ಕಡಿಮೆ ವೆಚ್ಚದ ಕೃತಕ ಉಸಿರಾಟದ ಯಂತ್ರದ ಮೂಲ ಮಾದರಿ ತಯಾರಿಸಿದ ಐಐಎಸ್​ಸಿ

ಭಾರತ ವಿಜ್ಞಾನ ಲೋಕದ ಮುಕುಟಮಣಿ ಎಂದು ಕರೆಸಿಕೊಳ್ಳುವ ಐಐಎಸ್​ಸಿ ವಿಜ್ಞಾನಿಗಳು ಸುಮಾರು 1 ತಿಂಗಳಲ್ಲಿ ಕಡಿಮೆ ವೆಚ್ಚದ ವೆಂಟಿಲೇಟರ್​ನ ಮೂಲ ಮಾದರಿಯನ್ನು ಪರಿಚಯಿಸಿದ್ದಾರೆ.

ಬೆಂಗಳೂರು:ಪ್ರಾಜೆಕ್ಟ್ ಪ್ರಾಣ (ಸಂಸ್ಕೃತದಲ್ಲಿ ಉಸಿರು ಅಥವಾ ಜೀವ) ಎಂಬ ಹೆಸರನ್ನು ಕೃತಕ ಉಸಿರಾಟದ ಯಂತ್ರಕ್ಕಿಟ್ಟು, ಐಐಎಸ್​ಸಿ ವಿಜ್ಞಾನಿಗಳು ಈಗ ಅದರ ಮೂಲ ಮಾದರಿಯನ್ನು ಪರಿಚಯಿಸಿದ್ದಾರೆ.

ಕೋವಿಡ್-19 ದುಷ್ಪರಿಣಾಮದಿಂದಾಗಿ ನ್ಯೂಮೋನಿಯಾ ಉಂಟಾಗುವ ಸಾಧ್ಯತೆ ಇರುವುದರಿಂದ ಮಾರ್ಚ್ 2020ರ ಕೊನೆಯಲ್ಲಿ ಕೃತಕ ಉಸಿರಾಟ ಯಂತ್ರ (ventilator) ತಯಾರು ಮಾಡಲು ಐಐಎಸ್​ಸಿ ವಿಜ್ಞಾನಿಗಳು ನಿರ್ಧರಿಸಿದ್ದರು. ಭಾರತ ವಿಜ್ಞಾನ ಲೋಕದ ಮುಕುಟಮಣಿ ಎಂದು ಕರೆಸಿಕೊಳ್ಳುವ ಐಐಎಸ್​ಸಿ ವಿಜ್ಞಾನಿಗಳು ಸುಮಾರು 1 ತಿಂಗಳಲ್ಲಿ ಕಡಿಮೆ ವೆಚ್ಚದ ವೆಂಟಿಲೇಟರ್​ನ ಮೂಲ ಮಾದರಿಯನ್ನು ಪರಿಚಯಿಸಿದ್ದಾರೆ.

35 ದಿನಗಳಲ್ಲಿ ಕೃತಕ ಉಸಿರಾಟದ ಯಂತ್ರದ ಚಿತ್ರದಿಂದ ಮೂಲ ಮಾದರಿಯವರೆಗೆ ತಲುಪಿರುವ ವಿಜ್ಞಾನಿಗಳ ತಂಡದ ಸಾಧನೆ ಅತಿ ದೊಡ್ಡದು. ಸದ್ಯಕ್ಕೆ ಈ ವಿಜ್ಞಾನಿಯ ತಂಡ ವಿವಿಧ ಉದ್ಯಮಿಗಳ ಜೊತೆ ಸಂಪರ್ಕದಲ್ಲಿದ್ದು ಶೀಘ್ರದಲ್ಲಿ ಮೂಲ ಮಾದರಿಯನ್ನು ದೊಡ್ಡಮಟ್ಟದ ಉತ್ಪಾದನೆಗೆ ಒಳಪಡಿಸುವ ಹಂತದಲ್ಲಿದ್ದಾರೆ.

ಈ ಅಧ್ಯಯನಕ್ಕೆ ಐಐಎಸ್​ಸಿ, ಕೇಂದ್ರ ಮುಖ್ಯ ವೈಜ್ಞಾನಿಕ ಸಲಹೆಗಾರ ನಿಧಿ, ಕೇಂದ್ರ ಸರ್ಕಾರ, ಎಸ್​ಬಿಐ ಬ್ಯಾಂಕ್​ನ ಸಿಎಸ್​ಆರ್ ಹಾಗೂ ನಾರಾಯಣ ಹೆಲ್ತ್ ಕೇರ್ ಆರ್ಥಿಕ ಸಹಾಯ ಮಾಡಿದೆ.