ಬೆಂಗಳೂರು: ನೀವು ಹೋರಾಡಿದಂತೆ ಸಾಮಾನ್ಯ ನಾಯಕನಿಂದ ಹೋರಾಡಲು ಸಾಧ್ಯವಿಲ್ಲ ಎಂದು ಮಾಜಿ ಪ್ರಧಾನಿ ಹೆಚ್.ಡಿ ದೇವೇಗೌಡ ಪ.ಬಂಗಾಳ ಜಯಭೇರಿಗಾಗಿ ಮಮತಾ ಬ್ಯಾನರ್ಜಿಗೆ ಅಭಿನಂದನೆ ಸಲ್ಲಿಸಿದ್ದಾರೆ.
ಈ ಸಂಬಂಧ ಟ್ವೀಟ್ ಮಾಡಿರುವ ಅವರು, ಐತಿಹಾಸಿಕ ಗೆಲುವಿಗಾಗಿ ಮಮತಾಗೆ ಅಭಿನಂದನೆ ಸಲ್ಲಿಸಿದ್ದಾರೆ. ಭಾರಿ ಒತ್ತಡಗಳ ಮಧ್ಯೆ ನೀವು ಗಟ್ಟಿಯಾಗಿ ನಿಂತು ಹೋರಾಟ ನಡೆಸಿದ್ದೀರಿ. ಮೂರನೇ ಬಾರಿಗೆ ಮುಖ್ಯಮಂತ್ರಿ ಆಗುತ್ತಿರುವ ನಿಮಗೆ ನನ್ನ ಶುಭ ಕಾಮನೆಗಳು. ಇನ್ನಷ್ಟು ಸಮರ್ಪಣಾ ಭಾವದೊಂದಿಗೆ ಪ.ಬಂಗಾಳ ಜನತೆಯ ಸೇವೆ ಮಾಡುತ್ತೀರಿ ಎಂಬ ವಿಶ್ವಾಸ ನನಗಿದೆ ಎಂದಿದ್ದಾರೆ.
ತಮಿಳುನಾಡಿನಲ್ಲಿ ಡಿಎಂಕೆ ಭರ್ಜರಿ ಗೆಲುವು ಸಾಧಿಸಿದ ಹಿನ್ನೆಲೆ ಎಂ.ಕೆ. ಸ್ಟಾಲಿನ್ ಗೂ ಹೆಚ್ಡಿಡಿ ಅಭಿನಂದನೆ ಸಲ್ಲಿಸಿದ್ದಾರೆ. ನನ್ನ ಸ್ನೇಹಿತ ಹಾಗೂ ನಿಮ್ಮ ತಂದೆಯವರಾದ ಕರುಣಾನಿಧಿ ಈ ಸಾಧನೆಗೆ ಹೆಮ್ಮೆ ಪಡುತ್ತಿದ್ದರು. ತಮಿಳುನಾಡಿನ ಜನರ ಸೇವಾ ಮನೋಭಾವದೊಂದಿಗೆ ಉತ್ತಮ ಆಡಳಿತ ನೀಡಲಿದ್ದೀರ ಎಂಬ ವಿಶ್ವಾಸ ಇದೆ ಎಂದು ಅಭಿನಂದನೆ ಸಲ್ಲಿಸಿದ್ದಾರೆ.
ಕೇರಳದಲ್ಲಿ ಜಯಭೇರಿ ಭಾರಿಸಿದ ಪಿಣರಾಯಿ ವಿಜಯನ್ಗೂ ಅಭಿನಂದನೆ ಸಲ್ಲಿಸಿರುವ ದೇವೇಗೌಡರು, ನಿಮ್ಮ ನಾಯಕತ್ವ, ಬದ್ಧತೆ, ನೀತಿಗಳಲ್ಲಿನ ಸ್ಪಷ್ಟತೆಯಿಂದಾಗಿ ನೀವು ಭರ್ಜರಿ ಗೆಲುವು ಸಾಧಿಸಲು ಸಾಧ್ಯವಾಗಿದೆ. ಮುಂದಿನ ಐದು ವರ್ಷಗಳ ಆಡಳಿತಾವಧಿಗೆ ನನ್ನ ಶುಭಕಾಮನೆಗಳು ಎಂದಿದ್ದಾರೆ.
