ್​ಪಿ- 2.40%
13. ಕೌಶಲ್ಯಾಭಿವೃದ್ಧಿ ಇಲಾಖೆ:ಎಸ್​ಸಿಎಸ್​ಪಿ- 2.91%, ಟಿಎಸ್​ಪಿ- 2.85%

ಇದನ್ನೂ ಓದಿ :ಸಂತೋಷ್​ ಪಾಟೀಲ ಆತ್ಮಹತ್ಯೆ ಪ್ರಕರಣ : ಬಿ ರಿಪೋರ್ಟ್ ಪ್ರಶ್ನಿಸಿ ಕೋರ್ಟ್ ಮೆಟ್ಟಿಲೇರಿದ ಕುಟುಂಬಸ್ಥರು