ಬೆಂಗಳೂರು:ಹೊಸ ನಿಯಮ ಜಾರಿಗೆ ಬಂದ ನಂತರ ವಕೀಲರೊಬ್ಬರು ಹೆಲ್ಮೆಟ್ ಕಡ್ಡಾಯ ಪ್ರಶ್ನಿಸಿ ಹೈಕೋರ್ಟ್ಗೆ ಪಿಐಎಲ್ ಹಾಕಿದ್ದಾರೆ.
ಬೈಕ್ ಹೆಲ್ಮೆಟ್ ಹಾಕೋದು ಬಿಡೋದು ನನ್ನಿಷ್ಟ ಎಂದು ವಕೀಲ ಜಗನ್ನಾಥ್ ಶೆಟ್ಟಿ ಸಲ್ಲಿಸಿದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ ವಿಚಾರಣೆ ಇಂದು ಹೈಕೊರ್ಟ್ ವಿಭಾಗೀಯ ಮುಖ್ಯ ನ್ಯಾಯಮೂರ್ತಿಗಳಿದ್ದ ಪೀಠದಲ್ಲಿ ನಡೆಯಿತು.
ಅರ್ಜಿದಾರರು ಆಗಿರುವ ಜಗನ್ನಾಥ್ ಶೆಟ್ಟಿ ವಾದ ಮಾಡಿ, ಹೆಲ್ಮೆಟ್ ಕಡ್ಡಾಯ ಅನ್ನೋದು ಮೂಲಭೂತ ಹಕ್ಕನ್ನ ಉಲ್ಲಂಘನೆ ಮಾಡಿದ ಹಾಗೆ. ಹೆಲ್ಮೆಟ್ ಹಾಕಿಲ್ಲಂದ್ರೆ ಪೊಲೀಸರು ದಂಡ ಹಾಕುವುದು ತಪ್ಪು ಎಂದು ನ್ಯಾಯಾಲಯಕ್ಕೆ ತಿಳಿಸಿದರು.
ಈ ವೇಳೆ ಹೈಕೋರ್ಟ್ ಸಿಜೆ ಎ.ಎಸ್. ಒಕಾ ಅರ್ಜಿದಾರರನ್ನ ತರಾಟೆಗೆ ತೆಗೆದುಕೊಂಡು,ಇದು ಸಾರ್ವಜನಿಕ ಹಿತಾಸಕ್ತಿ ವಿರೋಧಿ ಅರ್ಜಿ ಹೀಗಾಗಿ ಅರ್ಜಿಯನ್ನ ವಾಪಸ್ ತಗೊಳ್ಳಿ. ಇಲ್ಲಂದ್ರೆ ನ್ಯಾಯಾಲಯ ದಂಡ ವಿಧಿಸುವುದು ಎಂದು ಎಚ್ಚರಿಕೆ ನೀಡಿದರು. ಹಾಗೆ ಹೆಲ್ಮೆಟ್ ಹಾಕುವುದರಿಂದ ಜೀವ ಉಳಿಯುತ್ತದೆ, ಹೀಗಾಗಿ ಹೆಲ್ಮೆಟ್ ಕಡ್ಡಾಯ ನಿಯಮ ಕಾನೂನು ಬದ್ಧವಾಗಿದೆ ಎಂದು ತಿಳಿಸಿದರು.
