ಗುರುರಾಘವೇಂದ್ರ ಸಹಕಾರ ಬ್ಯಾಂಕ್ ಠೇವಣಿದಾರರ ಆನ್​ಲೈನ್ ಪ್ರತಿಭಟನೆ

ಬ್ಯಾಂಕ್‌ನಲ್ಲಾಗಿರುವ ಅವ್ಯವಹಾರ ಬೆಳಕಿಗಿ ಬಂದಾಗಿನಿಂದ ಈವರೆಗೆ ಪ್ರತಿಭಟನೆ ನಡೆಸುತ್ತಲೇ ಇದ್ದರೂ ಠೇವಣಿ ಇಟ್ಟಿದ್ದ ಹಣ ಸಿಗುತ್ತಿಲ್ಲ. ಪ್ರಕರಣ ಸಿಐಡಿಗೆ ಹೋದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಠೇವಣಿದಾರರು ಆಕ್ರೋಶ ಹೊರಹಾಕುತ್ತಿದ್ದಾರೆ.

ಬೆಂಗಳೂರು: ಶ್ರೀ ಗುರುರಾಘವೇಂದ್ರ ಸಹಕಾರ ಬ್ಯಾಂಕ್ ವಿರುದ್ಧ ಠೇವಣಿದಾರರ ಆನ್​ಲೈನ್ ಪ್ರತಿಭಟನೆ ಕಳೆದ ರಾತ್ರಿ 8 ಗಂಟೆಗೆ ಫೇಸ್​ಬುಕ್ ಲೈವ್ ಮೂಲಕ ಪ್ರಾರಂಭವಾಯಿತು.

35 ಸಾವಿರ ಡೆಪಾಸಿಟರ್ಸ್​ಗಳ ಹಣ ಇನ್ನೂ ಕೈ ಸೇರದ ಹಿನ್ನೆಲೆಯಲ್ಲಿ ಬ್ಯಾಂಕ್ ಮುಂದೆ ನಿಂತು ಪ್ರತಿಭಟನೆ ಮಾಡಲು ಆಗುವುದಿಲ್ಲ. ಹೀಗಾಗಿ ಫೇಸ್​ಬುಕ್ ಲೈವ್‌ಗೆ ಬಂದಿದ್ದೇವೆ. ಈಗಾಗಲೇ ನಾನಾ ಕಾರಣದಿಂದ 43 ಜನ ಠೇವಣಿದಾರರು ಸಾವಿಗೀಡಾಗಿದ್ದಾರೆ ಎಂದು ಪ್ರತಿಭಟನಾಕಾರರು ಹೇಳಿದ್ದಾರೆ.

ಕಳೆದ ವರ್ಷ ಜನವರಿಯಲ್ಲಿ ಬ್ಯಾಂಕ್ ವಿತ್ ಡ್ರಾ(ಹಣ ಹಿಂತೆಗೆತ) ಲಿಮಿಟ್ 35 ಸಾವಿರಕ್ಕೆ ಆರ್​ಬಿಐ ನಿಗದಿ ಮಾಡಿತ್ತು. ಕೆಲ ಅಕ್ರಮ ನಡೆದ ಕಾರಣ ವಿತ್ ಡ್ರಾ ಹಣವನ್ನು ಇಳಿಕೆ ಮಾಡಲಾಗಿತ್ತು. ಈ ಬಗ್ಗೆ ಅನುಮಾನಗೊಂಡ ಠೇವಣಿದಾರರು ಈ ನಿರ್ಧಾರವನ್ನು ಪ್ರಶ್ನೆ ಮಾಡಿದ್ದರು. ಆಗ ಬ್ಯಾಂಕ್ ನಲ್ಲಾಗಿರುವ ಅವ್ಯವಹಾರ ಬೆಳಕಿಗೆ ಬಂದಿದೆ. ಆಗಿನಿಂದ ಈವರೆಗೆ ಪ್ರೊಟೆಸ್ಟ್ ನಡೆಸುತ್ತಲೇ ಇದ್ದರೂ ಠೇವಣಿ ಇಟ್ಟಿದ್ದ ಹಣ ಸಿಗುತ್ತಿಲ್ಲ. ಪ್ರಕರಣ ಸಿಐಡಿಗೆ ಹೋದರೂ ಯಾವುದೇ ಪ್ರಯೋಜನ ವಾಗಿಲ್ಲ ಎಂದು ಠೇವಣಿದಾರರು ಆಕ್ರೋಶ ಹೊರಹಾಕುತ್ತಿದ್ದಾರೆ.