ಬೆಂಗಳೂರು:ಐಎಂಎ ವಂಚನೆ ಪ್ರಕರಣದಲ್ಲಿ ಸದ್ಯ ಮಾಜಿ ಸಚಿವ ರೋಷನ್ಬೇಗ್ ಅಂದರ್ ಬಳಿಕ ಬಹಳಷ್ಟು ಮಂದಿಗೆ ಎದೆಯಲ್ಲಿ ಡವ ಡವ ಶುರುವಾಗಿದೆ.
ಸದ್ಯ ಸಿಬಿಐ ಮನ್ಸೂರ್ನಿಂದ ಹಣ ವರ್ಗಾವಣೆ ಆದವರ ಬಗ್ಗೆ ಮಾಹಿತಿ ಕಲೆ ಹಾಕುತ್ತಿದೆ. ಐಎಂಎ ಪ್ರಕರಣ ಶಾಸಕ ಜಮೀರ್ಗೆ ಕೂಡ ಅಂಟಿಕೊಳ್ಳುವ ಲಕ್ಷಣ ಕಾಣುತ್ತಿದೆ. ಈ ಹಿಂದೆ ಜಮೀರ್ 2018 ರ ಚುನಾವಣಾ ಸಂದರ್ಭದಲ್ಲಿ ಆಸ್ತಿ ವಿವರ ಸಲ್ಲಿಸಿ, ಅದರಲ್ಲಿ ಆಸ್ತಿ ವಿವರ ನಮೂದು ಮಾಡಿದ್ದರು. ಅಲ್ಲದೇ ಮನ್ಸೂರ್ ಖಾನ್ ಜೊತೆ ಒಡನಾಟ ಇಟ್ಟುಕೊಂಡಿದ್ದರು. ಸದ್ಯ ಮನ್ಸೂರ್ನನ್ನ ಮತ್ತೆ ಕಸ್ಟಡಿಗೆ ಪಡೆದುಕೊಂಡಿರುವ ಸಿಬಿಐ ಆತನಿಂದ ಯಾರಿಗೆಲ್ಲ ಹಣ ವರ್ಗಾವಣೆ ಆಗಿದೆ ಅನ್ನೋ ಕುರಿತು ಮಾಹಿತಿ ಕಲೆಹಾಕ್ತಿದ್ದಾರೆ. ಜಮೀರ್ ಹೆಸರನ್ನ ಮನ್ಸೂರ್ ಬಾಯ್ಬಿಟ್ಟರೆ, ಜಮೀರ್ ಅಹ್ಮದ್ ಖಾನ್ಗೂ ಸಂಕಷ್ಟ ತಪ್ಪಿದ್ದಲ್ಲ ಎನ್ನಲಾಗಿದೆ.
ಐಎಂಎ ಬಹುಕೋಟಿ ಹಗರಣ ಸಂಬಂಧ ಮೊದಲು ಸಿಸಿಬಿ ತನಿಖೆ ನಡೆಸಿ ನಂತರ ಎಸ್ಐಟಿಗೆ ಕೇಸ್ ವರ್ಗಾಯಿಸಲಾಗಿತ್ತು. ಸ್ಪೆಷಲ್ ಇನ್ವೆಸ್ಟಿಗೇಟಿವ್ ಟೀಂ ನಿಂದ ತನಿಖೆ ನಡೆಯುತ್ತಿದ್ದ ವೇಳೆ ಜಮೀರ್ಗೂ ನೋಟಿಸ್ ಕೊಟ್ಟು ಮಾಹಿತಿ ನೀಡಲು ತಿಳಿಸಿತ್ತು. ಎಸ್ಐಟಿ ನಂತರ ಇಡಿ ಯಿಂದಲೂ ಜಮೀರ್ಗೆ ಸಮನ್ಸ್ ಬಂದಿತ್ತು. ಸದ್ಯ ಜಮೀರ್ ಆತಂಕದಲ್ಲಿದ್ದು, ಈ ಹಿಂದೆ ಮಾಧ್ಯಮಗಳ ಜತೆ ಮಾತಾಡಿ ಸಿಬಿಐ ನೋಟಿಸ್ ನೀಡಿದ್ರೂ ಸಮಸ್ಯೆಯಿಲ್ಲ. ಯಾಕಂದ್ರೆ ರಿಚ್ಮಂಡ್‌ ಟೌನ್‌ನ ಸರ್ಪಂಟೈನ್‌ ರಸ್ತೆಯಲ್ಲಿರುವ ನಿವೇಶನವೊಂದನ್ನು ಮನ್ಸೂರ್ ಖಾನ್‌ಗೆ 2017ರ ಡಿಸೆಂಬರ್‌ನಲ್ಲಿ ಮಾರಾಟ ಮಾಡಿದ್ದೆ. ಈ ವ್ಯವಹಾರ ಅತ್ಯಂತ ಪಾರದಶರ್ಕವಾಗಿದೆ. ಆರ್‌ಟಿಜಿಎಸ್‌ ಮೂಲಕವೇ ಅವರಿಂದ ಹಣ ಪಡೆದಿದ್ದೇನೆ. ಇದನ್ನು ಬಿಟ್ಟು ಬೇರೆ ಯಾವುದೇ ಹಣ ಪಡೆದಿಲ್ಲ ಎಂದು ಎಸ್ಐಟಿ ವಿಚಾರಣೆ ವೇಳೆ ಕೂಡ ತಿಳಿಸಿದ್ದರು.
ಸದ್ಯ ಮನ್ಸೂರ್ ನೀಡುವ ಮಾಹಿತಿ ಮೇಲೆ ಜಮೀರ್ಗೆ ನೋಟಿಸ್ ನೀಡಬೇಕಾ..?! ಅಥವಾ ಬೇಡವಾ ಅನ್ನೋದ್ರ ಬಗ್ಗೆ ನಿರ್ಧಾರವಾಗಲಿದೆ. ಸದ್ಯ ಹಣದ ಬಗ್ಗೆ ತನಿಖೆಯ ಆಳಕ್ಕಿಳಿದು ಸಿಬಿಐ ಪರಿಶೀಲನೆ ಮಾಡ್ತಿದೆ.
