ಕೋವಿಡ್ ನಿಯಮ ಪಾಲಿಸದ ಹೊಟೇಲ್​ಗಳನ್ನ ಕ್ಲೋಸ್ ಮಾಡಿದ ಅಧಿಕಾರಿಗಳು!

ಈಗಾಗಲೇ ಸಿಎಂ ಹೊಟೇಲ್ ರೆಸ್ಟೋರೆಂಟ್​ಗಳಲ್ಲಿ ಶೇ. 50ರಷ್ಟು ಮಾತ್ರ ಗ್ರಾಹಕರಿಗೆ ಮಿತಿಗೊಳಿಸುವಂತೆ ಆದೇಶ ಹೊರಡಿಸಿದ್ದಾರೆ. ಆದರೆ ಕೋವಿಡ್ ಎರಡನೇ ಅಲೆ ತೀವ್ರವಾಗಿ ಹರಡುತ್ತಿರುವುದರಿಂದ ಸಾಮಾಜಿಕ ಅಂತರ ಕಾಪಾಡದ ಕಡೆ ಶಟರ್ ಎಳೆದು ಬೀಗ ಹಾಕುತ್ತಿದ್ದಾರೆ.

ಬೆಂಗಳೂರು: ಸಾಮಾಜಿಕ ಅಂತರ ಕಾಪಾಡದೆ, ಜನಜಂಗುಳಿಯಿಂದ ತುಂಬಿದ್ದ ರೆಸಿಡೆನ್ಸಿ ರಸ್ತೆಯ ಮೇಘನಾ ಫುಡ್ಸ್ ಹಾಗೂ ಉಡುಪಿ ಪಾರ್ಕ್ ಹೊಟೇಲ್​ಗಳಿಗೆ ಬಿಬಿಎಂಪಿ ಅಧಿಕಾರಿಗಳು ಬೀಗ ಜಡಿದಿದ್ದಾರೆ.

ಈಗಾಗಲೇ ಸಿಎಂ ಹೊಟೇಲ್ ರೆಸ್ಟೋರೆಂಟ್​ಗಳಲ್ಲಿ ಶೇ. 50ರಷ್ಟು ಮಾತ್ರ ಗ್ರಾಹಕರಿಗೆ ಮಿತಿಗೊಳಿಸುವಂತೆ ಆದೇಶ ಹೊರಡಿಸಿದ್ದಾರೆ. ನಿನ್ನೆಯ ಪಿಎಂ ಜೊತೆಗಿನ ಸಭೆ ಬಳಿಕವೂ ಕಟ್ಟುನಿಟ್ಟಾಗಿ ಪಾಲಿಸುವಂತೆ ತಿಳಿಸಿದ್ದಾರೆ. ಕೋವಿಡ್ ಎರಡನೇ ಅಲೆ ತೀವ್ರವಾಗಿ ಹರಡುತ್ತಿರುವುದರಿಂದ ಸಾಮಾಜಿಕ ಅಂತರ ಕಾಪಾಡದ ಕಡೆ ಶಟರ್ ಎಳೆದು ಬೀಗ ಹಾಕುತ್ತಿದ್ದಾರೆ.

ಈ ಬಗ್ಗೆ ಹೊಟೇಲ್ ಮ್ಯಾನೇಜರ್ ಎಮ್.​ಎಚ್​ ಲಾಲ್ ಪ್ರತಿಕ್ರಿಯಿಸಿ, ಮೊದಲೇ ನಿಯಮಗಳ ನೋಟಿಸ್ ಕೊಡದೇ ಏಕಾಏಕಿ ಬಂದ್ ಮಾಡ್ತಿರುವುದು ಸರಿಯಲ್ಲ ಎಂದರು.

ಆರೋಗ್ಯಾಧಿಕಾರಿ ಶ್ರೀನಿವಾಸ್ ಮಾತನಾಡಿ, ಕೋವಿಡ್ ಮುನ್ನೆಚ್ಚರಿಕಾ ನಿಯಮ ಪಾಲಿಸದ ಹಿನ್ನೆಲೆ ಎರಡು ಹೋಟೆಲ್​ಗಳನ್ನು ಬಂದ್ ಮಾಡಲಾಗುತ್ತಿದೆ. ಸಾಮಾಜಿಕ ಅಂತರ ಇಲ್ಲದೇ ಜನಜಂಗುಳಿ ಇದ್ದ ಕಾರಣ ಬಂದ್ ಮಾಡಲಾಗುತ್ತಿದೆ ಎಂದರು.