ಸಾರ್ವಜನಿಕ ಸ್ಥಳದಲ್ಲಿ ಮಹಿಳೆಯ ಕಾರು ಸುತ್ತುವರಿದು ಅಸಭ್ಯ ವರ್ತನೆ: ಮಹಾದೇವಪುರದಲ್ಲಿ ಘಟನೆ

ಮಹಿಳೆಯೊಬ್ಬರ ಕಾರಿಗೆ ಅಡ್ಡಲಾಗಿ ನಿಂತ ವ್ಯಕ್ತಿಯೊಬ್ಬ ಅಸಭ್ಯವಾಗಿ ವರ್ತಿಸಿ ಭಯ ಸೃಷ್ಟಿಸಿರುವುದು ಭಾಗಮನೆ ಟೆಕ್​ಪಾರ್ಕ್​ ಸಮೀಪದ ಸರ್ವೀಸ್​​ ರಸ್ತೆಯಲ್ಲಿ ಕಳೆದ ಗುರುವಾರ ನಡೆದಿದೆ. ಈ ಕುರಿತು ಸಂತ್ರಸ್ತೆ ಸಾಮಾಜಿಕ ಜಾಲತಾಣದಲ್ಲಿ ತನಗಾದ ಕಹಿ ಅನುಭವದ ಬಗ್ಗೆ ಹಂಚಿಕೊಂಡಿದ್ದಾರೆ.

ಬೆಂಗಳೂರು:ಸಾರ್ವಜನಿಕ ಸ್ಥಳದಲ್ಲಿ ಮಹಿಳೆಯೊಬ್ಬರ ಕಾರಿಗೆ ಅಡ್ಡಲಾಗಿ ನಿಂತ ವ್ಯಕ್ತಿಯೊಬ್ಬ ಅಸಭ್ಯವಾಗಿ ವರ್ತಿಸಿ ಭಯ ಸೃಷ್ಟಿಸಿರುವ ಘಟನೆ ಗುರುವಾರ ರಾತ್ರಿ ಭಾಗಮನೆ ಟೆಕ್​ಪಾರ್ಕ್ ಸಮೀಪದ ಸರ್ವೀಸ್​ ರಸ್ತೆಯಲ್ಲಿ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ.

ಅಂದು ರಾತ್ರಿ 8:40ರ ಸುಮಾರಿಗೆ ಕಾರಿನಲ್ಲಿ ತೆರಳುತ್ತಿದ್ದ ಮಹಿಳೆಗೆ ಅಪರಿಚಿತ ವ್ಯಕ್ತಿಯೊಬ್ಬ ಕಿರುಕುಳ ನೀಡಿದ್ದು, ತಮಗಾದ ಕಹಿ ಅನುಭವವನ್ನು ವಿಡಿಯೋ ಸಮೇತ ಎಕ್ಸ್'ನಲ್ಲಿ ಪ್ರಕಟಿಸಿದ್ದಾರೆ. ದೂರುದಾರ ಮಹಿಳೆ ಗುರುವಾರ ರಾತ್ರಿ ಭಾಗಮನೆ ಟೆಕ್ ಪಾರ್ಕ್​ ಸಮೀಪದ ಸರ್ವೀಸ್ ರಸ್ತೆಯಲ್ಲಿ ತಮ್ಮ ಕಾರಿನಲ್ಲಿ ತೆರಳುತ್ತಿದ್ದಾಗ, ರಸ್ತೆಗೆ ಅಡ್ಡಲಾಗಿ ಮತ್ತೊಂದು ಕಾರು ನಿಂತಿದ್ದರಿಂದ ತಮ್ಮ ಕಾರು ನಿಲ್ಲಿಸಿದ್ದರು. ಆ ಸಮಯದಲ್ಲಿ ಕಾರಿನ ಬಳಿ ಬಂದಿದ್ದ ವ್ಯಕ್ತಿ, ದೂರುದಾರೆಯನ್ನು ದಿಟ್ಟಿಸುತ್ತ ಅಸಭ್ಯವಾಗಿ ವರ್ತಿಸಿ, ಅಶ್ಲೀಲವಾಗಿ ವರ್ತಿಸಲಾರಂಭಿಸಿದ್ದ.

ಅದನ್ನು ನೋಡಿ ಭಯದಿಂದ ಮಹಿಳೆ ತಮ್ಮ ಕಾರಿನ ಡೋರ್​ ಲಾಕ್​ ಮಾಡಿಕೊಂಡು ಕುಳಿತಿದ್ದರು. ಅನಂತರವೂ ಕಾರಿನ ಬಳಿ ಬಂದು ಸುತ್ತಲೂ ಓಡಾಡಿದ್ದ ಅಪರಿಚಿತ ಆಸಾಮಿ ತನ್ನ ಕೃತ್ಯ ಮುಂದುವರೆಸಿದ್ದಾನೆ. ಹೆದರಿಕೆಯಿಂದ ಅತನಿಂದ ತಪ್ಪಿಸಿಕೊಳ್ಳಲು ಸ್ಟೇರಿಂಗ್​ ಕೆಳಗೆ ಅವಿತುಕೊಂಡಿದ್ದ ಮಹಿಳೆ, ನಂತರ ತನ್ನ ಸ್ನೇಹಿತರೊಬ್ಬರು ಬಂದ ಬಳಿಕ ಸ್ಥಳದಿಂದ ತೆರಳಿದ್ದರಂತೆ.

ತಮಗಾದ ಕಹಿ ಅನುಭವದ ಕುರಿತು ಸದ್ಯ ಎಕ್ಸ್​ನಲ್ಲಿ ಪ್ರಕಟಿಸಿದ್ದು, ಘಟನೆಯ ಕುರಿತು ತನಿಖೆ ನಡೆಸುವಂತೆ ಮಹಾದೇವಪುರ ಠಾಣಾ ಪೊಲೀಸರಿಗೆ ನಗರ ಪೊಲೀಸ್​ ಆಯುಕ್ತರು ಸೂಚಿಸಿದ್ದಾರೆ.

ಇದನ್ನೂ ಓದಿ:ದೊಡ್ಡಬಳ್ಳಾಪುರ: "ಬುಜ್ಜಿ ಐ ಮಿಸ್ ಯೂ.." ಆತ್ಮಹತ್ಯೆಗೆ ಶರಣಾದ ವಿದ್ಯಾರ್ಥಿನಿ