ಸಂಚಾರ ಪೊಲೀಸರ ಹಲ್ಲೆ ಆರೋಪ: ಐಐಎಸ್​​ಸಿ ವಿಜ್ಞಾನಿ ದೂರು

ಭಾರತೀಯ ವಿಜ್ಞಾನ ಸಂಸ್ಥೆಯ ಯುವ ವಿಜ್ಞಾನಿ ಅವನೀಶ್ ಪ್ರತಾಪ್ ಸಿಂಗ್ ಎಂಬುವರ ಮೇಲೆ ಸಂಚಾರ ಪೊಲೀಸರು ಹಲ್ಲೆ ಮಾಡಿದ್ದಾರೆ ಎಂಬ ಆರೋಪ ಕೇಳಿ ಬಂದಿದೆ.

ಬೆಂಗಳೂರು:ಬಾಡಿಗೆ ಕಾರು ಪಡೆದು ಸ್ನೇಹಿತರೊಂದಿಗೆ ಬನ್ನೇರುಘಟ್ಟ ರಾಷ್ಟ್ರೀಯ ಪಾರ್ಕ್​ಗೆ ತೆರಳುವಾಗ ತಪಾಸಣೆಗಾಗಿ ಅಡ್ಡಗಟ್ಟಿದ ಮೈಕೊ‌ ಲೇಔಟ್ ಸಂಚಾರ ಪೊಲೀಸರು, ತಮ್ಮ ಮೇಲೆ ಹಲ್ಲೆ ಮಾಡಿದ್ದಾರೆ ಎಂದು ಐಐಎಸ್​​​ಸಿ ವಿಜ್ಞಾನಿ ಆರೋಪಿಸಿದ್ದಾರೆ.

ಅವನೀಶ್ ಪ್ರತಾಪ್ ಸಿಂಗ್ ಬರೆದ ದೂರಿನ ಪತ್ರ

ಭಾರತೀಯ ವಿಜ್ಞಾನ ಸಂಸ್ಥೆಯ ಯುವ ವಿಜ್ಞಾನಿ ಅವನೀಶ್ ಪ್ರತಾಪ್ ಸಿಂಗ್ ಎಂಬುವರು ಕಳೆದ ಭಾನುವಾರ ಬನ್ನೇರುಘಟ್ಟ ನ್ಯಾಷನಲ್ ಪಾರ್ಕ್​ಗೆ ಕಂಪೆನಿಯೊಂದರ ಕಾರು ಬಾಡಿಗೆ ಪಡೆದು ಸ್ನೇಹಿತರೊಂದಿಗೆ ತೆರಳಿದ್ದರು.‌ ಬನ್ನೇರುಘಟ್ಟ ರಸ್ತೆಯ ಗೋಪಾಲನ್ ಮಾಲ್ ಬಳಿ ಮೈಕೊ ಲೇಔಟ್ ಸಂಚಾರ ಪೊಲೀಸರು ಕಾರನ್ನು ಅಡ್ಡಗಟ್ಟಿದ್ದಾರೆ ಎನ್ನಲಾಗಿದೆ.

ಸಮವಸ್ತ್ರ ಧರಿಸದೆ ವಾಹನ ಚಾಲನೆ ಮಾಡಿದ್ದೀರಾ. ಹೀಗಾಗಿ 100 ರೂ.ದಂಡ ಪಾವತಿಸಿ ಎಂದು ಅವನೀಶ್ ಸಿಂಗ್​​ಗೆ ಪೊಲೀಸರು ಸೂಚಿಸಿದ್ದರು ಎಂದು ಅವರು ತಮ್ಮ ದೂರಿನಲ್ಲಿ ತಿಳಿಸಿದ್ದಾರೆ.

ನಾನು ಕಾರನ್ನು ಬಾಡಿಗೆ ಪಡೆದು ವಾಹನ ಚಾಲನೆ ಮಾಡುತ್ತಿದ್ದು, ಸಮವಸ್ತ್ರ ಧರಿಸಿಲ್ಲ.‌ ಅಲ್ಲದೆ ದಂಡ ವಿಧಿಸಲು ಅವಕಾಶವಿಲ್ಲ ಎಂದು ಹೇಳಿದೆ. ಆದರೆ, ಪೊಲೀಸರು ದಂಡ ಕಟ್ಟಲೇಬೇಕೆಂದು ಪಟ್ಟು ಹಿಡಿದರು. ಈ ವೇಳೆ ಮಾತಿನ ಚಕಮಕಿ ನಡೆದು ಪೊಲೀಸರು ನನ್ನ ಮೇಲೆ ಹಲ್ಲೆ ಮಾಡಿದರು ಎಂದು ಮೈಕೋ ಲೇಔಟ್​ ಠಾಣೆಗೆ ನೀಡಿರುವ ದೂರಿನಲ್ಲಿ ಅವನೀಶ್​ ತಿಳಿಸಿದ್ದಾರೆ.