ಎಚ್‌. ವಿಶ್ವನಾಥ್​​ಗೆ ಮೇಲ್ಮನೆ ಸ್ಥಾನ ನೀಡುವಂತೆ ಎಚ್.ಎಂ. ರೇವಣ್ಣ ಸಿಎಂಗೆ ಪತ್ರ

ಹೆಚ್. ವಿಶ್ವನಾಥ್ ಕರ್ನಾಟಕ ರಾಜ್ಯದ ಹಿಂದುಳಿದ ವರ್ಗಗಳ ಪ್ರಮುಖ ಮತ್ತು ಪ್ರಭಾವಶಾಲಿ ನಾಯಕರಾಗಿದ್ದಾರೆ. ಅವರನ್ನು ವಿಧಾನಪರಿಷತ್ತಿಗೆ ನಾಮನಿರ್ದೇಶನ ಮಾಡುಬೇಕೆಂದು ಕೋರಿ ಕಾಂಗ್ರೆಸ್​ ಮುಖಂಡ ಎಚ್​.ಎಂ. ರೇವಣ್ಣ ಸಿಎಂಗೆ ಪತ್ರ ಬರೆದಿದ್ದಾರೆ.

ಬೆಂಗಳೂರು:ಎಚ್. ವಿಶ್ವನಾಥ್​​ರನ್ನು ವಿಧಾನಪರಿಷತ್ತಿಗೆ ನಾಮನಿರ್ದೇಶನ ಮಾಡುವಂತೆ ಕೋರಿ ಮಾಜಿ ಸಚಿವ ಹಾಗೂ ಕಾಂಗ್ರೆಸ್ ಮುಖಂಡ ಎಚ್.ಎಂ. ರೇವಣ್ಣ ಸಿಎಂಗೆ ಪತ್ರ ಬರೆದಿದ್ದಾರೆ.

ಎಚ್. ವಿಶ್ವನಾಥ್ ಕರ್ನಾಟಕ ರಾಜ್ಯದ ಹಿಂದುಳಿದ ವರ್ಗಗಳ ಪ್ರಮುಖ ಮತ್ತು ಪ್ರಭಾವಶಾಲಿ ನಾಯಕರಾಗಿದ್ದಾರೆ. ಹಿಂದುಳಿದ ವರ್ಗಗಳ ಸಂಘಟನೆ ಹಾಗೂ ಏಕತೆಗೆ ಅವರು ತಮ್ಮದೇ ಆದ ಕೊಡುಗೆ ನೀಡಿದ್ದಾರೆ. ರಾಜ್ಯದ ಹಿಂದುಳಿದ ವರ್ಗಗಳಲ್ಲಿ ಅತಿ ಹೆಚ್ಚು ಜನಸಂಖ್ಯೆ ಇರುವ ಕುರುಬ ಸಮಾಜದ ಅಗ್ರಗಣ್ಯ ನಾಯಕರಾದ ಎಚ್. ವಿಶ್ವನಾಥ್ ಅವರು, ಶ್ರೀ ಕಾಗಿನೆಲೆ ಮಹಾಸಂಸ್ಥಾನ, ಕನಕ ಗುರುಪೀಠದ ಪ್ರಥಮ ಅಧ್ಯಕ್ಷರಾಗಿ ಗುರುಪೀಠದ ಸ್ಥಾಪನೆಗೆ ಹಗಲಿರುಳು ಶ್ರಮಿಸಿದವರು ಎಂದು ಪತ್ರದಲ್ಲಿ ರೇವಣ್ಣ ವಿವರಿಸಿದ್ದಾರೆ.

ಎಚ್.ಎಂ.ರೇವಣ್ಣ ಸಿಎಂಗೆ ಪತ್ರ

ಅಖಂಡ ಭಾರತದಲ್ಲಿ 13 ಕೋಟಿಗೂ ಹೆಚ್ಚಿರುವ ಕುರುಬ ಸಮಾಜವನ್ನು ರಾಷ್ಟ್ರದಾದ್ಯಂತ ಒಗ್ಗೂಡಿಸಲು ಅಂತರ್​​ರಾಷ್ಟ್ರೀಯ ಶೆಫರ್ಡ್ ಫೆಡರೇಷನ್ ಸ್ಥಾಪಿಸಿ, ಅದರ ಅಧ್ಯಕ್ಷರಾಗಿ ದೇಶದಾದ್ಯಂತ ಯಶ್ವಸಿಯಾಗಿ ಸಂಘಟನೆಯಲ್ಲಿ ನಿರತರಾಗಿದ್ದಾರೆ. 1978 ರಿಂದ ಶಾಸಕರಾಗಿ ಎಚ್. ವಿಶ್ವನಾಥ್ ತಮ್ಮನ್ನು ಜನಸಮುದಾಯದ ಏಳಿಗೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಶಿಕ್ಷಣ ಸಚಿವರಾಗಿ ಅವರು ರಾಜ್ಯಕ್ಕೆ ಕೊಟ್ಟ ಕೊಡುಗೆ ಅಪಾರವಾದದ್ದು. ಅವರು ಜಾರಿಗೆ ತಂದ ಸಮುದಾಯದತ್ತ ಶಾಲೆ, ಮಧ್ಯಾಹ್ನದ ಬಿಸಿಯೂಟ ಹಾಗೂ ರಾಜ್ಯದ ಶೈಕ್ಷಣಿಕ ವಲಯಗಳ ಸ್ಥಾಪನೆ ಇಂದಿಗೂ ಜನಸಮುದಾಯವನ್ನು ಸಲಹುತ್ತಿವೆ ಎಂದು ತಿಳಿಸಿದ್ದಾರೆ.

ಎಚ್. ವಿಶ್ವನಾಥ್ ಬುದ್ದಿಜೀವಿಗಳಾಗಿದ್ದು, ಹಳ್ಳಿಹಕ್ಕಿ ಹಾಡು (ಸತ್ಯಕಥೆ), ಮತ ಸಂತೆ, ಆಪತ್ ಸ್ಥಿತಿ ಆಲಾಪಗಳು ( ತುರ್ತು ಪರಿಸ್ಥಿತಿಯ ಮರು ಅವಲೋಕನ), ಸಿರಿ ಭೂಮಿ, ಮಲ್ಲಿಗೆ ಮಾತು, ದಿ ಟಾಕಿಂಗ್ ಶಾಪ್ (ಲಂಡನ್ ಪಾರ್ಲಿಮೆಂಟಿಗೆ ಸಂಬಂಧಿಸಿದಂತೆ), ಅಥೆನ್ಸ್‌ನ ರಾಜ್ಯಾಡಳಿತ ಜೊತೆಗೆ ಇನ್ನೂ 7 ಕೃತಿಗಳು ಬಿಡುಗಡೆಗೊಳ್ಳಬೇಕಿದೆ. ಇವರ ಅನೇಕ ಕೃತಿಗಳು ಪರಭಾಷೆಗಳಾದ ತಮಿಳು, ತೆಲುಗು ಮತ್ತು ಆಂಗ್ಲಭಾಷೆಗಳಿಗೆ ಅನುವಾದಗೊಂಡಿದೆ ಎಂದು ವಿವರಿಸಿದ್ದಾರೆ.

ಎಚ್. ವಿಶ್ವನಾಥ್ ಅವಕಾಶ ವಂಚಿತ ಸಮುದಾಯಗಳ ಬಗ್ಗೆ ಅಪಾರ ಒಲವು ಹೊಂದಿರುವ ಸರಳ, ಸಜ್ಜನಿಕೆಯ ಪ್ರಾಮಾಣಿಕ ರಾಜಕಾರಣಿ. ಇಂತಹ ಒಬ್ಬ ಮೇಧಾವಿ ನಾಯಕ ಕರ್ನಾಟಕ ವಿಧಾನಪರಿಷತ್ತಿನಲ್ಲಿರುವುದು ಅವಶ್ಯಕವಾಗಿದ್ದು, ಮೇಲ್ಮನೆಗೆ ಅವರ ಸೇವೆಯ ಅಗತ್ಯವಿದೆ‌ ಎಂದು ಕೋರಿದ್ದಾರೆ.

ಈ ಎಲ್ಲಾ ಅಂಶಗಳನ್ನು ಗಮನದಲ್ಲಿಟ್ಟುಕೊಂಡು ತಾವುಗಳು ದಯಮಾಡಿ ಹೆಚ್. ವಿಶ್ವನಾಥ್​​ರನ್ನು ಕರ್ನಾಟಕದ ವಿಧಾನಪರಿಷತ್ತಿಗೆ ನಾಮಕರಣ ಮಾಡಬೇಕೆಂದು, ಅಖಂಡ ಭಾರತದ 13 ಕೋಟಿ ಕುರುಬ ಸಮಾಜದ ಹಾಗೂ ಎಲ್ಲಾ ಶೋಷಿತ, ಅವಕಾಶ ವಂಚಿತ ಸಮುದಾಯಗಳ ಪರವಾಗಿ ಮನವಿ ಮಾಡಿಕೊಳ್ಳುತ್ತೇವೆ. ಆ ಮೂಲಕ ಮೂಲಕ ಸಾಮಾಜಿಕ ನ್ಯಾಯವನ್ನು ಎತ್ತಿ ಹಿಡಿಯಬೇಕೆಂಬುದು ನಮ್ಮ ಕೋರಿಕೆ ಎಂದು ಮನವಿ ಮಾಡಿದ್ದಾರೆ.