ಬೆಂಗಳೂರು: ಬೆಂಗಳೂರು ಟರ್ಫ್ ಕ್ಲಬ್ ಹಾಗೂ ಮೈಸೂರು ರೇಸ್ ಕ್ಲಬ್ ಲಿಮಿಟೆಡ್ಗಳು ನಡೆಸುವ ಕುದುರೆ ರೇಸ್ನ ಸಂಪೂರ್ಣ ಬೆಟ್ಟಿಂಗ್ ಮೊತ್ತದ ಮೇಲೆ ತೆರಿಗೆ ಪಾವತಿಸುವಂತೆ ಜಿಎಸ್ಟಿ ನಿಯಮ ಹೇರಿದ್ದ ಕೇಂದ್ರ ಸರ್ಕಾರದ ಕ್ರಮವನ್ನು ಹೈಕೋರ್ಟ್ ರದ್ದುಪಡಿಸಿ ಆದೇಶಿಸಿದೆ.
ಒಟ್ಟು ಬೆಟ್ಟಿಂಗ್ ಮೊತ್ತದ ಮೇಲೆ ಜಿಎಸ್ಟಿ ವಿಧಿಸುವ ಕೇಂದ್ರ ಹಾಗೂ ರಾಜ್ಯಗಳ ಕ್ರಮ ಪ್ರಶ್ನಿಸಿ ಬೆಂಗಳೂರು ಹಾಗೂ ಮೈಸೂರಿನ ರೇಸ್ ಕ್ಲಬ್ಗಳು ಸಲ್ಲಿಸಿದ್ದ ಅರ್ಜಿಗಳನ್ನು ಮಾನ್ಯ ಮಾಡಿರುವ ನ್ಯಾ. ಎಂ. ನಾಗಪ್ರಸನ್ನ ಅವರಿದ್ದ ಏಕ ಸದಸ್ಯ ಪೀಠ, ಕೇಂದ್ರ ಸರಕು ಮತ್ತು ಸೇವೆ-2017ರ ನಿಯಮ 31ಎ(3) ಹಾಗೂ ಕರ್ನಾಟಕ ಸರಕು ಮತ್ತು ಸೇವೆ ತೆರಿಗೆ ನಿಯಮ 31ಎ ಅನ್ನು ರದ್ದುಪಡಿಸಿದೆ.
ಪೀಠ ತನ್ನ ತೀರ್ಪಿನಲ್ಲಿ, ಅರ್ಜಿದಾರ ರೇಸ್ ಕ್ಲಬ್ಗಳು ಸ್ಟಾಕ್ ಬ್ರೋಕರ್ ಅಥವಾ ಟ್ರಾವೆಲ್ ಏಜೆಂಟ್ ರೀತಿಯಲ್ಲಿ ಕೇವಲ ಕಮಿಷನ್ ಪಡೆಯುತ್ತಾರೆ. ಹೀಗಾಗಿ, ಸಂಪೂರ್ಣ ಬೆಟ್ಟಿಂಗ್ ಮೊತ್ತದ ಮೇಲೆ ಜಿಎಸ್ಟಿ ಪಾವತಿಸುವಂತಿಲ್ಲ. ಕಮಿಷನ್ನಿಂದ ಪಡೆದಿರುವ ಆದಾಯಕ್ಕೆ ಮಾತ್ರ ಜಿಎಸ್ಟಿ ಪಾವತಿಸಬೇಕಾಗುತ್ತದೆ. ಆದ್ದರಿಂದ ಸಂಪೂರ್ಣ ಬೆಟ್ಟಿಂಗ್ ಮೊತ್ತದ ಮೇಲೆ ತೆರಿಗೆ ಪಾವತಿಸುವಂತೆ ಹೇರಿರುವ ಜಿಎಸ್ಟಿ ನಿಯಮಗಳು ಈ ರೇಸ್ ಕ್ಲಬ್ಗಳಿಗೆ ಅನ್ವಯ ಆಗುವುದಿಲ್ಲ ಎಂದು ಅಭಿಪ್ರಾಯಪಟ್ಟಿದೆ.
ಸರಕು ಮತ್ತು ಸೇವೆಗಳು ತೆರಿಗೆ ಕಾಯ್ದೆ-2017ಕ್ಕೆ 2018ರ ಜನವರಿ 25 ರಂದು ಕೇಂದ್ರ ಸರ್ಕಾರ ತಿದ್ದುಪಡಿ ತಂದು ನಿಯಮ 31ಎ(3) ಸೇರ್ಪಡೆಗೊಳಿಸಿದ್ದನ್ನು ಪ್ರಶ್ನಿಸಿ ಈ ಎರಡು ರೇಸ್ ಕ್ಲಬ್ಗಳು ಹೈಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದವು. ರೇಸ್ ಚಟುವಟಿಕೆಗಳ ಸಂಬಂಧ ಗಳಿಸುವ ಕಮಿಷನ್ ಮೇಲೆ ಮಾತ್ರ ತೆರಿಗೆ ಪಾವತಿಸಲು ಅವಕಾಶವಿದೆ. ಆದರೆ, ಸಂಪೂರ್ಣ ಬೆಟ್ಟಿಂಗ್ ಮೊತ್ತದ ಮೇಲೆ ತೆರಿಗೆ ಪಾವತಿಸಲು ಅವಕಾಶವಿಲ್ಲ ಎಂದು ಎಂದು ಅರ್ಜಿದಾರರ ಪರ ವಕೀಲರು ವಾದ ಮಂಡಿಸಿದ್ದರು.
ಓದಿ:ಲಾಕ್ಡೌನ್ ಫಜೀತಿ: ಅಂತಿಮ ಕ್ಷಣಗಳಲ್ಲೂ ಸಿಗುತ್ತಿಲ್ಲ ಪುರೋಹಿತರು..ಅವರಿಗಿದೆ ಅವರದ್ದೇ ನೋವು!
